عندي سفر وابي حل للسافي وتاثير على السياره

أقرب محطه علبة فيري الأصلي 
وسفنجه مواعين وأمرخها لين تقول آمين
وأول ما توصل من السفر اغسلها .

الله يسر امرك اعتقد التغبيرة تفي بالعرض انا في كل سفرة اشتري بخاخ الي في محلات الزينة واحطة ومالاحضت اي ترميل مع الوقت توصل بالسلامة ان شاء الله ..

سوي لها تشميعة عند بعض البناشر قبل ما تسافر
توصل بالسلامة يابو خالد

اولا الله يسهل دربك ويكتب لك اللي فيه الخير

وبالنسبة للترميل اعرف ناس كثير يستخدمون التغبيرة لكن ماادري عن جدواها
لكن فيه حمايات للوجهية تصحلها في محلات الزينة لكن ماادري عن اسعارها

والله وانا أخوك أكلمك من واقع تجربه ، استخدم الفيري وأول ما توصل بالسلامه إن شاء الله أغسله على طول ، مع أني ما جربت التغبيره بس ألاحظ التغبيره متعبه في الغسيل ، والخيار لك وأنا أخوك .

جزاكم ألله خير 

حط لها برقع او غطا من قدام مااعرف اسمه بالتحديد 
يحمي لك الانوار والواجهة بشكل كام
اذكر الوالد شراه بـ 180 ممتاز جدا
وتروح وترجع بالسلامة

للتعديل *بشكل كامل 

يا اخوان احد الزملاء قال لي طريقة استغربتها وهي يغلي بريق كبير ماء معه سكر ومكثر السكر وبعد ما يبرد يصبه على وجهية السيارة يقول بتصير لك طبقة عازلة واذا وصلت بالسلامة اغسله وبسهولة يروح ولا له اي أثر،،،انا ما جربت هالطريقة ولكني انقل ما قاله لي حرفيا

اذا تبغى تعدم شمعاتك استخدم الفيري !! اكلمك من واقع تجربه كنت احطه ع الوجهيه واسافر به واغسله اول ما اوصل ,, لاحظت بعد فتره فيه مثل التشقق بالشمعات وصار شكل الشمعات مشوه ,, حط لك برقع او تغبيره افضل لك ,,

اجل مامعه إلى فازلين ههههههه
والله أنا جربت التغبيره عيبها الوحيد أنها تدخل في بعض الفتحات اللي يصعب عليك 
غسلها بعدين بس ترا ما تأثر ذاك التأثير لأكن إذا قربت من الموتر تشوفها أو دققت النظر

والله تبي نصيحتي اولا الفيري طول عمري وانا احطه بسياراتي كلها وما عمري شكيت منه او يدمر الواجهيه
ثانيا اذا شفت فيه سافي امش على هونك اكيد ما بيكون الخط كله سافي
فيه ناس تحط تغبيره او عازل ويمشي 200 في السافي ويقول التغبيره ما تنفع والعازل خراط
والله يسهل دربك ويكفيك شر مخاطر الطريق

حط جل شعر " شفاف " انا مجربه ومضمون بإذن الله
حطه الساعة مثلاً 10 بالليل و خله لما تجي الساعة 11 , و ارجع حط طبقة ثانية الساعة 11 , و حط طبقة ثالثة الساعة 12 , و توكل على الله
راح تتجمد وتصير عندك طبقة قوية من الشفاف .

فصل للموتر برقع للوجهيه ب 250 ريال في الزينه

يوفر دراهمك ولا يحتاج غسيل وماتشيل هم

ترجع بالسسلامه

أخوي نصيحة لاتحط فيري بيخرب لك الشمعات حط برقع زي ما قالوا الشباب تقريبا شعره من 250 الى 300

الحين مافي غبار بالخطوط . ولو تبي حمايه للواجهه فصل برقع افضل وارخص وكلها عشر دقايق تلبس الواجهه .. انصحك تفصل بدون الشبك المخرم .. فصلها بدون عشانها تقلل كميه الهواء الداخل للمحرك ..يعني تفصل كبوت وشمعات وصدام وتخلي الفتحه على الشبك الامامي بدون بلاستك اتمني وصلت الفكره لك..

غبرها من الزينه 2 علبه مع واحد نشاء ملابس ودربك خضر التغبيره الترابيه ولا اسود ولا السواد اكثر ثبات وتحياتي لك وتوصل با السلامه

طبعا التغبيرة مشكلتها انها تتحشى بالفتحات الضيقة ولا تروح من السيارة بشكل تام بعد الغسيل ، ومع الوقت وكثرة استخدامها بتلاحظ عدم صفاء لون السيارة

الفيري هو الافضل والاسلم للبودي، لكن الشمعات ممكن يأثر عليها خصوصا اذا كانت بلاستك ، والحل للشمعات هو تظليلة شفافة تحطها على الشمعات وتفكها بمجرد عودتك بالسلامة ان شاء الله.

فيه تغبيرة شفافة ب20 ريال عن بعض المحطات هذي مابعد ماترشها تصير مثل التظليل ع الواجهه واذا رجعت بالسلامة ان شاء الله ظللها عن درايف7 او زيبارت وريح راسك وحاول ما تتعدى 140

والله رايح للحساء والسافي كنه بحر والحمدالله ماشي ١٦٠

بس مركب عازل مقدمه والشمعات مفصلهم نظارات شفاف صدق انهم تضررت لكن المهم الشمعات ماجاهم شي