أضف سؤال أو موضوع جديد          

قصتي مع احد ورش الفحص في النسيم

up 22 down 3
ابو عزوز8 430
قبل 8 سنه و 5 شهر



بسم الله الرحمن الرحيم

حي الله الجميع

يا اخوان انا صارت لي سالفه وبدون ذكر اسم الورشه والغرض من القصه هي عدم الاستعجال والاعتماد على نفسك بعد الله

اقسم بالله ان ما اكتبه حقيقه ولا مبالغه فيه

السالفة

قدر الله علي قبل فتره وقررت ابيع موتر يعتبر من السيارات الفارهه في السوق

السياره موديلها جديد وممشها لايتعدى ٥٠ الف ومحافظ عليها وملتزم بصيانتها في الوكاله والحمدلله لم تشكو مني اي خلل او عطل خلال استخدامي لها لمدة سنه

قررت ابيعها وعرضتها عن طريق احد المواقع والمعارض حتى اتصل فيني الزبون الصامل والرجل شاف كتيب الصيانه وشاف السياره بنفسه وجربها وقرر يشتريها بدون فحص لانه يقول الكتاب باين من عنوانه لكن انا رفضت واصريت انه يفحصها في اي ورشه ابراء لذمتي مع العلم انه سال في الوكاله وقالوا له السياره ممتازه وقبل من شهر معمول لها صيانه ولاتشكو من اي خلل الحمدلله

المهم توعدنا انا والرجل في مركز الصيانه ومن هنا حسبي الله ونعم الوكيل صارت السالفه

دخلنا السياره وسلمنها للفني وانا جلست في الكرسي وتركت الفني يقوم بواجبه والي يبي السياره جالس يتابع معاهم..

البدي مافي ملاحظات

لكن مابعد البدي هنا بدء الفني يكتب في الاوراق سطر وراء سطر انا مالاحظت او انتبهت لهذا الشي

رحت القي نظره واشوفه كاتب انواع الخربات قلت في نفسي مسكين صاحب السياره كل ذا الخربات فيها>>>ماكنت ادري ان التقرير لسيارتي

وبنفس الوقت الرجال جالس معهم ماكلمته او جلست امدح في السياره لاني لا اعلم الغيب ولا انا مكانيكي على قوله المهندس عشان اعرف وش فيها السياره من خربات

بعد فحص اسفل السياره اخذو السياره للتجربه

من باب الفضول سالت المهندس هاه كيف ؟ قال انشاء الله خير

طبعا انا ماشكيت ولا واحد بالمية بالي راح يصير او توقعته

بعد ماجو من التجربه نزل المشتري من السياره وجاء لمي وقال انت تدري وش فيها السياره!!

قلت لا والله لكن الي انا اعرفه السياره الحمدلله سليمه لا اصوات ولا مشاكل

قال لا الله يسلمك موترك معدوم!!! هنا انا انصدمت وقلت مستحيل قال طلع فيها اكثر من ١٠ خربات وتكلفه تصليح الاشياء ذي تكلف فوق ٣٠ الف!!

انا تقلب وجهي واقسم له بالله ان السياره مافيها ملاحظات وغريب هذا الكلام قال شف الفني

طبعا على طول رحت للفني ومسكته وقلت له وش السالفه قالي يارجل سيارتك معدومه من تحت من اذرعه وجلد وعمود وتهريب وكراسي قير ومكينه وهدروليك وعد واغلط خربات انا مسكته قلت يا ابن الحلال شكلك مضيع موتري هذا قال ايوه قلت لاحول ولاقوة الا بالله يمكن غلطانين

قال وبكل ثقه ياخي نفحص روز وبنتلي ونفهم فيها تتوقع مانفهم في موترك

قلت يمكن في لبس بالسالفه السياره مافيها اصوات كيف تقول القير فيه مشكله وكراسي مكينه واذرعه ومدري ايش

قال كل ذولا الي فحصوها مايفهمون وانت تفهم!!

انا التفت للرجال وقلت هاك فلوس فحصك وحق لك وانا اعتذر منك على الي صار واقسمت له ماكنت اعرف

الرجال طيح من قيمه الموتر فوق٣٠ يقول تكلفه تصليح الاشياء الخربانه

انا رفضت وقلت اصلحها بنفسي والعوض على الله وابيعها بعدين

طبعا رجعت للبيت مهموم ومغبون كيف وانا محافظ عليها طلع كل هذا خربان فيها

والله كرهت ام الموتر في ذاك الوقت وتحسفت كل يوم اهتميت فيه

دخل المنتدى هنا وسالت كيف اعرف الاشياء هذي خربانه وماقصروا الرجال جاوبوني

وكانت اجاباتهم نفس فهمي انه في اصوات او الجلد متقطعه او او

صليت ركعتين ثم

اخذت الجوال ورحت دخلت تحت السياره قلت بشيك على الجلد والمسه والله مافيها ولا قطع او مخش واشوف الاذرعه ماشاء الله نفس الشي

