الورش و الإحتيال على أصوله

23 1

لايمكنك التصويت حتى الحصول على 20 نقطة على الأقل
إضغط هنا للإخفاء

غرك جمالك يا خسارة حلاتك 6900
قبل 11 سنه و 10 شهر

السلام عليكم و رحمة الله و بركاته ,,,

أسعد الله أوقاتكم بكل خير حبايبي و اخواني , اليوم حبيت أطرح موضوع عن (إحتيال الورش) و طرق تفاديها بإذن الله
من خلال مجهود متواضع و خبرتي البسيطة في الورش و تعاملهم مع الزبائن , و الموضوع هذا للمشاركة و ليس للإطلاع
فقط !!! أنا أبطرح اللي أعرف فيه و قد تغيب عن بالي نقاط أخرى مهمة و على قولة المثل المصري:( البركة في اللمة)
و أنا طرحت الموضوع للإفادة لأني لاحظت كثير من الأعضاء ينزلون مواضيع يشتكون فيها من الورش ونصبهم !!!!

1/لا تتفق مع أي ورشة (على طول) !!!! بل حاول إنك تاخذ لفة على الورش و تعرف أسعارهم و تعرف الفاهمين من
غير الفاهمين , وهالشي يفيد بتحديد المشكلة اللي عندك إذا ما كانت معروفة !!! مثلاً: تمر على خمس ورش و تلقاهم
يجمعون على مشكلة واحدة عندك , بينما لو تروح عند ورشة وحدة فما تدري هل هو ينصب عليك أو فعلاً فاهم.

2/ لا توافق بالسعر الأول أبداً !!!! أكثر الورش و بلا إستثناء الجيدين و الإستغلاليين (يشطحون بالسعر) !!!
إذا جيت تصلح عندهم , حاول قدر الإمكان أن تكون ذكي و إستخدم طريقة (سعر الورشة الفلانية أرخص)
وهذي الطريقة تفيدك بمعرفة أمانة العامل في الورشة , مثال: أنا أبي أركب فحمات و أخرط هوبات رحت عند
ورشة و قال لي ب 150 أجي لمه و أقول بس الورشة الثانية ب 100 !!! طبعاً إذا كان نصاب بيقول لك خلاص
تعال ب 100 بس إذا كان واثق من سعره و شغله بيقول لك بكيفك هذا سعري و أغلب الورش تشطح بالسعر لأنهم
لاقين ناس على النية ما يفاوضونهم ولا يسعرون في الورش الأخرى المختلفة !!!

3/لا تفوض العامل أو الورشة بشراء القطع من محلات الغيار أو (التشاليح) إلا إذا كنت واثق تمام الثقة منه !!!
وطبعاً بعض الزباين يصدق الورشة عشانها تجيب فواتير !!! الفواتير أغلبها وهمية و فيها تحايل على العميل
في أكثر الأحيان , طبعاً في أكثر من طريقة للتحايل إما إنه يكون متفق مع محلات لقطع الغيار ترفع السعر في
الفاتورة و الزيادة تكون في جيب العامل و يعطي محاسب المحل (علاوة) , أو يشتري قطع ما هي مهمة و بعدين
يرجعها و ياخذ حسابها و لامن جيته عطاك الفاتورة الأولى القديمة , أو يشتري قطع ماهي أصلية و يحسبها لك
على إنها أصلية إلخ ... من الطرق و الوسائل المختلفة لذلك إشتر (القطع) بنفسك ولا تجعل نفسك عرضة للنصب.

4/ لا تذهب إلى ورشة لم يسبق لك التعامل معها أو لم تسمع بها !!!! فأكثر المشاكل تحصل من هذي الطريقة تروح
لم ورشة و تعرض عليهم المشكلة في السيارة و يوافق على تصليحها حتى لو ما كان يعرف ماخذينها (حقل تجارب)
بسيارات الناس , لذلك إحرص على إنك تروح لم ورشة معروفة بسمعتها و شغلها و لو كانت أغلى شوي.

5/ خذ ضمان من الورشة على شغلهم , بحيث تتفق معاهم قبل لا تحط السيارة عندهم إذا ما حلوا المشكلة ما تدفع لهم
الفلوس اللي إتفقتوا عليها , و لا تدفع كامل المبلغ إلا إذا أخذت السيارة و جربتها و تأكدت بأن المشكلة إنحلت.

6/ حاول قدر الإمكان إنك تسأل الفني في الورشة عن حجم المشكلة و توابعها إلخ ... حتى تتأكد و يتضح لك فهمه أو
عدم فهمه !!! لأن كثير من الزباين ما يهتم بالنقطة هذي , فلذلك إحرص على كثرة الأسئلة و الإستفسارات.

7/ لا تغتر بالشكل الخارجي و الفخامة الموجودة في الورشة !!! في بعض الورش قد يخطر على بالك إنها سيئة و لكن
فيها عمالة فنية ماهرة جداً , طبعاً هذي الشغلة إنتشرت بالورش تحسًن الشكل الخارجي و بعضهم يحطون إستراحة
فيها شاهي و قهوة و تلفزيون بلازما و مكيف (يذعذع) بوجهك , حتى يغتر العميل و يعتقد بأن الشكل الخارجي مقياس
للجودة في العمالة الفنية و الإتقان في العمل , و هي طبعاً شغلة نسبة و تناسب ماهي مقياس أساسي بس أنا أحذرً من
الإنخداع في الشكل الخارجي !!!!! و عدم الإلتفات لجودة العمالة الفنية و الإتقان في العمل.


أخيراً (لا تحرموني من الإضافة و المشاركة , أستودعكم الله التي لا تضيع ودائعه)

محبكم &&& أبو طـــــــلال 

إبلاغ

الردود