نصائح لشراء سيارة وارد امريكا 000 من كتابتي وتجربتي 000

23 1

لايمكنك التصويت حتى الحصول على 20 نقطة على الأقل
إضغط هنا للإخفاء

aboail 556 130
قبل 12 سنه و 7 شهر

السلام عليكم ورحمه الله مساكم الله بالخير جميعا هذا موضوع ابكتب فيه نصايح للناس اللي بيشترون سيارات من المعارض يعني وارد امريكا 1- اول شي خذ نظره على السياره يعني شوف شكل البودي وبالنظر تعرف نظافه البويه 2 -افتح السياره وطالع في المقاعد والديكورات واذا كانت المقاعد جلد قارن بينها وبين سياره ثانيه او حس الجلد وتأكد انه جلد بلدها لأنهم -الكلاب- الله يكرمكم يرحون ينجدونها تنجيد اي كلام وشفتها قدام عيني سيارات جديده يفكون تنجيدها وطبعا مافيه احسن من السيارة بجلد بلدها واللي ركبوه لك بيتقطع مع الوقت ويمسك حراره وتلقاه حتى يابس كذا بتقولي ليه ينجدونها السبب يا أن داخليتها كانت سوداء مثلا او رصاصيه يرحون يصبغون الديكورات وينجدونها جلد بيج عشان يمشي سوقها 3-تاخذ رقم الهيكل وهو موجود في اللصقه اللي ع الباب اول على الطبلون تشوفه من القزاز الامامي طبعا مكون من 17 خانه وتروح تفحصه بالكارفاكس وهو عباره عن تقرير يجيب لك ماضي السياره في امريكا (عدد ملاكها, حاول تكون مالك واحد - جاها حوادث -هل هي تكسي ولا ايجار ولا شرطه-اخر تسجيل لممشى السيارة عشان تتأكد انهم مالعبو في العداد - جاها رشوش - في اي ولايه كانت - تعرضت لأعصار ولا فيضان ولا غرقانه - عدد صياناتها في الوكاله - ووووو اشياء كثيره ),,, بتقولي وين افحصها اقولك افتح موقع حراج واكتب في البحث كارفاكس بتطلع لك اعلانات كثيره تعطيهم رقم الهيكل ويعطونك التقرير ب 25 ريال فقط -انتبه لاتاخذ سياره ممشاها كثير ولايغرك كلام المعرض يوم يقولونالممشى مايضر لأن كل قطعه في السياره لها عمر محدد وبتبلشك كل يوم وانت تغير قطع ,, وانا عن نفسي اشوف الممشى الطبيعي للسياره سنويا10.000 ميل اي 15.000 كيلو يعني مثلا سياره 2007 ممشاها الطبيعي 40.000 ميل اي 65.000 كيلو ,,, ولا تعال المعارض تلقا 2007 ماشيه 120.000 ميل يعني 200.000 كيلو تلقا السيارة كلها يبي لها نفض وخصوصا ان عمر الجيربكس الافتراض هو 250.000 كيلو !!! 5 -بعدين تشغل السياره وتسمع صوتها تأكد انه طبيعي شد على المكينه وطالع الشكمان فيه دخان ولاتغرك المويه واسمع صوت المكينه وجرب المكيف المسجل البيبان والاقفل والازرار وكل مافي السياره واذا في شي ناقص خلهم يبدلونه بسياره ثانيه 6 - خذ السيارة وجربها جرب الاستجابه وادعس لها من الصفر لل100مع المكيف وبدون جرب التعشيقات شوف القير يتأخر ولا لا وطلع العيوب اللي في السياره من اصوات وحذفات ورجات شوف حرارتها ترتفع مع الوقوف ولا المشي ولا مع المكيف وتأكد انها ماترتفع مرره عن مستواها الطبيعي وعشان لازم تعرف مستواها الطبيعي زي الفورد للنص ماتتعداه ولاتنقصها صيف شتاء 7- بعدين روح لمحل فحص غير محلات فحص الكمبيوووتر ترااااااااااهم نصااااااااااابين وفحصهم كله كذب بكذب ومتعاملين مع المعارض وحتى يوم يقلك نسبه المكينه تراااهم كذابين ياعالم الصح انك تروح لمحل فحص كبير مثل كارتك والبريدي والغروب هذا في الرياض يمدحونه اما في جده يمدحون ورشه ابو عمار في المعارض اسأل عنه وبيدلونك بقولون ان اصحاب المعارض يكرهوووونه على حسب ماسمعت وما احط بذمتي والافضل انك تبعد عن المحلات والورش اللي بالمعارض وتروح لورش الصناعيه مثل البيان وبارك اوي واتو تك ياخذون عليك تقريبا 250 ريال ,,, طبعا تودي السياره لهم وتقلهم ابي فحص كااااامل من الى يعني عضلات ومكينه وكهرباء وكمبيوتر وبووودي وتأكد من الجنوط لاتكون صينيه وتعرف انها صينيه بأنك تفك الجنط وتطالع من ورا اذا لقيت ميد ان تشينا اعرف انه صيني -- ضحكو علي وركبو لي صينيه وانكسرت من مطب بسيط -- يعني من الصدام للصدام بالعربي واهم ش يفحصون البودي بالجهاز وانه خالي م الصدوم لأن اكثر -الكلاب- اعزكم الله تجيهم مثلا الماركيز لونها اسود مثلا يجون يرشونها ف الورشه ر كامل سمني ا كلام عشان يمشي سوقها وهذي شفتها قدام عيني ف ورش قريبه م المعارض , وكمان يفحصون الشاصيه يتأكدون انه ماهو ملحم ولا جايتها صدمه قويه ولاتكون مصديه كثيير م تحت , وطالع بطن السيارة بنفسك انت ولاتعتمد على العمال , بعدين يفحصونها بالكمبيوتر ,,بعدين يطلع معك واحد يجربها ويتأكد منها . 8

