وسع صدرنا وخذ أجرنا

السلام عليكم .. فكرة رائعة منك يا ابو ناجي

حصل معي موقف مع مكسيما 2001 اخذتها من الحراج وكانت تقطع في اول القومة ... انا بصراحة استصغرت الخراب واشتريتها وضلت معي اسبوع وقررت اصلحها .. بدأت بتغيير الكويلات مثل ما قال راعيها وغيرت من التشاليح (لان الجديد غالي حق المكسيما 190 الواحد وهم 6) وركبتهم ومافي فايدة !
وغيرت لها بواجي بـ 270 ولا في فايدة !
وديتها فحص كمبيوتر قال injection failed (قصده كويلات)
وقال لي غير كويلات مرة ثانية وقالت طيب وغيرت جدد ..

لكن ايضا بدون فايدة !

واضطريت ابيع السيارة بدون ما اصلح هذا الخراب لاني ما قدرت اعرفه ..
-- لذلك كن حذر من استصغار بعض الخرابات خصوص الكهربائية --

انا معك يا اخ مروان انا اشتريت كابريس اس اس وقبل ما اقلبه باسمي فجاه تضعف البطارية ويطفي وقلت ما عليش يمكن برمجه وبعدها طلع من الدينمو وجننتني الدينمو الاصلي ب 2000 ريال وتالي بعتها بخراباتها

أخ اسكندر .. اعتقد انه يجب عدم شراء اي سيارة تعاني من اعطال كهربائية ..
لان العيوب الميكانيكية يمكن تحديد مكان العطل اما الكهربائية فحيانا تكلفك مبالغ دون نتيجة

ما رأيك؟

شريت فورد 2000 من شريطي بس لعب علي ... طلع حاط فالدفرنس معالج احتكاك لان الدفرنس كان يطلع صوت ... بعد فتره بداء يطلع صوت حنه فالدفرنس قلت بغير الزيت .. يوم نزلت زيت الدفرنس لقيته الزيت ثقييييييييييييييل مره ومعاه نجارة خشب طبعا الحكره هذي يحطونها لاسكات صوت الكرونه فالدفرنس عشان وقت البيع محد يعرف خراب الدفرنس ... غيرت الدفرنس كامل تشليح جلس معي سنيت بدون اي مشاكل وبعته .... بعدها عرفت انه خراب الدفرنس مايطلع بالفحص اذا كانو حاطين معالج احتكاك او شي فالدفرنس .... وهذي الحركه يستخدمونه الشريطيه وقت مايبيعون سياره دفرنسه خربان

صحيح انا بدلت الدينمو بس ما استفدت وبعدين الي يقول التماس والي يقول برمجه والي يقول حساس الدينمو وانا ضعت وخسرت كثير وبعدها قلت الله يلعن الهولدن لعنه يهود كلا مخسرينا

أشترينا جمس للعائله مستعمل وبعد فتره قررنا نغسله من الداخل لان فيه ريحه وبدينا نفكك المقاعد وحصلنا تحت مقعدة الراكب ظرف مقفله يوم فتحناه حصلنا أقامه سواق ومعها ٢٠٠٠ ريال  وماصدقنا فله وخلينا غسيل السياره لليوم بعده وبعدها فكينا جميع المقاعده     والمفاجأه  حصلنا  قلاده  ذهب تحت مقاعد الصف الثاني وبعدها قاموا العائله كلهم يدورن في سياره الكنوز والسياره كانت مع ناس مضيعه كلش من الشرايح الجوال لحد الريالات لحد الكحل والمكياج وجلسنا أسبوع وحنا نغسل السياره. 
االواحد يتفقد سيارته قبل لايبعها خصوصاً إذا كان للعائله 

شباب إلى يريد نغسل سيارته يجي ترى الغسيل مجاناً ( بس المهم يكون عنده خير). 

