أضف سؤال أو موضوع جديد          

تجربتي بالفيديو لستروين C5 مع أبو هنود

up 37 down 5



السلام عليكم ورحمة الله وبركاته :

تجربتي للستروين ويعجز التعبير عن وصفها وأشوف انها تحدت عوامل الفيزياء الطبيعيه وكنت ناوي أتفلسف فالفيديو بس يوم ركبت وشفت كثرة الازرار سكت وماعرفت اشرح عنها وش اشرح ووش اضغط حتى السقف ازرار و تجربتي كانت للنص فل

المقاعد ضامه الجسم وماسكته عن الحركه وتحكمها عجيب غريب مثل بعض القطع المقاعد مفصوله تتحرك لحالها وتعطيك حرية الجلوس بالوضعيه المناسبه لك

القير 6 نمر اوتامتيك او تبترونيك والغريب انه يوصل النمره ال 6 على سرعة 90 !!! اشياء عجيبه يمكن عشان الاقتصاديه فالوقود

الوان الداخليه ممتازه ومتناسقه رصاصيه والباقي لونه كروم حتى اللون البني اللي كنت اكرهه صار عاجبني

مع المنعطفات على سرعات ماتحس بميلان السياره نهائيا لان السياره اذا مالت من جهه يقوم الهيدروليك يرفع السياره من الجهه التي تميل وينزلها من الجهه الاخرى يعني نقدر نقول الهيدروليك يمتص ميلان السياره وماتحس انك داخل لفه نهائيا طبعا الهندي انخرش وتمسك مكانه ههههههههه وكل شوي يصارخ

الطريق ماتحس فيه نهائيا سواء مكسر او خشن يعني كئنك راكب سفينه اذا كان الطريق مكسر ماتحس بقرقعه او تنقيز نهائيا وهالميزه ماعمري شفتها فاي سياره وانا جربت البانوراما 2012 اس 500 بس اشوف الستروين متفوقه عليه يعني نعومه وراحه فوق ماتتصورها والهيدروليك يمتص الاهتزازات وماتحس فيها يعني معزوله بقوه

العزل الهوائي روعه ل 140 ماتكاد تسمع شي

الطبلون تجي فيه انواع الرسائل والله مدري وش الهرجه

على سرعة 140 تنطل بالسياره يمين يسار وتحس انها قطعه وماتشعر بان هانك شيئ يسحبك او يحركك من مكانك يعني كئنك اصلا ماحذفت فالسياره

التكييف اشتغل اول ماشغلت السياره وماعرفت اطفيه ولاحظة انه بعد فتره انخفض التكييف بعد مابردت السياره من جوه يعني شغل حساسات وتقنيه لقياس درجة حرارة الجو خارجيا وداخليا وتحديد نسبة البروده

التكييف شيئ عجيب غريب (( أحس البرد يجيني من كل مكان )) وكئنه فيه فتحات تكييف في كل مكان

ضغط الار بي ام يوصل للاحمر بكل سهوله اذا شديت على السياره وهذي ملاحظتي عليها غريبه يمكن لهم منها هدف مخلين هالتقنيه كذا !!

الشاص المنيوم واول مره اشوف سياره شاصها المنيوم مدري فيه سيارات ثانيه نفس الشي او لا بس حسب كلام الموظف ان الشاص المنيوم يتحمل الحراره وماياثر فيه ومرونته افضل من الحديد مما يعطي السياره مرونه عاليه جدا

التسارع بالنسبه لي أشوفه كويس على مكينه 1.6

الانوار تلف حسب لفت الدركسون

نظام التحكم بتعليق السياره يدوي او اكتروني حسب وضعية القياده ( تقدر تتحكم في ارتفاعها ونزولها ) ( تقدر تقسي نظام التعليق للاستخدام الرياضي ) ( اكتروني تتحكم السياره حسب الاستخدام ) يعني كل ماتزيد السرعه كل ماتنزل السياره اكثر وكل ماتقل السرعه كل ماترتفع وتقدر تتحكم فيها يدوي لو تبي

الطاره مليانه ازرار مدري كيف نقدر نستخدمها ونسوق والمصيبه الاكبر الازرار فالنص ثابته والطاره تتحرك يعني جبت العيد ونشب اصبعين يوم لفيت الطاره هههههههه لازم الواحد يتعود عليها

فالنهايه يالربع قسم كرهت الفورد والاكسنت وكل سياره قد سقتها وعلى فكره اغلب قطعها نفس قطع البيجو الجديد وراح اعرض لكم بعض اسعار القطع الاستهلاكيه وبصراحه رخيصه بس حنا مدري وشفينا على الياباني والامريكي والكوري

الاديتر 1200
هوبات خلفيه 580
هوبات اماميه 271
فحمات خلفيه 220
فحمات اماميه 250
صافية بنزين 50
فلتر هواء 80
فلتر زيت 40
الصيانه كل 10 الالف كيلو

http://www.youtube.com/watch?v=v2v9npx-15o

http://www.youtube.com/watch?v=JOO5SgeHQpY

http://www.youtube.com/watch?v=ZhwkaGF1j4g

http://www.youtube.com/watch?v=g6Hx2LlJoB0


















إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


سيارة عجيبة بس اش اسم الشركة ياشاقح وبكم اسعار السيارة 
ولك احلى لايك


نبيل علي :


حياك ياخوي بس شلون اتخلى عن الميركوري سياره اعرف لها وافهم فيها صعب اتركها

والسيتروين انا اعجبتني بشكل جنوني لكن مشكلتها راح تضطر انك تسوي صيانتها فالوكاله وانا شخص ماحب اعتمد على الوكاله

السياره كاستخدام وتقنيه لاعلى عليها

لكن اعتماديه لازم الشخص اللي يفكر ياخذها انه يستخدمها ل5 سنوات بعدين يبيعها تشليح ولا السياره استخدامها متعه


علي :

موبس صوت الحزام رواقه حتى صوت الاشاره وقيادتها رواقه والسياره مافيها ذيك القوه لكن فيها اشياء ماراح تجدها فاي سياره ثانيه


فيرو ال اي :

ترى هذي النص فل والدركسون مليان ازرار يبيلك اسوبع عشان تعرف وظائفها والشاشه كل شوي تجيك فيها رسائل وطنطنه ههههههه بس حلوه خرشتها


اليجانت :

جرب السياره وبتشوف عزالله بتكره موترك للابد هههههههه ياخي كل شي فيها غريب عجيب


ابو مريم 1986 :

هذي من وكالة ستروين حسستهم اني بشتريها وقلت ابي اجربها وخلو الهندي يطلع معاي


ابو عوض:

مو بس المقاعد السياره كلها تحفه


عزيز 474 :

هذي اللي تقصدها لون مقاعده بني نوع جديد والله مدري وش اسمها نفس ستروين بس اصدار جديد


ابو احمد عبدالله :

عاد نسيت وكيلها منهو وان ماخاب ضني انه باخشب والشركه اسمها ستروين