قلت في نفسي بكرا الصباح بروح للوكاله او ورشه متخصصه في موتري

ومن صباح الله خير وانا مسنتر في الورشه واكلم المهندس واقوله افحص لي الموتر من الصدام للصدام

وخليت الموتر عندهم الي اخر العصر مريتهم هاه كيف الموتر قال ممتاز جدااااااااا ونظيف ماشاء الله

انا هنا وجهي قلب وبنفس الوقت شكرت الله على رحمته لي..قلت له اكيد قال اي خذ موترك ورح بس قلت كم الفحص قال ولا ريال لان حرام اخذ منك شي والموتر مافيه شي سالني ليه انت شاك في شي قلت له السالفه الرجال جلس يضحك قالي صادق انت تصدق كلام مجموعه عمال مايدرون وش الفحص قال حدهم سيارات صغيره ويمكن يعرفون لها قالي والله لايغرونك فحص كمبيوتر ومدري ايش قلت له هذا فحصهم وشفه .. اخذ الفحص وجلس يقراه وقل شوي يقول لاحول والاقوة الا بالله قالي اسالك بالله صادقين يوم يعطونك التقرير كذا قلت اي والله وبكل ثقه يقولون انهم صح
المهم تشكرت الرجل وطلعت مع العلم الموتر فحصوه 3 مهندسين عنده وكلامهم واحد الموتر ممتاز

اخذت الموتر ورحت للعضيب في مخرج 13 وعطيته 50 ريال وقلت له افحص الموتر من تحت

نفس الكلام قالي المهندس موترك ممتاز

هنا انا انلحس مخي محلين والاول فيهم متخصص في مثل سيارتي واتفقوا انه ممتاز

كلمت احد الشباب الفاهمين في السيارات قال رح لم البريدي وشف وش يقولك

رحت لهم اول العصر ودخلت الموتر وفحصته من الصدام للصدام وفي الاخير جاء لمي الشايب قالي موترك جديد حرام خساره فلوس الفحص قلت له ياعم والله لو تبي فحص 2000 لا اعطيك مو بس 600 قلت له ياعم انا سالفتي سالفه وقلت له السالفه وشاف التقرير قالي الي كاتب التقرير حرامي نصاب يبون يلعبون عليك ياوليدي ويطيحون الموتر من عينك قلت شلون

قال شف احتمال كبير الرجال الي يبي سيارتك مبخششهم عشان يكتبون كذا او انهم مايفهمون وجالسين يتعلمون او انهم يبونك ترجع لهم ثاني بعدين مع زبون ثاني!!

قلت له الاحتمال الاول ماتوقع الرجال باين انه محترم وولد ناس ولا ظهر منه حركات خبث او بخس في الموتر

اخذت الموتر وانا احمد الله واشكره على الخبر الحلو
3 محلات اتفقوا ان موتري ممتاز ومحل حسبي الله عليهم اختلف عنهم مليون بالميه

الحمدلله بعدها بيوم اتصل زبون ثاني ورحنا فحصنا الموتر في احد المحلات ونفس الكلام طلع الموتر ممتاز وبعته والله يطعم شاريه خيره وشره

وشرايك بالموضوع وايش تحليلكم للقصه؟

الفائده من الموضوع لاتسمع من كلام شخص او محل واحد خذ رائي اكثر من محل وممكن توفر مثلي فوق30 الف او اي مبلغ

اعتذر على الاطالة ولكم خالص تحياتي

ابو عبدالعزيز







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


طيب ليش مارجعت دراهم فحصك من البريدي


up 0 down 0
ahmmad4545
قبل 2 سنه و 8 شهر



ههههههههه يا ابن الاجواد 
مراكز الفحص وعلى رأسهم كار.... 
مهمتهم تعييب السياره  عشان المشتري يجيب اكثر من سياره للفحص 
اما موضوع سياره وحده ويروح خساره
غير كذا تبي اذكرلك بعض الي سجلوها
1- جلب سحب 
2 ضعف في المساعدات
3- تصفيه مكينه
4-تغيير زيت وفلاتر / فورا
5- فحمات هوبات
6- اوساخ على الشاص يتم التنظيف واعاده الفحص عاد هذي فرصتهم للتنحيش الزبون
7 جلود مقصات 
8 ضعف بتعشبق القير بين 3-4 تساله كيف طلع كذا وين الكمبيوتر يقول الخبره براس المعلم الي جبرها يعني مافي تقرير تحاجهم عليها

وبالاخير بعض ضعوف الانفس يعرف المراكز الي تعيب ويتجه لها
عشان يصدمك وتخصم له 




up 0 down 0
ibrahim alsaleh 50
قبل سنه و 4 شهر