بالنسبة لي يا إخوان
الموقف اللي ما أنساه وندماااان عليه كثير

في سن المتوسط وفي بداية تعليمي للسواقة وتعرف العمر ذا عمر هياط
أخذت سيارة أخوي وهو نايم الفجر وطلعت أفرفر فيها
وصارلي حادث قوي
صدمت واحد مسكييين مع زوجته
والمشكلة إني انحشت من الخوف
ورجعت من طريق ثاني
وتفاجأت إن نفس الرجال يطلعلي
ومع الخوف والحوسة صدمته مرة ثانية
وراحت السيارتين فيها وانعدمت الوجهية
وبسبب سوء فعلي تأخر زواج أخوي سنة
مسكين دفع كل اللي كان يجمعة في تصليح السيارات
ووالله إلى اليوم والسالفة لها قرابة 10 سنوات أستحي أحط عيني بعينة

ابو ناجي ههههههههههههه الله يضحك سنك صدمت الضعيف مرتين هههه وانا صار معي موقف قريب من موقفك بس في سن اصغر وانا عمري 11سنة يوم جمعه الصباح العالم نايمه صحيت زي الجني وانا اصلاً مخطط لي اسبوع على سرقة سيارة الوالد وانا اتابع حركات الوالد كيف يسوق السيارة وكيف يعشق ويرفع رجله شوي شوي عن الكلاتش المهم تسجلت المعلومات في رأسي واجيك واخذ المفتاح واشغل الموتر لا وبعد اسخن السيارة واذكر حتى اني اخذت لي غفوه لين سخنت السياره ههههههه اقسم بالله واتوكل على الله بنفس الخطوات الي شفتها من الوالد وانوع الفرفره لين قابلت ذاك الشايب الابن حرام وهو واقف عند بيته شافني ولا ماشافني ويوقف قدام السيارة يقول لي وقف وقف من فين جبت السيارة وانا افقع منه ويطردني بسيارته وانا طبلون من الخوف لين وصلت حارتنا وادخل مع الفه وتزحف السيارة وتصدم في سيارة جيرانا والمشكله ثنتين وانعدمت سياراتهم والي قهرني يوم صدمت دز ملعون الوالدين وانا قعت بها وفقعه على البيت واصحي الشايب واقله والله لا يوريكم والتبقاس والتلطيم والدعس الي جاء ماانساه في حياتي ومشكور حبيبي على المضوع الجميل تسلم واحلى لايك لموضوعك.

طال عمرك كنت بالظهر طالع من المدرسه وكان معي الدمعه اول ما نزل جديييييد المهم كنت محمل فيه لعبه وقاعد العب مادريت الا موتري ناصي الماصورة واخبط فيها مع الخبطه انا كنت منزل راسي صقع خشمي ووجهي بالدركسون مع الربشه قمت اسب الله يلعن امه منهو منهو والشارع بالظهر مابه الا انا وانزل واشوف القشعه جامده دريت ان الوالد الله يرحمه بيجيب فيني العيد ركبت السياره سويت نفسي مغمي علي لاني جاء عرفني وداني المستشفى ودق على ابوي يوم جاني المستشفى اتمريض واقوله يبه وش صار بالسياره فيه واحد حدني وانحاش وهو يقول ماعليك ماعليك تدوره الشرطه هههههههههههههههههههههههههههههه 

lol هههههههههههههههههههههه الله يسعدك والله اني ضحكت من قلب اجل يلعن امه وينه وينه هههههههههه

انا طال عمرك كان معي اثنين من الشباب والسواق متهور شوي واحنا نازلين من منحدر وفيه قدامنا منعطف يمين قوي شوي
والسواق داعس شوي وسع اللفة وقابلتنا سيارة واحد شايب وصدمناه الجنب اليمين من سيارتنا في الجنب الايسر من سيارة الشايب
وانحشنا هههههه المهم مع الخوف دخلنا طريق مغلق يعني ماينفذ هههههههه وشوي الا الشايب قفل علينا من ورى بالموتر حقه
هههههههههههه انا من الخجل مانزلت من السيارة والسواق اللي معنا نزل يبي يصرف الموضوع ويقول الحمد لله على السلامة
ههههههههههه والله لو اني من الشايب لا اموسل جلده بالعقال هههههههه

