كيف تتعامل مع بعض السائقين المستفزين عند الإشاره ؟

13 10

لايمكنك التصويت حتى الحصول على 20 نقطة على الأقل
إضغط هنا للإخفاء

speed for ever 3708
قبل 11 سنه و شهر

السلام عليكم ورحمة الله وبركاته

كيف حالكم إن شاء الله بخير : )

اليوم أنا كنت مستعجل ينتظروني أهلي وكنت واقف عند الإشاره وقدامي هايلوكس غمارتين ووراي كم سياره وعلى يميني ويساري زحمه .. وطبعا خلف سيارتي زحمه

المهم فتحت الإشاره وراعي الهايلوكس يمشي حركه بطيئه بطريقه مستفزه وكأنه يعاند .. أنا اللي وراي يكبسون وأنا أكبس على راعي الهايلوكس .. يعني امش

تمنيت أن سيارتي جمس أو اي سياره قديمه وحديدها قوي عشان ادفه ويتأدب ويخلي الهياط

المهم بعد الإشاره أخذنا منعطف وبعد المنعطف أستمر راعي الهايلوكس يمشي ( نص سيارته بالمسار الأيسر ونص سيارته بالمسار الأيمن ) ومستمر على هالوضع

أرتفع ضغطي ووصل H وأعلق على البوري طلعت حرتي ؛ وبعد ما خفت الزحمه تجاوزته
سيارتي صغيره وصدامها الأمامي بلاستيك .. وهو صدامه الخلفي حديد

هو سعودي ومركب معه كم واحد ؛ ومهايطي
تعرفون النوع اللي اذا صار لحاله قامط أم العافيه ؛ وإذا صار معه كم واحد يهايط ؟
نفس النوعيه هذي

لو أنتم بمكاني بصراحه وش راح تسوون ؟ وكيف راح تتعاملون مع النوعيه هذي ؟ وكيف تتعامل مع النوعيه هذي إذا كنت مستعجل وينتظرك أحد ؟ أبي تتكلمون بصراحه يعني ما أبي واحد يقول كلام مثالي وهو بالواقع يسوي أشياء غير .. اتمنى انكم فهمتوني

عندي سؤال إضافي لو أنا واقف عند إشاره فيها كاميرا ساهر
وفتحت ومشينا لكن قدامي واحد أو ثنين ويمشون حركة بطيئه مع أنهم ماسكين المسار الأيسر وتوهقت لا أنا اللي وقفت قبل الإشاره ولا أنا اللي مشيت وتعديت الإشارات

هل راح تصورني كاميرا ساهر ؟؟ أو عادي بما أني مشيت والإشاره خضراء وحتى لو سكرت وأنا ما تعديت الإشارات وفتحت للإشاره الثانيه .. هل راح تصورني كاميرا ساهر ؟؟ مع أن الخطأ من اللي قدامي أنا أحاول امشي لكن اللي قدامي يمشي 10 أو 20 أو 30 مثلا مع انه ماسك المسار الايسر والخط زحمه


الشيء اللي يسبب زحمه بالخطوط او عنق زجاجه أو الخ... :

1) اللي يمشي بسرعه بطيئه جدا جدا ويمسك المسار الأيسر ولا يفتح الخط و تلقاه يسولف مع واحد أو يكلم بالجوال أو الخ...

2) اللي يمسك أقصى اليمين من الخدمه عند الإشاره وغصب يبي يدخل عرض مع أنه توه جاي وآخر واحد وصل الإشاره .. واللي قبله موقفين بطريقه نظاميه

3) اللي يطلع من الخدمه نص سيارته ويوقف يتفرج ما ادري وش يحس فيه.. لا هو اللي مشى ولا هو اللي فكنا من شره يعني حدني وبظطر الف على اللي يساري

إبلاغ

الردود