الاحتيار بالاختيار

15 4

لايمكنك التصويت حتى الحصول على 20 نقطة على الأقل
إضغط هنا للإخفاء

كبسة زر او رز 461
قبل 12 سنه و 8 شهر

بسم الله والصلاة والسلام على حبيبنا رسول الله
جمعتكم مباركه وعسى ربي يبارك بأيامكم كلها

لاحظت كثرة مواضيع الحيره في اختيار السياره المناسبه وطلب مشورة الآخرين وفعلاً ما خاب من استشار ، ولكن وبحكم حبي للسيارات وتنقلي في اكثر من مدينة في السعوديه فقد توصلت لما هو آت: كن صاحب قرار واشتري السياره اللي تعجبك ولا يهمك ما يعجب الناس
خذ بالاعتبار وجود وكيل للسياره ومركز صيانه تابع في مدينتك ، اذا كنت مستعمل لمده طويله ولست ممن يغيرون السياره باستمرار لا يهمك كلام الناس ان السياره يطيح سعرها بعد البيع لأنك شاريها تستمتع فيها وليست بغرض التجاره لأننا لو اتبعنا نفس المنطق ممكن نفس هالسياره الشعبيه والمرغوبه اللي انت اخذتها عشان تمسك سعرها يجيها لاقدر الله وبعيد الشر عنكم حادث وتبيعها تشليح وتصير مثل معيّد القريتين فلا انت اللي انبسطت بالسياره لانك ما اخذتها عن قناعه ولا هي اللي مسكت سعرها
كذلك الشوارع والبنية التحتيه ومدى توفر المواقف في مدينتك ، مثال: شوارع الرياض بالذات لو تركب فيها فراري ماعندك مشكله لان اغلبها جيد ومسفلته بعنايه لكن مدينة جده كان الله في عون سكانها لكثرة الحفر وسوء الشوارع مع ملاحظة ان طبيعة سكان جده والبحر اللي عندهم يشجع الشباب لركوب سيارات سبور بس للاسف شوارعهم سيئه والعكس في الرياض لأنهم راعين منقود ويخاف اكثر شبابهم ركوب السيارات السبور بالاضافه لعدم وجود بحر واجوائهم سيئه مع ان شوارعهم هي الانسب ولا اخفيكم اني لاحظت مؤخراً بعض التغير فبدأت سيارات السبور في الانتشار بشكل تدريجي
الاهم مما سبق ميزانيتك للشراء فهي تحدد الخيارات المتاحه
شراء أكسنت جديده افضل مليون مره من شراء سياره افخم مستعمله بنفس السعر ، لأن الهياط ماراح ينفع المشتري اذا قعد يتردد عالورش وكل يوم والثاني طالعله خراب ويدفع كل فتره مبلغ وقدره ، افضل اني اعبي بنزين وامشي ولا افتح كبوت السياره حتى لو كانت في العرف الاجتماعي متواضعه من اني اكشخ واهايط وانا كل يوم من ورشه لورشه وحالتي مايعلم فيها الا الله
من مشاكلنا الكبيره اننا نعتمد عالسمعه ونصدق كلام الناس اكثر من اللي نشوفه بعيونا ، مثال: واحد يقعد يمجد بالكامري وكل الناس يمدحونها فتشتريها وحتى لو حصل فيها عطل ما تتذمر كثير لأنه راسخ عندك في اللاوعي ان هذي سياره قليلة الاعطال حتى ولو كثرت اعطالها لكن في المقابل لو كنت تملك بيجو او فولفو او جاكور وخرب شيء بسيط قعدت تتذمر طول الوقت وتتحسف على شراءه لكن بالفعل متأثر بكلام الناس وحتى لو زعمت انك مقتنع يبقى اثر كلام الناس بدليل ان احد من اخوياك لو قالك بعد العطل شفت يافلان قايلين لك مالك ومال وجع الراس وممكن يقضي عليك بهالكلمه ، وهذا معناته انك يوم شريتها ما كنت ميه بالميه مقتنع او داخلك الشك
استغرب تعصب البعض واستماتتهم في الدفاع عن بعض السيارات او بعض الدول المنتجه لها وكأن تميز هالسياره ماراح يتم الا اذا حقرت الشركات الاخرى وسبيت الدول المنتجه الاخرى للسيارات وقللت من قدرهم وامكانياتهم والله يا اخوان هالفئه من الناس اكثر اشخاص ارحمهم واتمنى اجلس مده معاهم اغسل السلبيه اللي مسيطره على عقولهم والعواطف المهدره فيما لا يستحق ولا ينفع ، لو كانت السياره سعوديه ومن باب الفخر بالصناعه الوطنيه او دعمها ممكن اتفهم انفعالهم ولا اقتنع فيه بس عالأقل اتفهمه ، لكن شخص مستهلك بالدرجه الاولى ولا ينتج حتى كفرات ويقعد ينتقد ويفاخر بمجهود غيره! مثل المشجع اللي يشخص بكأس حصل عليه فريق غير فريقه وهو فريقه رايح فيها ويصارع عالهبوط في هالحاله ركز مجهودك ومشاعرك لفريقك واذا تفرجت عالنهائي حاول تستمتع دون تعصب او تتفاخر بحصاد غيرك
الزبده: انت فقط ولا احد غيرك وحسب معطيات كثيره ذكرت بعضها أعلاه من يحدد اختيارك لشراء السياره المناسبه وتعلم القدره على اتخاذ القرار ولو في امورك الشخصيه كحد ادنى ولا تتأثر بكلام الناس وتشتري اللي يعجبهم لانه اهم شي يكون معجبك انت بالدرجه الولى ولا تخلي امثال باليه مثل: كل مايعجبك والبس ما يعجب الناس تأثر عليك
انا شخصياً ومن واقع تجربه عندي سياره صارلها معي اربع سنوات تقريباً ماتعجب احد وكل الناس تستغرب ليش اشتريتها ولا همني رأيهم ولا حرك فيني شعره لاني شاري السياره بفلوسي ومقتنع فيها وما لأحد عندي شي جايزتلي وناوي استخدمها الين تتهرقل ولا افكر ابيعها
اسف على الاطاله ولكن دفعني لكتابة الموضوع لقافة البعض وتدخلهم في خيارات الاخرين وضعف شخصية البعض الاخر وتأثرهم بكلام الناس اللي ما يودي ولا يجيب

إبلاغ

الردود