مشكور ابو ناجي على هالموضوع الرائع .... اتذكر زمااااان كنت في رابع ابتدائي وكنت طالع انا والشايب واخواني للبر عند الحلال كنا نطلع له كل خميس وجمعه ... المهم كان اخوي يعلمني السواقه في الصباح وكانت هذي اول مره يعلمني فيها السواقه بعد ما نشف ريقي وانا اطلب الشايب يعلمني السواقه وكان رده اذا اخذت الابتدائية .. المهم بعد محاولات كثيرة وافق وقال لاخوي علمه ... علمني الصباح على السواقه لمدة نص ساعة 25 دقيقة منها كانت تصفيق وكفوف وخمس دقايق سواقه المهم اخذت الاساسيات وعرفت اقوم السيارة بس لازم تنتع مره مرتين حتى تمشي ..... عرفت الاساسيات وقال اصفط على جنب بكرة بكمل تعليمك ... راح اليوم وجا وقت العشا تعشينا ونام الشايب واخواني انتظرت حتى تأكدت انهم ناموا ......... قمت وشغلت السيارة ومشيت وقلت خلني الف الف بعيد شوي عنهم عشان ما يقومون على صوت السيارة ... المهم دقيت سلف ومشيت ورحت وهي الروحه ضيعت في البر حاولت حاولت ارجع ما عرفت بالليل ومافيه قمره ولا فيه ضوء عند الحلال ارجع عليه ... لفيت لفيت لفيت لفيت حتى عجزت وش اسوي عز الله اكلنا هوا .. طبعاً اللي زاد الخوف عندي في راسي افكار عن الجن وبعض الخرافات اللي كنا نسمعها وحنا صغار جلست افكر وش اسوي ... قلت ما لها الا اعلق على البوري حتى يسمعوني ويجون المهم جلست اعلق على البوري طييييييييييييييط طووط طيييييييييييييييييييييييييط يمكن ربع ساعة او اكثر شوي الا اشوف واحد يأشر لي بولاعة من بعيد يكبس لي بشرار الولاعة انا شفت الضوء وتوجهت عليه متأكد ميه بالمية انه الشايب وصلت للمكان اللي يجني منه الضوء طلع ما هو مراحنا ... لا حول وش هالمصيبة ... طلع اللي يأشر لي راعي سوداني انا شفته وضاقت فيني الوسيعة لاحول وش اسوي قلت يا ولد حط رجلك لا توقف وفعلاً ما وقفت وكملت يمين يسار قلت لو اوقف يمكن يلحقني المهم مشيت مسافة بعيدة وقفت بعد ما تأكدت ان مافي احد وراي وسكرت السيارة وقلت لازم بحط راسي للصباح وربك يعين طبعاً طول الفترة هذي وانا ضايع كنت في موقف لا احسد عليه خايف جداً جداً بحكم اني صغير في السن

المهم اخذت لي غفوة واقوم على صوت دق الدريشة قمت الدنيا مظلمة ما اشوف اللي يدق واسمع صوت يقول افتح يا ولد انا وقتها ما اميز بالصوت من الخوف كل اللي في راسي ان اللي يدق الراعي السوداني قلت لحقني وهذا هو وصل نقزت وشغلت السيارة اول ما اشتغلت السيارة زاد الطق على الدريش وانا احاول اقوم السيارة ومن الخوف ما عرفت تنتع وتطفي تنتع وتطفي ... هو قال يا سعد انا وقتها قلت بس هذا يعرفني وقفت وثبت الصوت طلع اخوي

فتحت الباب وكأني فتح باب من ابواب الجنة من الفرحة بس الفرحة ما اكتملت يا هي جتني بقوس وكفوف ورفس وتسحيب ومرمطة بس الحمد لله ان هالليلة راحت بخيرها وشرها ... طبعاً السوداني اللي كان يأشر لي عرف السيارة بعد ما هجيت وقال اكيد فيه شيء وهالراعي يعرف رعيانا على طول توجه لهم بعد ما هجيت قال اكيد فيه شيء وكان قريب منا ما هو بعيد راح وقال لهم الموضوع والحقوا وراي حتى لقوني .... ادري اني طولت عليكم بس مشكور يا ابو ناجي على تقليب المواجع خخخخخخخخخخخخخخخخخخ

طال عمركم مره صارلي موقف ماانساه ماحييت..... 

