أضف سؤال أو موضوع جديد          

إفتح الشباك ما راح ينقص من عمرك شي

up 31 down 10



السلام عليكم و رحمة الله و بركاته ,,,

يسعد مساكم / صباحكم , حبايبي .. الله يسعدكم و يوفقكم , اليوم أنا إرتفع ضغطي بالحيل والله !! بسبب شخص الله يسامحه
بس أبشركم شربت عصير (ليمون نعناع) و روقت أعصابي و الحمدلله , و اليوم جاي  أسولف عليكم عن اللي رفع ضغطي
الله يسامحه و يبيحه , لكن قبل لا أقول قصتي راح أطرح تساؤل !! هل الواحد منا يزهد بالأجر ؟ و بمساعدة أخوه المسلم ؟ 
طبعاً الإجابة البديهية لكل شخص محترم و إبن حلال , إنه بالعكس الواحد يفرح و يتمنى زيادة الأجر عنده بأي طريقة ممكنة 
لكن اللي أشوفه أنا عكس هالكلام و أنا طبعاً من سُكان الرياض !!! و راح أطرح مثال على هالشي:
لمًا تكون واقف عند إشارة و قدرً الله عليك إنك ضيعت المكان اللي ناوي تروح له , من الصعب جداً تجد شخص يخدمك و يفتح
لك الشباك و يوصفً لك المكان اللي بتروح له !!! أكون واقف عند إشارة و أبغى أستفسر عن مكان معين ضيعته أو إنه جديد علي
و أبغى أستدل المكان بالضبط , أوقف عند سيارة بجنبي و أضرب له بوري (خفيف) مع تحية + إبتسامة , و أطالع فيه عل و عسى 
يعطيني وجه !!! وبالنهاية (يدق الحوًله) (يطنًش) حتى ما يكلف نفسه (طال عمره) يطالع فيك , لا يجيني أحد يقول لي: حالة شاذة 
و قليل اللي يسوون الحركة هذي !!! بالعكس أكثر الناس اللي صارت لي مواقف معاهم من نفس هالشاكلة وقليل جداً من يعطيك وجه 
لكن رح (الغربية) مكة و جدة أقسم بالله رجال و لا يهونون باقي (الزكرت) من كل مناطق مملكتنا الحبيبة !!! والله  العظيم كم مرة 
أضيع في جدة أو مكة و اسأل الناس عن المكان اللي أبروح له , ما يوصفً لي بالعكس يقول الجملة المعهودة (أمشي وراي) و أنا 
أقول له: لا طال عمرك ما أبي أكلفً عليك وصفً لي و تكون ما قصرتً , و يرفض رفض تام إنه يوصفً لي يأشر علي عشان 
أمشي وراه !!!!  طبعاً أنا ما أعمم على كل سكان العاصمة بأنهم ماهم (فزوعين) و (زكرت) بالعكس أصابع اليد ما هي واحدة
المهم طولتً عليكم في الحكي و لا قصيت عليكم عن اللي رفع ضغطي اليوم نروح للقصة و أتمنى تشاركوني بارائكم الحلوة:

اليوم أنا طالع للعليا و متوجه لطريق الملك فهد , المهم كنت ساهي بالجوال تعديتً مفرق العليا العام و بعدها تعديت مفرق
الملك فهد , المهم أنا ماشي بطريقي و ناوي أسوي (يوتيرن) عشان أرجع للطريق مرة ثانية , المهم أنا ما كنت متأكد بالضبط
مع وين أروح !!! مشيت في الخدمة و وقفت جنب (فورد إيدج) رجآل و معاه حرمته طبعاً جيته من جهة بابه , ضربت له
بوري مع تحية + إبتسامة , الرجآل مطنش مرررة !!؟؟ ضربت له بوري ثاني خفيف عشان يلتفت لي و (يعطف علي)
المهم الرجآل فتح الشباك عاد أنا إنبسطت , قلت: الحمدلله (الدنيا لسى بخير) و أفتح الشباك و أسمع الرجآل (يهاوش)
خيررر وش تبي ؟؟ (بنبرة هواش) !!! عاد أنا قفلت معاي و وصل الإمبير (H) !!! إلتفت عليه و قلت له: لا بارك الله
فيك إنقلع و أعطيه (فحطة بالوجه) و أمشي , المهم الرجآل يمشي وراي و يكبس و يلفلف علي , (إمتحني) !! و أنا ماسك
أعصابي مو خوف منه بس إحتراماً للحرمة اللي معاه , آخر شي بغى يصدمني مع ورا و أكبس بريك جامد !!! و أنزل
عليه , خير يا أخي وش تبي ؟؟ قال: أنت قد (القحصة اللي قحصتها بوجهي) ؟؟ قلت له: شف والله العظيم إني ماسك
أعصابي و متحمل فأتمنى إنك ما (تحارش شياطيني) !!! عشان ما أنزلً قدرك و مكانتك عند أهلك , و الله يعيذنا و
إياك من (قهر الرجال) !!! المهم الرجآل إنخرش شوي و خصوصاً لما شافني معصب و (عيوني حمرا) !!!
ركب سيارته و مشى , و جلست في السيارة ربع ساعة أتعوذ من إبليس و أذكر الله , و الحمدلله هديت زيادة
لمًا مريت عصاير (رنوش) و أخذت جيك عصير (ليمون نعناع) و اللحين قصيت عليكم هالقصة عشان تحكمون
علي هل أنا مخطي أو الرجآل مخطي أو كلنا مخطين ؟؟

همسة:( حبايبي و اخواني أستودعكم الله التي لا تضيع ودائعه , و سامحونا و إعذرونا على القصور و الزلل و شكراً)







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


افضل شي الواحد ياخذله سياره بنفقيشن يريح مخه.


up 0 down 0
nooooodi 19
قبل 6 سنه و 4 شهر



يا خي يوم شفته يهاوش في البداية كان قلته انا بس بغيت اسال عن مكان ،،،وانتهى انا صارت معي ولكن في دائرة حكومية كنت عندي معاملة والموظف الله يسامحه شاف المعاملة ولا قالي انها منتهية قلت يالحبيب المعاملة كاملة ولا شي ناقص قال اصبر شوي ويلطعني ٥ دقايق انا انقهرت وجيته يوم جيت اقوله قال ايه انتهت وش تبي ثاني انا صرخت فيه وجهه الممهم واطلع ويجي واحد مثلك يبي يسأل وكان اطفي ناري فيه وامشي والرجال متعجب ولكن رجعت له وتأسفت

المقصدد ممكن الرجال بينه والاهل مشكله وجيت انت ههههههه ودخلت عليهم  ونعوذ بالله من المشاكل


up 0 down 0
حسن السعيد -6
قبل 5 سنه و شهر