موقف حصل عند الاشاره من الغلطان ياجماعه .. ؟

اخوي بالنسبة للغلطان
1- هو غلطان المفروض يوقف في المنتصف
2- انت غلطان وما كان فيه داعي لهذي الحركة خصوصاً لانك كبست العالي بعد ما اشتغلت الاشارة يعني لا فائدة

ويمكن هو وقف وبعدين كمل يمكن عكس عليه النور العالي في عينه فأصابه عمى مؤقت

هو الغلطان لكن نصيحه مع هالاشكال حاول تمسك نفسك ممكن تشوف زي هذا اكثر من مره في اليوم! 
ينكد عليك و يرفع ضغطك .. حاول تتأقلم

يارجال خلها على ربك

اعرف انك مغبون ولا ما كان نزلت الموضوع

نزلت الموضوع عشان تفضفض

طيب وشرايك في واحد كان ماشي

وواحد كان واقف عند صدليه  ( كامري )

وانا ماشي في خطي الايمن , راعي الكامري دق ريوس وانا اشوفه يعني ووقف عشان لا يرجع ويطلع بخطي الايمن

لان انا بالخط الايمن وجنبي مواقف البقاله

وراعي الكامري في المواقف هذي

فراعي الكامري دق رويس والضاهر ما شافني

المهم يوم قربت من عنده

هو كسر اللفه يسار لان من جنبه يسار مافيه سياره

وطلع على خطي بزاويه الصدام حقه الايسر

فهمت علي

يعني كان فيه موقف فاضي من جنبه يسار

فدق ريوس خفيف

ولف يسار في نفس موقفه ودخل بالموقف الثاني وبدأ وجه سيارته يطلع من الزاويه

وانا كنت ماشي بسرعه يعني

وشال على الابواب اليمين والرفرف الخلفي مع الازياق مع الفيابر كامله 

وهو بس زاويه الصدام والرفرف انعفطت

وتدري وش في الاخر توصلنا له

كلمني وقال ان مامعه تأمين وانه منتهي

والرجال والله اني رحمته وهو عمره يمكن بالعشرينات

وقلت له لا لازم يجي التأمين

وفي الاخير قدم سيارته 

وشرد

مع اني حافظ رقم سيارته

وناديت نجم بعد ما شرد وشاف الحادث

وقال بمجرد ما انه يشرد يكون هو الغلطان حتى لو انت الغلطان

وسجلت رقم اللوحه

وطلعت صحيحه

وقالوا خلاص رح قدرها عند شيخ المعارض وبعدها قدرها عند 3 ورش وعطنا التسعيره الوسطى

ونخليه يدفعها لك

في الاخير تذكرت شكله وهو يقول انه مامعه تأمين

وكسر خاطري

مع انه هو الغلطان 

وشرد

لكني والله اني سامحته

وقلت لهم اني متنازل وما ابغا الا ورقه اصلاح

والله يعوضني

مع ان حالتي الماديه هالايام صعبه شوي بسبب ضروف العمار

لكن قلت عسا الله يفك عني كربه

مثل ما فكيت عن هالولد كربته

تحياتي لك حبيبي

اخوك ابوخالد

حركته = يعنى ترا بأتوطا في بطنك 

و منهو الغلطان = هو الغلطان 

يا جماعة ترا الوقوف في المسار الايمن عند الاشارة وهي حمراء على حسب السهم الي في الارض
اذا كان متجه يمين يعني ممنوع الوقوف
اذا كان اثنين يمين وقدام يعني لك حرية الوقوف أو الالتفاف لليمين

أنا افكر اركب دعامية للجمس + أأمن عندي عشان هالأشكال بالذات والله يقهرون ودك والله يكون على وجه الموتر دعامية صب ياسنايدي مع التأمين دفه واعفس ام ام صدامه وخل نجم يجي والتأمين بيشيلها

ادري بتقولون ليش الأذية لكن هالأشكال مايمشي معها إلا كذا والله قهر فكروا معي بعقولكم يعني لو أنك لا سمح الله عندك حالة طارئة في البيت وبيتك بعد ها للفة ما راح تسوي الفكرة اللي قلت انا عنها لو سيارتك مجهزة انها تتحمل صدمة خفيفة ؟؟

وتقبل مروري واحترامي

تبي النصيحة خذها من واحد شاف العجب والعجاب بشوارع واشارات الرياض والزحمة اليومية اللي اواجهها ..

في مثل هالامور حاول انك تشتري راحتك واعتقد فرق دقيقه او دقيقتين ماراح تأثر عليك بالعكس حاول تتعلم طولة البال والصبر في مثل هالمواقف مع اعطاء الطريق حقة ..


