أضف سؤال أو موضوع جديد          

قصتي مع موقف السياره

up 36 down 10
ابو يزيد 000 8712
قبل 8 سنه و 11 شهر



السلام عليكم ورحمة الله وبركاته




كيفكم عساكم طيبين 








ابذكر لكم موقف لي من الموقف اللي حصلت لي وان شاء الله تستفيدون منه








السنه اللي راحت سافرنا للشرقيه لانها قريبه من الرياض و نغير جو فيها 




طبعا سافرنا بسياره الوالد وانا مخلي سيارتي بالرياض




ووصلنا بالسلامه الحمد لله و اخذنا شقه طبعا بحدائق الخليج والله ياهي 5 نجوم ما شاء الله والضاهر ب 350 او 400 ريال غرفتين نوم وحمامين ...الخ , اخذناها بشهر 8 مثل هالشهر 




المهم اليوم الثاني كان الوالد مكسر من الطريق و نايم واهلي كلهم صحوا 








و الاهل قالوا يبغوا البحر وقلت أوك ما فيه مشاكل بس جيبوا لي مفتاح سيارة الوالد وابشروا لو تبوني ارجعكم للرياض رجعتكم هههه




وجابولي المفتاح وقلنا للوالد اننا طالعين وقال أذلفوا هههه الله يسعد قلبه طبعا كان يمزح اكيد




المهم
 
رحنا عند البحر و قاعد احوس ادور موقف ما حصلت واشوف موقف على اليمين قدام




بس قدامي سيارتين يا حبيبي 




واقول لاهلي الحين بتشوفوه ماخذ الموقف و يمشى الاول ويترك الموقف وانا استغربت 
المواقف مليانه وترك هالموقف !! 




واقول لاهلي اذا ما اخذه الاول بياخذه الثااااااااني  أصبروا بسس




و يوقف الثاني قدامي 15 ثاني بدون حركه 




قلت لأهلي الحين بيدخل بس شكله غشيم قاعد يشوف الوزنيه ههه




ويمشي ويخلي الموقف !!




أنا الحين منحرج من اهلي , أكثر من أني مستغرب ليش ما اخذوا المحل !




واقول لاهلي عشان الوالده معنا الله اعماهم عن هالموقف وما شافوه ههههه 








و مسوي إني ذيب لإني حصلت موقف من دون ما احوس اكثر من مره




و نزلوا اهلي من السياره و اخذوا البساط والمتاكي و الشاهي و ما بقي لهم الا الحلى والبسكوت 




وقلت خلاص انا بأشتري الحلويات و البسكوت بس انتم شوفولنا محل كويس لان البحر زحمه وقالوا طيب




وجيت عدت بأنزل و اشوف لجوالي مخلص الشاحن فيه و اشبك الشاحن بالجوال واشوفه ما يشحن عشان السياره  طافيه و قلت بأحطه بالدرج , و افتح الدرج و اشوفه مليان اوراق من اوراق الوالد الله يحفظه مدري وش سالفة هالاوراق و الفواتير 




انتم مثلي ولا لا هههههه




المهم واخلي الجوال محل الاكواب و السياره مضلله خفيف و اهل الشرقيه عاقلين ماهم حقين سرقه وعلى البحر يعني محد بيسرق الجوال




و أنزل واقفل السياره ورحت على طول عند العمه اللي تبيع و اقضي لي حلويات و بطاطسات و من هالامور الزينه و اطلع المحفظه وما القى الا 10 ريال وريال مشقوق من النص ههههههه




واتورط واهلي مدري وين راحوا وما معي جوال 




و قلت للعمه اللي تبيع خلني اشوف في السياره يمكن احصل فلوس وقالت طيب 




وانا اذكر ان الوالد دايم يحط فلوس بالدرج ويوم اني رايح للسياره شفت واحد يطالع السياره وراح و انا استغربت 




المهم دخلت بالسياره وافتح الدرج واحصل الحمد لله فلوس و علوك وفـواتـيـر ههههه 




واخذ الفلوس واسكر السياره واروح احاسب واخذ الاغراض واطالع الا والرجال رجع يطالع سيارتي !!




