هل تربط حزام الأمان ؟ وهل ترى انه مهم؟

صارلي موقف غريب مع الحزام ..اول كنت مااداني الحزام ابدا ومرة سرحت للكلية والوالدة فتحت الطاقة وانا مريوس وقالت ليش ماافطرت قلت لها بالكلية قالت ودعت الله فيك ..ذاك اليوم الاول اللي ربطت الحزام ماادري ليش وبالطريق وانا مسرع اعترض لي واحد وانتفه على البيبان وسيارتي وصل كبوتها مابين الدركسون والقزاز الامامي المكينه والشاصات انعجنت طبعا السيارتين للتشليح والحمد لله نزلت من السيارة ولا حتى خدش والرجال الثاني كان رابط الحزام وتقلبت سيارته مرتين وطلع ولاخدش ولله الحمد وكل من شاف السيارتين يقول ماتوا اللي فيها ..الخلاصة حزام الامان سبب والاهم منه ستر الله ورضى الوالدين وهذا لايعني التساهل بالاسباب والله يسترنا واياكم دنيا واخرة

يا اخ (الوافي) الله يخليك لامك ويخليها لك    دعوة امك نفس دعوة امي بنفس الصيغة تماما   علطول تذكرت والدتي يوم تدعلي دايما  ربي يخليها

وبالنسبة للموضوع انا بصراحه ما اربطه ولاقد ربطة الا عند التفاتيش فقط ثم افكه اذا تعديتها

ولكن اذكر سالفة لخويي قبل اقل من سنة تقريبا صار عليه حادث

يقول كنت ماشي  بحفظ الله وامانه وشوي قابلني نقطة تفتيش وربطت الحزام زي العاده عشان العسكري ما يقله شيء

فالزبده تعديت النقطة ونسيت لا افك الحزام وبعد النقطة مباشرة  جت اشارة مولعه خضرة واكملها سيده الا ويجيني واحد قاطع اشارة

ويصدمني على البيبان وحاصت علي وحضنت في عمود سبحان الله ما جاه شيء بعد فضل ربي  ثم حزام الامان لانه تثبت مكانه