ياخي من بعد الرجال اللي طعنوه بحي النسيم على شارع النخيل عند محطة الادريس واهله معه رغم انهم غلطانين بديت اشتري راحتي من هالاشكال واحاول اتجاهلهم بأي طريقة حتى لو الغلط عليه سواء اجنبي او سعودي

يازين طولة البال في مثل هالامور على الاقل توفر صحتك والعصبية وفورة الدم تخليها لوقت ثاني

وبالنسبة للغلطان هو 100% لو جاء مرور وشافك تكبس بالنور يخليه يلف ورجله فوق رقبته وهو زي الألف

وتقبلوا مروري واحترامي مرة أخرى هههههههههه

اهلا


قبل اسبوع كنت رايح الدمام عند اشارة التأمينات

طبعا فيها كاميرا ساهر وكانت الاشارة فاتح و العداد على 3 او اكثر بشوي مانا داكر بالضبط

المهم اني اقدر امشي قبل ما تقفل الاشارة و لكن السيارة الي قدامي يمشي على الراحه

انا بلف يسار معاه وادق له بوري ( خفيف ) حتى يسرع شوي و ادا هو يتعمد يخفف السرعه


بصراحه قهرني و جلست افكر ليه يعمل كدا !

انا سوى فيني واحد بايام الامطار نفس الحركه وموتري غاطس بالماء وانا انتظره ادق ادق بوري واعلق عليه مايفهم يطلع اصبعه من الدريشه يقول اصبر وادقه امه هو وسيارته وينزل بيضارب ماعطيته وجه وفتحت الاشاره واكلته الناس بالوري وركب سيارته ومشى ههههههههههههههههههههههههههههههههه يستاهل عادي الموتر فورد وجهيته كانها نمر من كثر الدقشات ههه

انت لو جيته باسلوب محترم مثلا توقف وراه ثم تدق اشاره يسار علشان يعرف انك تبي تلف يسار
واذا مانتبه لك تدق بوري مره وحده بس صدقني بيفتح لك الطريق حتى لو كان اكبر مهايطي
اما تجي وره وتعلق البوري وتروعه وتروع المسلمين وازعاج وتبيه يفتح لك الطريق بحجه ان لك الاحقيه
فبتركب راسه وبيعاند

شوف حبيبي بالنسبه لموضوعك اكيد الغلط عليه 100%...

لكن تدرون وش الحل مع الشكليات ذي ياجماعة"

(جمس 79 + تامين = راحة نفسية)

والله ياجماعة الخير بيجيني السكر والضغط من سواقة بعض الناس"
خاصة اني في الرياض وكل يوم اشوف الاشكال هذي"

لا وسواقة الاجانب (البنقالية وطقتهم) حدث ولا حرج....

الله يعين بس،

والله هذي اكثر حركه تقهرني, يقعد يوقف في اليمين ويقفل الاشاره وكأنه اشارة ابوه !
هي "وتعليق البوري بدون سبب "


في البدايه ادقه بوري خفيف , دقه دقتين , واذا مسوي مجنون مو سامع اعلللق بالبوري "مع اني اكرهـ هالحركه"
واذا برضوا مامشي , هنا اخلاااااقي تقفل ومستحيل اتركه بحاله الا لمن اوريه شوي من الحركات اللي ترفع الضغط
اخليه , واستنى لين الاشارهـ تفتح ,, والحق وراهـ واعذبه بالطريق مثل ماعذبني بالاشارهـ
ومتى مابردت تسبدي اتركه و ارجع لمشواري < الحمدلله والشكر ههههه


والله مني عارف وش خسرانين لو وخروا شوي ! . من جد شي يرفع الضغط .

شوارع الرياض البقاء للأفضل والتأمين خلى السواقين يناظرونك ويقولون اسس فيه ويرميلك التامين على كبوت سيارتك ولا همه

يارجال ترى الغلط وقلت الادب ماهو من التنابله اللي نقابلهم , الا من عدم تطبيق الانظمه من قبل القائمين عليها ، نفس اللي حصل معك لكن الزود ان رجل المرور واقف عند الاشاره والحبيب مصر الا يقفل الشارع عشان تفتح الاشاره ومن بعد مافتحت الاشاره ذهب بكل سلاسه وعند اقترابي من رجل المرور وقفت في الطريق وكلمت رجل الامن قلتله ياخي ماهو من واجبكم انك تجبره يحترم الانظمه والله يرجال ولاكني اكلمه ماسك الجوال ويناظر فيني عاد انا تعوذة من الشيطان ومشيت،لكن حقيقة بعد ماهديت وفكرة في الموضوع عذرت رجل الامن لان المشكله من الاداره وياما من اصحابنى رجال المرور تجازى بسب ان التنبل عنده ظهر وسلاماتكم

يارجال حتى االدوريات احيانا اشوفهم واقفين يمين وهو يبي سيده .. واللي يقهرك يجيك
واحدن ورى االدوريه ويبلع لسانه ويسكت مايقدر حتى يدق بوري بس لو ان اللي قدامه سياره عاديه
تلقاه صج ام الشارع مدري يعني الدوريه على راسهم ريشه ولا الخوف يلعب دور مع انه على حق

^^^ يارجال واذا دوريه ,, علق ام البوري عليه وخله يوخر زي الطيبين ,, ولا له اي حق يعطيك قسيمه
وانا اشوف بالعكس الدوريه ماتسوي هالحركات , لان يمديهم يقطعون الاشارهـ , وماله اي سبب يخليه يوقف عاليمين
ولو تلاحظ اغلب اللي يوقفون يمين هم اجانب مايبون يوخرون خايفين انهم بيخالفوا , ومو دارين انهم اصلاً مخالفين ههههه