وقلت خلني اقعد اراقبه لإن الجوال بالسياره وقلت اكيد بيسرقه لكن وين يسرقه وانا هنا ( مسوي إني ذيب )




وقعد يطالع وراح




وقلت يا رجال ما بأقعد انتظره لين ما يسرقه بأخذ الجوال ورحت للسياره و دخلت جوا وقفلت الباب و اخذت الجوال وقاعد ادور شيء قلت يمكن يطالع شنطه اهلي ولا جوال احد اخواني و اقعد اناقز برقبتي وادّور ورا بالمراتب وانا ماغط جسمي على ورا 




الا وشوي اسمع صوت طق طق بقوه




وارجع لوضعيتي في ثانيه من الخخرعه ههههه




الا والرجال اللي قاعد يشوف سيارتي قبل شوي  يدق الشباك




واشغل السويتش و افتح الشباك ويقول السلام عليكم




قلت وعليكم السلام  ,, تفضل حبيبي




قال معليش خوفتك قبل شوي 




وانا ما اضحك و مسوي شديد وقلت لا اصلاً ما خفت وانا انتفض من الخرعه هههه ( احسبه حرامي )




وقالي عندي أخوي معاق بالسياره و انت موقف سيارتك بمواقف المعاقين 




و انقلب دماغي 360 درجه واقوله بالله صادق




قال ايه وهذي اللوحه شوفها




واطالع اللوحه مثل كبر راسي ,,,, لكن انا اللي انعميت ماهم السيارات اللي كانت قدامي وما اخذت الموقف




واقوله أعذرني حبيبي والله ما دريت يشهد الله و انا مو من اهل الشرقيه عشان كذا ما اجي دايم للبحر وما دريت ان هالموقف للمعاقين وقال لا عادي والله يحيك بالشرقيه 




وانا منحرج منه ومن اخلاقه و قلت الله يسلمك , وقال يالله ما اطول عليك وقلت يالله انا الحين بأطلع السياره وقال جزاك الله خير




واطلع السياره  واشوفه يطلع اخوه من السياره والله انه مسكين ويكسر الخاطر عمره 19 سنه تقريبا 
قريب جدا من عمري المسكين




و خليت سيارتي شغاله بنص الطريق ونزلت اساعده




وقال ما يحتاج الله يجزاك خير 




وقلت يا رجال الا واجب علي , كفايه ماخذ محله 




ونطلعه ونركبه على بالعربيه حقته 




و اشوفه مسكين يشكرني و يدعي لي واشوفه محروم من المشي وهو مثلي بالعمر وما يقدر يمارس حياته الطبيعه وكل الناس تطالعه بإستغراب




وانا صراحه ما قدرت اتحمل الموقف و سلمت على راسه وقلت سامحني حبيبي والدمعه تنزل من عيني




ورجعت للسياره و الدموع تهرب من على خدودي و اشوف الطريق مويه قدامي من الدموع اللي بعيني واحرك السياره و ادور موقف واوقفها فيه








و هذي هي القصه فاللي أبغاه منكم قبل لا توقفون بالموقف خصوصا لو انه على رصيف البحر او السوق ان تتأكد من انه موقف للسياره وما هو للمعاقين




ووالله لو إنك وقفت بمحل المعاقين وانت تدري ودعا عليك بأنك تسير مثله معاق يمكن تسير مثله 




واصلاً حرام عليك والله أنهم يكسرون الخاطر الله يشافيهم ويعافيهم قولوا امين




تخيل ان الله منعم عليك بالصحه وما فيك اعاقه وتوقف محلهم وانت تدري ان هالموقف للمعاقين , 