اخوي كان معه ماركيز 2002 المهم وانا طبيعتي افحص الموتر كل فتره له هو رجال غير مهتم بصيانه يعني من محل لمحل ويسوق بهدوء ...

المهم ويوم زواجه كان عام 2005 وقتها هالمديل يعتبر جديد 2002 المهم يوم زواج قررنا نزفه على الموتر حقه والله ياطويلين العمر قالي رح افحص الموتر وغسله وظبطه خله يلق لق 

قلت ابشر ..

واروح واغسل وافركه لين خليته يلق لق ويوم جاء صلاة العشاء وصلينا ... ونبدا ونركب وندخل الزفه ونزف وهياص وفله "ولد خالي السواق"..

يوم دريت الا الموكب وقف ياهو وراهم!!!!! وناخذ 10 دقايق والا والله الموكب وقف جنا كنا قدامهم... ورجعنا !!!!!!

هع هع هع يوم جينا وشفيكم يالربع قال اخوي اوريك مقلبني هاه قلت اعوذ بالله من الشيطان الرجيم انا مقلبك لا والله مامقلبتك قال وراك ماعبيت بنزين؟؟
 
قلت لاتقوله.. منقطعين بنزين نسيت اعبيه ههههههههههههههههههههههه

 والي ساق ولد خالي من العجله مانتبه لعداد البنزين >> مسوي كشخه ويوسق وقتها في تصوير فيديو هع هع

هع واتوقعت اني بنجلد جلد يشهد له التاريخ .....وفشلت اخوي ذاك اليوم ونزل من موتره وحاس....

 والمصيبه الحركه تعطلت فجائه تعلطت وتشربكت السيارات ببعض>> من قرادت حظي..

 وجاء المرور واخذ اثباتات الي يزفون وقال انتم مسوين ازعاج وراجعونا بالقسم عقب الزواج..

واخوي حالته حاله وانا اناظر مثل الي يقول في تعابيره وجهه "انا ماسويت شي نسيت ياشباب نسيت"

 هع هع

ورجعنا للقصر وكملنا الفرح وانتهت ولله الحمد وكمل عرسه وبعد العرس بكم يوم....

 تحصلتلي كم كلمه وعليها كم تبقيسه صغنططوطه من الوالد .... لاني فركت للطايف مع الشباب تفريكه + تصييفه

وسلامتكم الان اول ماركب اناظر العداد ماقد رحت ولاجيت الا اناظره توبه 


"يازين الديزل"

الجنرال الله يستر زواجي بعد كم يوم لاكل المقلب زي أخوك
هههههههه

يابو ناجي تسلم على هالموضوع الروعه

^^
ههههههههههههه زف على سيكل احسن هع هع هههههههه


ياعساااااااااااه مبروك ابو علي ...

 يارب الله يسعدك ويهنيك.......ماشاء الله تبارك الله ......" كثر من التمارين الرياضيه وخلك ذيب "ههههههههه

 امزح الله يسعدك يارب ويوفقك لما يحب ويرضا والف الف الف الف الف مبرووك الله يتمملك بخير

موفق خير

هههههه كافشني
طايح فالتمارين لي كم شهر

والله يبارك فيك وعقبالك إن شاءالله
والمعذرة ابو ناجي شطحنا عن موضوعك ههههههه

اي والله تكفى يابو علي لاتسوي سوات الجنرال خل معك جيك ولاسطل للبنزين هههههههههههههههههههههههههه والف مبروك يابو علي منك المال ومنها العيال والله يرزقكم الذريه الصالحه اي والله خلك ذيب ماوصيك هههههههههههه بالتوفيق للجميع

هههههه اوووما مع الردود
حسيت إني فالزفة الحين تبريكاااااات --> عآآآش جو

يارب ياكريم اتزوجني انا والسامعين. 
تكفوووووون قولو اااااااااااامين