تغيير البواجي

حبيت اطرح لكم طريقة استبدال البواجي

وعشان الكل يستفيد ويوفر فلوسه بدل مايصرفها على شغل ماتاخذ من وقته نص ساعه وسهله

طبعا الاستبدال كان في سيارتي سوناتا 2011 وسبب ان الموتر ماشي20الف مع ان المفروض

استبدلهم في ال40الف السبب في الاستبدال المبكر ان الموتر مستخدم استخدام شاق

يعني افرفر كثير داخل البلد ووقفات السياره كثيره وهي تشتغل

المهم بدى الموتر يتفتف وصار صوت المكينه خايس حبتين قلنا بلمره نستبدلهم ببواجي رياضيه

افضل اداء واطول عمر وراح ابين لكم نوعيتها مع الشرح

نبتدي في الشرح

في البدايه طبعا مايحتاج تفص اصابع البطاريه ولا شي

كل الي تحتاجه ان تخلي الموتر واقف لين يبرد على الاقل ساعه

وبنسبه للعده تحتاج حبة بكس 10 ملي مع الذراع الخاص (هندل)ومفتاح بواجي

اول حاجه راح نفتح الكاور الي على المكينه بمجرد انك ترفعه الى فوق نفس ماهو في الصوره

طبعا خل فيه قطعت قماش موجوده معاك عشان تنضف المكان من التراب والاوساخ لا تنزل في المكينه

بعد ماتفتح البواجي بلغلط وتبهدل عليك الدنيا

راح نشوف الكويلات مباشره قدامنا نجيب حبة البقس ونفك البرغي الي يثبت الكويل لاحض الصوره

بعد ما نفك البرغي نسحب الكويل من المكان الي مأشر بلاحمر للكويل المرفوع ولاحض الباقي الي

مأشر عليهم هذا البرغي الي بنفكه

طبعا بنسبه للفك راح نفك واحد واحد نفكه ونغير البوجي ونرجع نركبه ونبتدي بلي بعده

لاتفكهم كلهم في وقت واحد عشان لاتجيب العيد

نفس الكلام الي سياراتهم الكويلات مو راكبه مباشره فوق البواجي استبدل دائما واحد واحد

بعد ما نشيل الكويل طبعا راح نلقي نظره سريعه اذا فيه عيب او الربل متمزع او اي شي غير طبيعي

حطه على جنب مكان جاف ونبتدي نفك البوجي نحط المفتاح ونفر عكس عقارب الساعه للفتح

طبعا مفتاح البواجي فيه زي الربله من داخل راح تمسك لك البوجي بمجرد ما تسحب المفتاح راح يطلع

البوجي معاها على طول

الحين نركب البوجي الجديد مكان القديم في مفتاح البواجي ونتبهو للي مأشر عليه بلاحمر

لاتجيه ضربه او يطيح عليكم عشان لايخرب

نركبه مكان القديم ونفر مع عقارب الساعه

ونفس الخطوات مع باقي البواجي

وهذي البواجي القديمه

طبعا بعد ما نخلص نتأكد من ان كل شي رجعناه زي ما كان ونتأكد من افياش الكويلات وتركيبهم

نظره للتأكد

بعد مانخلص نرجع الغطا زي ماكان ونه راح يركب على القواعد الخاصه فيه بشكل صحيح

طبعا الكلام ينطبق على كل انواع السيارات طبعا فيه البعض منها

شغلها غثيث شوي مثل انك تفك الثلاجه وغيره والله لايوريكم تفكون حقين فان الشفر القديم

على العموم

بنسبه للبواجي الي انا ركبت نوع المعدن المستخدم فيها اريديوم ومن تصنيع شركة NGK

هذا الكرتون الخاص فيها

وهذي من الخلف للي حاب يقرى المعلومات الخاص فيها

طبعا ماراح تزيد في قوة الاحصنه

لاكن راح يكون فيه تحسن ملحوض في الاداء ونعومه في صوت المحرك وعمرها اطول من البواجي

الاصليه

في النهايه اتمنى ان الكل استفاد من الموضوع

واي استفسار انا حاضر

تحياتي

الموضوع منقول للفائدة ومطبق من قبلي اي استفسار انا حاضر