ترا يمكن الله سبحانه يبتليك في نفسك او في عيالك او قريب لك




تخيل عندك رجول بس ما تقدر تحركها و ما تقدر تدخل الحمام وما تقدر تحك جلدك وما تقدر تصلي طبيعي وتلعب مع الناس وما تقدر تمارس حياتك الطبيعه  , حط نفسك في هالموقف والله لتموت قهر و حزن




وبلدنا ما شاء الله مخلي المعاق مثل الانسان اللي بصحته وعافيته ومهيء له كل شيء 




والمواطنين اللي يقعدون يطالعون المعاق كأنه كائن غريب . ياخي خلو الولد بحاله وش فيكم أنتم , ليش تحسسوه بأنه مخلوق غريب ؟؟ جبتوا له المرض النفسي 




  تراه ما يقعد بالبيت الا بسببكم و بسبب تعقيدكم له و أنتوا تطالعونه بأستغراب , طالعوه كأنه انسان عادي مدام معه عربيه أعتبروه مثلكم يا ناس




لكن ما اقول غير




 حسبي الله على كل وزراه ما هي مهيئة اماكن للمعاقين للدخول للمحلات و الاسواق وما تحط لهم اماكن ترفيهيه و العاب تخصهم








تراهم بشر مثلي مثلك يحسون ويطفشون وودهم يتمشوا ونص المحلات مافيها اماكن للمعاقين ويبغون يلعبون مثلنا 




كفايه أنهم محرومين من اشياء كبيره و كثيره و إحنا ما نحس فيهم




والله نادر جدا جدا احصل معاق بالسوق او على البحر من العيشه اللي مهيئها بلدنا لهم والله معيشهم مثل الحيوانات 




حتى التكاسي ماهي مهيئه لهم !!




وتكرمون والله و والله انكم على راسي قبل اللي صحته تمام , الله يسعدكم ويشافيكم ويصبركم








لكن حسبي الله عليهم حسبي الله عليهم حسبي الله عليهم , وزاره بأسم ولكن بدون فعل , هذي دوله لها ميزانيات و اول دوله عندها احتياطي نفط و باقي ما سويتوا شيء للمعاقين 












و هذا قصتي و الله يشافي كل معاق و يصبره على الابتلاء و إن شاء الله أن كل يوم له اجر على تحمله لها الابتلاء و لا يقنط من رحمة الله و له اجر كبير بأذن الله إذا تحمل هذا البلاء


و أهم شيء تكونوا أستفدتوا من هالموضوع لان هدفي من هالموضوع الفائده

إذا اعجبك الموضوع عطني لايك إذا ما عجبك عطني ديس لايك

تحياتي لكم : أبو يزيد








http://www.youtube.com/watch?feature=player_detailpage&v=isog4ZJhiT0



















إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


الله يبيض وجهك فعلن المعاقين لهم حق بهالبلد زيهم زي غيرهم والله كثير الي اشوفهه يوقف بالباركينج حقهم الله يسامح الجميع


up 5 down 1
lolo-ss 4513
قبل 8 سنه و 11 شهر



الله يجمل حالك والمتابع وأسئل الله العلي الكريم ان يشافي كل مريض مسلم يشهد ان لا اله الله ويقضي الدين عن المدينين ويفرج هم المهمومين انه ولي ذلك والقادرعليه ولك احلى لا يك لان الجميل ماله الا رد الجميل


up 4 down 0
أمر المؤمن كله خير 87
قبل 8 سنه و 11 شهر



ماشفت مولات الرياض أخوي أبو يزيد ,

والله أن الناس يتسابقون على مواقف المعاقين لكن عندك ناس مافيها ثقافه أبد


up 4 down 0
hmada1213 2018
قبل 8 سنه و 11 شهر



المشكله حتى عند بعض المساجد المعاقين يتبهذلون مساكين بسبب الي يوقف ويسد الطريق المخصص لكرسي المعاق
مره شفت مقعد يبي يدخل المسجد ما قدر عشان واحد واقف ومسكر الدخله عشان يلحق على الصلاة 
جو ناس وشالوه بكرسية مع الدرج ودخلوه 

