بلف الحراره - الثرموستات - Thermostat

15 1

لايمكنك التصويت حتى الحصول على 20 نقطة على الأقل
إضغط هنا للإخفاء

speed for ever 3706
قبل 11 سنه و 11 شهر

السلام عليكم ورحمة الله وبركاته

بلف الحراره مهم جدا جدا وينظم الحراره ويخليها ثابته عشان يحافظ على راس المكينه

ولازم تركب أصلي وكاله وتتأكد أنه مناسب لسيارتك .. لأن درجة حرارة البلف تختلف ( البلف يفتح عند درجه حراره محدده .. حسب الحراره يسكر أو يفتح شوي أو يفتح بالكامل )

اذا ركبت بلف تجاري أو بلف غير مناسب لسيارتك ... راح يلخبط الحراره عندك وبيأثر على السياره

لو تلاحظ اللي فاك البلف .. الحراره تلعب مره ترتفع ومره تنخفض .. وهذا يؤثر على رأس المكينه ( ينشعر بسبب التغير المفاجئ بحرارة الماء )

لكن الشريطيه .. عشان يتخلصون من السياره اللي حرارتها ترتفع جدا وبأقل تكلفه .. يفكون البلف واذا جيت تشتري السياره يقولك ماله ضرر والخ ... وهو نصاب

يعني معقوله يكون أكثر خبره من المهندسين اللي صنعوا السياره !! مستحيل


طيب كيف نحل مشكله الحراره العاليه ؟؟؟

1) لازم تكون السياره بارده تماما ( لأن التغير المفاجئ بالحراره يعدم رأس المكينه )

2) تسييخ رديتر وتنظيف مجاري الماء برأس المكينه .. فيه مادة خاصة للتنظيف ( عند ساكو ) عليها رسمة رديتر ومكتوب عليها Flush .. المادة هذي مصنوعه خصيصا لتنظيف الراديتر ومجاري الماء برأس المكينه .. لكن اتبع الإرشادات المكتوبه خلف العلبه ..

^ ترى هذا يختلف اختلاف كامل عن (( فلاش الحمامات الله يكرمكم ))
فيه فرق بين Flush و Flash .. فلاش الحمامات يضر المكينه واللّيات و الراديتر

3) فحص طرمبه الماء .. وتغييرها بأصليه اذا تحتاج تغيير

4) تلحيم الراديتر اذا فيه تنسيم أو تهريب

5) تغيير اللّيات اذا فيها شقوق أو تهريب أو تعيق حركة الماء

6) تغيير غطاء الراديتر اذا يحتاج تغيير ( اذا كان متآكل من الصدأ أو متقطعه الربلات اللي تكون بالغطاء )

7) تنظيف الخرطوش \ اللّي يكون بين الراديتر وقربة الماء ( الخزان الإحتياطي )

8) تنظيف القربه وغسلها

9) فحص مراوح التبريد والتأكد بأنها تعمل بشكل ممتاز ومراوحها سليمه ومافيها كسور - فحص حساس الحراره

10) تعبئة ماء راديتر أصلي ( والنوع المناسب يختلف حسب السياره .. ألمنيوم أو حديد أو الخ ... ) أقرأ كتالوج سيارتك .. واذا كتالوج سيارتك ضايع لا تشتري ماء الراديتر إلا من الوكاله .. لأن عندهم النوع المناسب لسيارتك

بعض انواع ماء الراديتر يجي غير مخلوط ومركز 100% ويحتاج تخفيف ضروري بالماء المقطر , لازم تكون النسبه 50%ماء راديتر و 50% ماء مقطر

بعض انواع ماء الراديتر يجي مخلوط ومركز بنسبة 50% .. فقط تعبيه .. ولا تضيف ماء مقطر بنسبه كبيره !!
لأنه أصلا مخفف ونسبة التركيز 50% .. تحتاج 2 جالون ماء راديتر
واذا نقص ماء الراديتر عندك .. زده ماء مقطر

لنفرض انك بتعبي 1.75 لتر ماء راديتر و 5.25 لتر ماء مقطر .. بتصير نسبة تركيز ماء الراديتر فقط 25% !!


طيب متى تحتاج تغير ماء الراديتر ؟؟
حسب نوع ماء الراديتر ..

بعض ماء الراديتر .. عمره وصلاحيته طويله .. و صالح للإستخدام لمده 5 سنوات أو 200 ألف كيلو متر ( يكون مكتوب على العلبه )

وبعض ماء الراديتر .. عمره و صلاحيته قليله

واللي يجي من المصنع .. جودته عاليه
لكن لكل شيء صلاحيه

يعني مثلا ماء راديتر الهوندا أكورد من المصنع يتحمل 200 ألف كيلو أو 10 سنوات ( من الكتالوج ) .. ثم تحتاج تغيره كل 100 ألف أو كل 5 سنوات ( من الكتالوج )

يعني اذا السياره على يدك وكاله .. ولا احد غيّر ماء الراديتر قبلك .. شف كتالوج سيارتك ولا تغيره إلا اذا وصلت المسافه أو المده المحدده بالكتالوج


أخوي كان معه فورد مفكوك بلف الحراره .. وخبطت عليه المكينه بعد فتره


ملخص :

فوائد بلف الحرارة :

1) تنظيم وتثبيت الحراره ( الحراره المحدده من المصنع .. هي أفضل حرارة للسياره من جميع النواحي " الأداء - استهلاك البنزين - الحمايه - والخ... " ) وأغلب السيارات خصوصا الجديده حرارتها على الربع أو الثلث

2) سرعة تسخين السياره بالشتاء ( السياره اللي مفكوك بلفها تاخذ وقت طويل عشان تسخن بالشتاء )

3) حماية رأس المكينه والخ... من تغير حرارة ماء الراديتر بشكل مفاجئ


والوقايه خير من العلاج

غيّر ماء الراديتر حسب توصية الشركة الصانعه لسيارتك ( الكتالوج ) وراح تحافظ على سيارتك وتحمي أجزاء تبريد السياره من الصدأ والتآكل


* لا تخلط ماء الراديتر بنوع ثاني أو بلون ثاني .. اذا نقص وبغيت تزيده ( زده ماء مقطر )
* النوع المناسب .. تعرفه من كتالوج سيارتك أو من وكالة سيارتك
* كرتون الماء المقطر بـ 15 ريال ( 12 علبه ) يعني العلبه بـ 1.25 ريال .. والبناشر يبيعون العلبه بـ 2 أو 3 ريال
* ماء الراديتر التجاري مستحيل يكون مثل الأصلي .. التجاري فقط لون

إبلاغ

الردود