حقيقة اسعار iPhone 5C و5S بالسعودية وحتى في حراج

14 6

لايمكنك التصويت حتى الحصول على 20 نقطة على الأقل
إضغط هنا للإخفاء

aldossariaim 80
قبل 10 سنه و 6 شهر

السلام عليكم ورحمة الله وبركاته

قبل كل شي، اللي بيعطيني ديسلايك، تراني مب انا الوحيد تعطيه، عطني ديسلايك براحتك قد ماتبي ترى ماهمني، المهم ندخل في لُب الموضوع وهو عبارة عن مصيبة مضحكة مبكية في اسعار اجهزة الآيفون 5إس والـ5سي عندنا هنا في السعودية
فاكتب لكم هالموضوع من قهر ورفعة ضغط لحاجة نشوفها قدامنا ومحد يتكلم او حتى يتجرأ يعرف الامور فضلاً عن كون البائع ماكر يخفي الحقائق والاثباتات على صلاحية تسعيراته هل هي صحيحة ام خاطئة
وكلها اطماع وجشع بإسم الربح او التجارة ومن هالكلام الفارغ والكاذب مثل يجيك واحد ويقولك والله انا صاف سرا في امريكا طوابير وعلى الوزن والارتفاع والطول والعرض وحسن اخلاق الموظفين في آبل واليوم اكلت تفاحة وشربت عصير برتقال وصارلي حادث ومرضت بس انا جبته من بريطانيا مدري كندا في ولاية كوالامبور بمدينة شانغهاي لا بس انا حالتي استثنائية لاني اترزق الله ومحتاج فلوس.. إلخ، واللي يسمع يطقع "اعذروني على اللفظة"، كل هالاعذار على العين والراس ماهي مشكلة، المشكلة بالاخير يكسر ظهرك بهالاسعار اللي بإمكانك فيها تشتري جهاز مكتبي من آبل! تصدق؟
البعض يطرح سعره ابتداءاً من 3000 ريال للـ5سي سعة 16ج.ب
والبعض يطرح سعره ابتداءاً من 5300 ريال للـ5إس سعة 16ج.ب
والبعض منهم بنفس الاسعار لكن يزودلك الاسعار على حسب اللون
"حصرياً عندي ذهبي ومدري وشو وسعره 5600 ريال!!!" يارجُل، والله عيب هالحركات
والبقية اسعارهم اعلى، وكلهم "سعيد اخو مبارك"
حتى جرير! طبعا جرير سوت نفسها ذكية وقللت عمولتها، سعر الآيفون 5سي 16ج.ب بـ 2700 ريال عندهم

طيب، احد فكر يجرب يشتري من برة ويستطلع على الحقائق؟
ايه فيه، أنا، والكثير مثلي
تعالوا معي نشوف مثلاً كم سعر الـ5سي ابو 16ج.ب مع الضرائب الأمريكية (ترى الشريحة مفتوحة ع فكرة)
انا عندي فيزا كلاسيك من ساب، سعر الدولار الواحد بالفيزا مباشرةً بـ3.831 ريال عندهم
فـ 597.72 دولار = 2289.86 ريال
بالنسبة لرسوم الشحن، ماقد جربت اشتري آيفون من برة، لكن دام وزنه خفيف مرة، يمكن بيطلع مابين 68 ريال الى 101 ريال
لأن الباوند الواحد بـ 68 ريال (تسعيرة أرامكس في خدمة شوب آند شب) لكن خلونا نفترض ان رسوم الوزن بـ 101 ريال

يعني بيكون المجموع هو 2390.86 ريال، أي: أقل من 2400 ريال

بالنسبة للي يقول ان آبل تمنع ارسال الآيفون الى العناوين الإفتراضية، اقولك غلطان، لأني استفسرت من ارامكس نفسهم وقالولي انهم يمنعون الكمّيات بدفعة وحدة اكثر من (2حبتين)، يعني ايه تقدر تشتري حبة او حبتين فقط
وسألت آبل نفسها وقالولي ان ماعندهم أي سياسة بمنع الارسال الى العناوين الافتراضية
طبعاً هذا الرد على اللي يقول "والله انا تعنّيت وطالع مشاوير وسافرت ودفعت ووقفت طوابير وناس سرقوني وجاني سرطان وانا اللي قاتل ابراهام لينكولن وانا السبب في رئاسة اوباما.. إلخ لالا انا جاي ادور الرزق الرزق لاتخاف"

الخلاصة: بـ 2400 ريال، وفرت على نفسك 300 ريال من جرير ووفرت على الأقل 600 ريال من البائعين المنفردين لأن هذي هي عمولاتهم، والعمولة ماتخلو من الجشع طبعاً

النهاية: هذي بالنسبة للـ5سي، فما بالك بالـ5إس؟ عموماً ماراح اجيب طاري الـ5إس لأن الفكرة وصلتها خلاص

إشكروني لاحقاً، وحياكم الله

إبلاغ

الردود