الممارسات السلبية تجاه المعاقين مب بالمواقف بس حتى في طريقهم ومسلكهم واحتياجاتهم المخصصه لهم يعانون فيها


up 2 down 0
naac 2 2722
قبل 8 سنه و 11 شهر



جزاك الله خير واهم شيء المساجد وزارة الأوقاف للأسف لا تهتم بهذا مدري هل المعاق من كوكب اخر ..!!


up 2 down 0
كبار الشخصيات -18
قبل 8 سنه و 11 شهر



تسلم اخوي يزيد وموضوعك مهم واتمنى يكون فيه دور للمرور في موضوع المواقف ولو توقف محل معاق يصكك بقسيمه بــ 1000 ريال علشان الواحد يقدر هؤلاء المعاقين
واتمنى من المولات والمستشفيات ان تكون مواقف المعاقين مقفله بسلسله والمفتاح يكون مع السيكورتي حق الامن شف عندك الدول الغربيه مع انهم كفار لكن اخذوا من الاسلام احترام القوانين واحترام حقوق المعاقين ما تلاقي احد يوقف في محل معاق وعندنا بالمضاربه الا يوقف قدام الباب ووده يوقف داخل المول او المستشفى
والله مره لقيت واحد موقف محل الاسعاف عند باب الطواريء وليت عنده حاله طارئه الاخ رايح الصيدلية يصرف علاج
ولايك على موضوعك واخلاقك العاليه


up 3 down 0
ابوخلوودي1 5070
قبل 8 سنه و 11 شهر



بيض الله وجهك وونعم فيك .. ولك لايك


up 2 down 0
1976 227
قبل 8 سنه و 11 شهر



أبو يزيد أشكرك فعلاً على هالموضوع الحسًاس و المُهم !!!!!!!!! بصراحة اخواننا (المُعاقين جسدياً) يعانون من أصحاب الإعاقات

العقلية للأسف !!!!!!! قبل فترة شفت مقطع لشخص معاق جاء يشتكي عند (الأمن) حق المواقف يقول في (مُقدم) ماخذ موقفه المهم

و يجي (العسكري) بكل فظاظة و قلة ذوق !!!!!! يقول وين بطاقتك ؟ جب بطاقتك و يرفع صوته على المسكين !!! اللحين الجهة

الخدمية مخصصة مواقف قريبة للمعاقين عشان تخفف من معاناتهم و تجي أنت بكل وقاحة و بكل بلادة تاخذ مكانه ليه ؟؟؟؟؟

ربي أنعم عليك بالصحة و العافية تروح تحط عينك على موقف مخصص لشخص يعاني و يتعب من كثرة الحركة ؟؟؟؟ عشان

حضرة جنابك متكاسل تمشي خطوتين ؟؟؟ والله شي مؤسف , واحد من الشباب هنا في المنتدى ذكر في تعليق له أو موضوع ماني

ذاكر يقول برا في الدول المتقدمة في إمتيازات لأصحاب الإعاقة يحسدونهم عليها اللي بعافيتهم منها على سبيل المثال:

1_ إستثناءات في التوظيف .

2_ خصومات من المحلات التجارية .

3_ مبالغ مالية تساهم في تخفيف كثرة المصاريف.

4_إستثناءات في تخليص المعاملات لإراحتهم و عدم زيادة العناء عليهم .

و حنا يا جماعة موقف سيارة و حاسدينهم عليه !!!!!!! تحياتي لك أبو يزيد و لك لايك .


up 2 down 0



ابو يزيد انشهد انك نشمي واصيل وفيك شيمه ودندون وكفو ,,,

وكثر الله من امثالك ...

