درس وتعلمته وحبيت انكم تستفيدون

27 4

لايمكنك التصويت حتى الحصول على 20 نقطة على الأقل
إضغط هنا للإخفاء

أبو ناصــر 1282
قبل 11 سنه و 5 شهر

اللهم بلغنا رمضان واجعلنا من المعتوقين من النار يارب العالمين


الزملاء الكرام ,, السلام عليكم ورحمة الله وبركاته

قبل فترة نزلت موضوع بخصوص اني استأجرت اكسنت 2013 لواحد من عيال العم وخبط بها وسحب علي وكنت متدهور فيها والحمد لله اني اخذت درس ما انساه طول حياتي ...

بشرح لكم اللي صار على شكل نقاط لكي اختصر الموضوع واسرع وصول المعلومة وكذلك راح ابين التكاليف ...

1- سحبت السيارة من الديرة الى الرياض بـ 900 ريال .

2- نزلتها الساعة الثانية ظهراً عند الميكانيكي واعرفة من ست سنوات والرجال امين جداً وهو يماني ورجل بمعنى الكلمة .. وقال لي مرني بكرة او انا اتصل عليك واقول وش فيها . علماً اني سحبت العيار وحصلته خالط الموية مع الزيت وطالع الزيت لونه حليبي

3- الساعة 10 مساءً اتصل علي وقال الراس فيه شرخ والباقي مرني بكرة اعلمك .. طبعاً انا علمته انها سيارة ايجار ومابي احط بذمتي شي وكذلك السيارة ايجارها يمشي ومابي خساير زيادة .

4- اليوم التالي بالصباح مريته ولقيته راس المكينة مفكوك ومنزل بالارض .. قابلته وقلت له كم يكلف التوضيب قال ومن يقولك توضيب قال الموتر صحيح خالط الموية والزيت بس مو شرط يحتاج توضيب قلت ليش ؟؟! قال لي اذا كان الشمبر سليم والبستم مافيه فضاوة ليش اوضبها قلت له والحل .. قال نخرط الراس ونركب طقم وجيه بلوف جديد وخلاص ان شاء الله مافيها شي ..

5- اشتريت طقم وجيه بـ 210 ريال ومعجون اصلي 60 ريال + خرط الراس 300 ريال + موية اديتر وموية مقطرة 15 ريال + زيت غسيل المكينة 30 ريال + زيت وسيفون 90 ريال + شغل يد 1000 ريال ..

6- نزلت الاغراض عنده ومشيت قال الليله اتصل عليك قلت اوك .. بعد المغرب اتصل علي قال تعال خذ السيارة شيكت عليها ومافيها شي ان شاء الله قلت خلاص بكرة امرك اخذها ..

7- رحت للدوام الصباح ووقعت وطلعت للسيارة ولقيتها شغاله واحلى مايكون طلعت من الورشة ورحت وغسلتها بستم وعطرتها ووديتها مكتب الايجار بسلمها وهنا المصيبة ..

8- اول ماوصلت ودخلت المكتب وقلت بسلم السيارة طلع لي ثلاث مصريين وهجموا على السيارة هجمت اسد على الفريسة وكل واحد يدقق من جهه وكل واحد يطلع عيب وانا على اعصابي ,, طلعوا على السيارة يفحصونها وكل واحد يجيب لي عيب ..

9- المختصر ان حسنين يقول عزم السيارة طايح وابو سارة يقول المكيف مايبرد والزفت الثالث يقول الجنوط فيها شدوخ وانا خايف من سالفة المكينة وماعلمتهم بها .. بعدين جابوا لي مصيبة وهي ان السيارة مفحط بها والكفر محبل والجنوط مطعوجة والمساعدات مضروبة ومن هالكلام وصارت هوشة بيني وبينهم واني مستلم السيارة كذا ...

10- صادف وقت هوشتنا ان صاحب المكتب حضر وبعد اخذ وعطا بالكلام صارت التسوية 1000 ريال قيمة الاضرار واخذت ورقة مخالصة منهم وارتحت والحمد لله ..

11- الحيوان اللي استأجرت له السيارة وطلع للديرة يقول لي اخوي مافيه ولا مطب ما اكله وانواع سحب الجلنطات وطالع عليها لعزبة واحد من الجماعه 13 كيلو صحراء طريق ردمية يعني مطانيج ومطبات .. وللأمانه يوم شفت السيارة لقيتها بحالة يرثها لها ... علماً اني مشتري له سيارة على انه بيسددني وخربها ماكملت اربع اشهر ولها كم شهر بالورشة ساحب عليها وفلوسي يقول بع السيارة واخذ فلوسك منها ..

مختصر الموضوع في نقطتين :

الأولى : لاتكفل احد مهما كان ولا تستأجر له لو يموت ولا تسلفة لو ينسجن الا شخص واثق منه وتعرفه عز المعرفة ..

الثانية : هالنقطة اللي استفدت منها مررره وهي ان مو كل ماخلط الموية والزيت صار تخبيط او المكينة تحتاج توضيب هناك عدة عوامل لابد التأكد منها مثل حالة الشمبر وكذلك الفضاوة بالبستم .. لان على كلام الميكانكي ان الاغلبية من الورش الا مارحم ربي او مايشوف هالحالة يقول توضيب على طول ومايكلف نفسه يفتح الراس ويشوف وانتم شبابكم من الناس اللي يمشي ويدفع وماعنده مشكلة ..

اسأل الله العلي العظيم ان لايريكم مكروه ولا يحطكم بالموقف اللي انا مريت به وان يرزقكم من واسع فضلة ..

ليلة سعيدة اتمناها لكم ..

إبلاغ

الردود