إستغفلونا الصنايعية بزيادة ؟؟
13
1
إضغط هنا للإخفاء
السلام عليكم و رحمة الله و بركاته ,,,
اخواني و حبايبي أسعد الله أوقاتكم بكل خير , قبل كم يوم طفى علي نور (السكان) النور الصغير اللي بالإسطب الأمامي
المهم طالع شكلها غبي شوي !!!! قلت فنفسي خل أشوف أقرب ورشة كهربائية , و أزبطها بسرعة , و أنا عارف بقرارة
نفسي إنها ماهي مُكلفة لا وقتاً ولا مالاً , المهم و ألقى ورشة ع الشارع و أنا ماشي و أوقف عند أخينا في الله (أبو شكيب)
كهربائي سوري , حطيت السيارة عنده و قلت له يزبط نور (السكان) شافها و فحصها و قال خربانة لازم أغيرها !!!!!
قلت ولا يهمك غيرها , المهم 5 دقايق ما تزود ثانية , خلص من السيارة و زبط النور , و أعطيه 15 ريال طبعاً حسيت
إني مكرمه لأن اللمبة الصغيرة ما تسوى أكثر من 5 ريال !!!!! قال لي شو هي ؟ بدي 60 ريال !!!!! قلت له وش دعوة؟
والله لو إنك مغير شمعة بورش (باناميرا) ههههههههههه توكل على الله بس وش سويت عشان تاخذ 60 ؟ قال الإسطب طلع
روحي عشان أطلع منه اللمبة و اللمبة أصلية ب 30 ريال جملة , و أنا ما أخذت عليك غير شغل اليد !!!!! قلت أنا ما راح
أدفع ريال واحد زيادة و اللي تبي تسويه سوه , قال بسيطة حقي راح آخذه من رب العالمين و راح أدعي عليك بالليل !!!!!
المهم أنا متأكد إني ما ظلمته بس ضاق صدري لمًا قال راح أدعي عليك , حسيت إني سارق أهله و أنا ما أدري بس شي
يضيق الصدر من ها(الصنايعية) صاروا ياخذون على أتفه شغلة مبلغ و قدره , و السبب معروف سعودي = فلوس كثير
ما يدرون إنهم أحسن حال من بعض السعوديين !!!!!!!!! عالعموم اللي أبطلع منه بهالقصة إنكم لا تسوون أي شغلة بسيطة
إلا و أنتم متفقين مع الورش عشان ما تصير مشاكل و ممكن أحد يظلم الثاني .
همسة: ( لا تحرمني أخي العزيز من ... إضافة , مشاركة , توجيه)
محبكم &&& أبو طلال
إبلاغ
سيارات للبيع
الردود
صدمني واحد من الخلف ورحت لصناعية العروبه لحقين الفايبر وقلت له بس ابيك تلحم لي نص سانتي القاعدة في زاويه الصدام المهم الشغله ماتستاهل ولا 10 ريال كثيره عليه لانه بيحمي حديده ويلحم نص سانتي القاعدة المهم قالي ب50 قلت مجنون انت قال انا كفيلي يقول لاتطلع بأقل من 50 وانا باخذ حق طلعتي من المحل فقط
لكن شغله مثل هذي ابحث في اليوتيوب فيه مواقع اجنبيه بعد تعلمك بعض الاصلاحات البيسطه مثل تغير شمعه فحمات فلاتر اشياء تقدر عليها والحمد لله على كل حال
0
0
قبل 11 سنه و 5 شهر