ما هي افضل طريقة لتعليم شخص القيادة؟ قير اوتوماتيك

مايحتاج لها شرح اسهل طريقه علشان يتعلم الواحد السواقه يبدء بالقير التماتيك ,, وده طال عمرك  لمخططات تكون مافيها زحمه وخله يفرفر كل عصريه معك ..وبعدين خله يتعلم كيف يوقف السياره بالريوس حط له اعمده ولا بلكات ههههههههههه المهم انه يتعلم وبعدين حبه حبه خله يطلع معك للشوارع الرئيسيه,, وكان الله غفورا رحيما ... 

الأوتوماتيك سهل

أهم شيء علمه أن سواقة الأوتوماتيك تكون بالرجل اليمنى فقط ... عكس القير العادي

يا يدعس بنزين يا يمسك فرامل .. لكن ما يدعس بنزين وفرامل بنفس الوقت

ورح أنت وياه لمخططات فاضيه أو مخططات مافيها زحمه

علمه اذا ركب السياره وبغى يمشي :

1) يشغل السياره
2) يمسك الفرامل العاديه ثم يطلق الجلنط .. طبعا يكون مستمر ضاغط الفرامل العادي
3) يضغط زر القير و يعشق من P إلى D أو R .. لكن شوي شوي على القير يعني لا يعشق بسرعه وبغشامه من P إلى آخر نمره تحت
4) بعد التعشيق يترك الفرامل ثم يدعس بنزين شوي شوي ( لأنه عليمي لا يدعس بقوه تحوس فيه السياره )
5) يحاول يخلي رجله ودعسته ثابته .. يعني لا يحسبه مثل القير العادي .. يرخي أو يزيد الدعسه كل شوي اذا جت السياره تعشق

واذا بغى يلبق ويطفي السياره :

1) يدعس الفرامل العاديه
2) يحط القير بـ N
3) يسحب الجلنط بشكل كافي ثم يطلق الفرامل العاديه .
4) الحين ثقل السياره يكون على الجلنط وليس القير .
5) يدعس الفرامل العاديه ثم يعشق القير بـ P

^
بقولكم وش قصدي بـ :
5) يحاول يخلي رجله ودعسته ثابته .. يعني لا يحسبه مثل القير العادي .. يرخي أو يزيد الدعسه كل شوي اذا حس أن السياره بتعشق

فيه ناس متعودين على القير العادي ودايم يسوقونه .. وأحيانا ولا أراديا ينسى الواحد ويخفف شووووووي دعسه البنزين ( اذا جت السياره تعشق ) و يحس بنتعه خفيفه

شكرا لكل من رد استفدت منكم

توني طلعته مخطط بالحارة قريب وبغى يشيل 3 سفري شطفهم شطفه اليمة بالمراية هههههه يالله عوافي

اهم شي علمه ان السواقه فن وذوق واحترام النظام 

علمه تعليم عادي اهم شي الاساسيات مثل النضر في المراءه ويكون اجباري لنه اذا ماتعلم يوم يلف ولا يتجاوز النضر في المرءه بيصير مثل الي اذا سياره قدامه على طول حذفها 
علمه كيف يشيك على ماء الاديتر على عدادات السياره حراره وبنزيل عوده انه مايدعس ولا يسرع ولا يعشق القير الا عند التوقف يعني اذا بيغير من امام الي الخلف او العكس لابد لين تقف السياره 
وهو اذا مخه مفتح بيتعلم بسرعه 

علمه عالعادي اول ويصير الاوتوماتيك سهلللل بالنسبة له

لا لا ابدأ بالاوتوماتيك عشان يبدأ بتعلم توجيه الطارة ونصيحة لو تبغى اخوك يتعلم ويكون قلبه قوي بالقيادة خذه مكان فاضي وخله يفحط ويخمس

مساء الخير..... مادام اخوك مايعرف شي عن السواقه لاتبدا معاه بالعايدي لأنه معقد بالنسبه للمبتدئين.... واهم شي لاتعصب عليه خليك هادي معاه وخلي اعصابك هاديه ع الاخر....
انا اخواني لمن علموني السواقه بهذلتهم وطلعت قرون برووسهم

من خلال تجربتي مع السواق اشوف

١- علمه في مخططات جديدة كل يوم من ساعة الا ساعتين حسب رغبته و فضاوتك
٢- بعد ما يتعلم في المخططات جيدا اللفات و الوقوف و غيرة ((( تصير تطلع الى المدينه
باخر الليل))) يعني اذا انت بالرياض نفرفر داخل الشوارع من بعد١٢ بالليل 

لانه راح ياخذ درس ع الطرق الطبيعية من دون وجود الخوف من السيارات

٣- بعدها يطلع قريب من البيت في اوقات الزحمة و الشوارع الغير مزحومة 

وتحصله بدا يسوق و مبروك الرخصة مقدما

نسيت شيء مهم جدا

اذا بغى يعشق من R إلى D .. أو من D إلى R
أو اذا بغى يحط القير بـ P

لازم السياره تكون واقفه تماما

ههههههههههههههههههههههههههههههه واللله ضحكتني مرة يارجال خله يركبها مرة وبعدين يعرف كل شي وش تعليم مايحتاج

ياصاحب الموضوع بصراحه بقولك شي وﻻ تزعل مني انا خوك
انا قريت الموضوع وردود الاعضاء حسيت ان للي يبي يتعلم السواقه انت مو اخوك هههههههههههههه
مداعبه مداعبه ،،

شوف إذا اخوك مهتم بالسواقه بيمشي معك  إذا ما وده لا تجبره لانه ما راح يتعلم 
انا والله محد علمني السواقه ومن اهتمامي في السواقه صرت اتابع إخواني والوالد يوم 
يسوق وصرت أركز على كل صغيره وكبيره وشوف الحين أروح واجي وكأني متعلم السواقه 
،،،تقريبا هاذا الحال مشيت عليه من يوم دخلت الثانوية  الين تخرجت 

اول شيئ عطه كتاب المرور لتعليم القياده يقراه لمدة اسبوع في فوائد تعود عليه بالنفع
مثل معاني الوحات الارشاديه والوحات المروريه والرموز وكذلك الطريقه الصحيحه لمسك دركسون السياره والمنطقه العمياء التي لا يمكن ان يراها في المرايات الجانبيه فيه فوائد قويه راح ترسخ في ذهنه ويستعيدها تلقائيا حين ممارسة القياده

علمة سيارة عايدي لانها بيتعلم تماتيك ولا عاد يعرف يسوق عايدي