ومثل ماذكرت المشكله عندنا عدم وعي باحترام حقوق المعاقين ,,,

انا عندي اثنين من اخواني معاقين ع كراسي متحركه بسبب الشيارات والنتيجه شلل رباعي ,,

لكن الحمد لله ع كل حال ,,

واكبر مشكله يعاني منها المعاق هي نظرة المجتمع له بنظرة شفقه ورحمه وهي النظره بالنسبه للمعاق مثل الخنجر في صدره ,,,

لانه يبي الناس تعامله بشكل طبيعي ...

الي درجة انهم مايحبون يطلعون برا البيت بسبب نظرة الشفقه ,,واغلب الناس يجلس يطالع فالمعاق كانه نازل من الفضاء ..

اذا كنت تحترم المعاق انظر له كانه انسان عادي ولاتقط وجهك ,,,

اغلب دول الخارج تجد مزلقان يعني طلعه مثل المنحدر عشان الكرسي المتحرك يستطيع الصعود والنزول من كل الاسواق ومن أي جهه حكوميه ,,,

لكن عندنا اغلب الاماكن لازم اثنين او 3 يشلون الكرسي ...


up 2 down 0
meezar 221
قبل 8 سنه و 11 شهر



الله يعطيك الف الف الف عافيه 

على مواضيعك الرائعه 




up 0 down 0
abo3tb 511 1737
قبل 8 سنه و 11 شهر



اخوي ابو يزيد انا بالغلط عطيتك ديس لايك 

كنت بعطيك لايك جيت بعدلها قلي لا يمكن تقييم عضو معين 

العذر و السموحه اخوي ابويزيد 


up 1 down 0
abo3tb 511 1737
قبل 8 سنه و 11 شهر



المقطع مؤثر جداا


up 1 down 0
mohammed shareef 1094
قبل 8 سنه و 11 شهر



ماشاءالله قصتك طويلة تعبت وانا اقراها
الله يحفظك ويكثر من امثالك 
هذا التعامل ولابلاش


up 0 down 0
ابو عبدالله احمد 3530
قبل 8 سنه و 11 شهر



وفقك الله لما يحب ويرضاء واشهد انك كفو ونشمي 

والناس مشكلتهم العجز والا وش بيضره لو مشى خطوتين احسن من انه يوقف في مواقف المعاقين لاحول ولا قوة الا بالله شعب عجاز لابعد حد هههههههههه الله يعين بس 

مشكور اخوي ابو يزيد ولا هنت 


up 1 down 0
camry grandi 99 7274
قبل 8 سنه و 11 شهر



سبحان الله
بعض المواقف تعلم الانسان
قصة جميلة و موعظة لنا 
لك احلى لايك



up 0 down 0
Yaser1 669
قبل 8 سنه و 11 شهر



والله بكيت على المقطع 

دعواتكم له تراه توفي 

الله يرحمه ويسكنه فسيح جنآته و إن شاء الله يدخل الجنه بدون حسآب ولا عذاب


up 0 down 0
ابوخالد1397 2893
قبل 8 سنه و 11 شهر



تسلم ياا بو يزيد على اهذاا الموضوع ياليت كل الناس مثلك كانه الدنيا بخير


up 0 down 0
حراج العجمي -8
قبل 8 سنه و 11 شهر



فيه صورة وضعتها لا اعتقد انها بالسعودية لان عندنا قليل ما يقدمون خدمات للمعاقين فالصورة اخاف احد يقول بالسعودية وانصح ببرنامج احمدالشقيري عشان تشوف الخدمات وكيف الناس تقدر الخدمات الحكومية بالخارج احنا ينقصنا مسؤل فيه شوي خير
معقول موقف واحد لمعاق على ان طول شريط البحر بالكيلوات بس حظ راعين الشبوك


up 0 down 0
ابو الجمس -2
قبل 8 سنه و 9 شهر