واذا تأكدت م كل ش توكل على الله وصل الاستخاره والله يبارك لك


9- لاتدور على المواصفات بقد ماتدور على النظاااافه ,, ولايغرك سعر السياره ولا الصاله الفلانيه ولا المعرض الفلاني ,, ولاتستعجل وانت تفحص ولاتسمع كلام اصحاب المعارض يو يقول لك السيارة جاها زبون ولا نادره

طبعا يا اخواني انا ماكتبت الموضوع هذا الا عشان اوضح لكم تجربتي وانا وسيارتي كل يوم تطلع بخراب عشاني انغريت بالسعر وبالمواصفات ,, وبعضكم يقول شغله اسوي كل هذا اقوله والله لتندم اذا طبيت في سياره مخيييسه وتقول ياليتني دفعت 1000 ريال على الفحص والغله كلها ماتكلفك 300 الى 400 ريال اذا صكت السماء ووالله ماودي واحد ينضحك عليه منهم لأنهم خداعين ويغرقون الواحد بالكلام لين ينهبونه

واللي بصراحه يدور سياره له وللزمن ولعايلته يفتح المواقع الامريكيه ويطب يتخير من السيارات النظيفه ويوصي واحد يفحصها ويجربها وويطلع تقريرها ويشحنها له الين السعوديه ولو يبغا في كاونتنير عشان يحميها في حدود 40 الى 60 يوم تاخذ بالضمانات والسندات اللي تبغاها وموجودين في موقع حراج ,, ويمكن تطلع لك بنفس اسعار السيارات اللي هنا او يمكن ارخص بعد ,, وترتاح يوم انك مختار سيارتك بنفسك ,, واللي يبغاني اعطيه مواقع بيع سيارات اعطيه ولا يهمه

واخير هذي تجربتي اللي حبيت اطرحها لكم وان شاء الله انكم تسفيدون منها ومابي منكم الا الدعاء ان الله يفرج همي
تكفون ياشباب دعواتكم
واللي عنده اضافه ع الموضوع يعلمنا عشان نفيد ونستفيد
والسام عليكم ورحمه الله

إبلاغ

الردود