تعال افدنا بتجربتك وتقييمك لسيارتك

يسعد صباحكم بكل خير ,, 

السياره : اكسنت 
الموديل : 2011
مميزات السياره : اقتصاديه يعني تعبي ب 18 ريال تجلس معك اسبوع كامل ,, تتحمل الكرف ,, قطع غيارها رخيصه ومتوفره ,, تقدر توقفها بأي مكان لو كنت مستعجل,, مكيفها بارد جدا 
عيوب السياره : وزنها خفيف يعني بالسفر لاتتعدى ال 140 وهذا شيء طبيعي بحكم انها سيارة مدينه ,, المساعدات ضعيفه ماتتحمل مادري هل المشكله في سيارتي بس ولا في كل السيارات ,, 

اما بالنسبه لي فانا استخدمت في الاول
كابريس ٢٠٠٦ 
الاستخدام ٣ سنوات
سلبياته اكل راتبي ما بقى منه شي ٢٤ ساعه مشاكل مع الحراره- طرومبة ماء - مراوح- كهرباء- خراطيش-
لازم اشيك عالسياره قبل اداوم من تحت ليكون فيه زيوت تخر ولا شي!؟ مالها امان.
مميزاتها مواصفات وديكورات وتخشيب وشكل داخلي وهارجي ساااااااااااااااحر بس ع قولتهم الحلو مايكمل.
وطبعاً ما انصح في الكابرس
.............
بعدها اخذت فكتوريا ٢٠٠٦م
مدة الاستخدام ٤ سنوات
سلبياته شكله ممل داخلي وخارجي مع انه محبوب في نفس الوقت من بعض الناس.
ايجابياته كله ايجابيات ماحطيت فيه غير الاستهلاكي موتر ثقه دز فيه وين ماتبي مايغدر بك بتوفيق الله قطع رخيص اي بنقالي يقدر يصلحه لو خرب اصلاً
في النهايه انصح فيه وبقووووووووه لاكن انقطع الموتر وش نسوي
وبس

كابرس 1990

الاستخدام سنتين

خذيته ووووووورده استمر معي 6 شهور جاني عين فيه لان كثير طلبوني اياه لين ماوصل 20 ومابعت

من بعدها سنة ونص وانا كل يوم متعطل بهذلني كل شيء فيه قد خرب بس الحمدلله تيسرت اموري وعطيته خوي

ماعرفت انه عين الا يوم خذاه اخوي وسلك تمنيت اني عطيته من زمان ....

======================================================

هوندا سيفيك 2011

الاستخدام سنة تقريبا

صررررراحه موتر مايعرفه الا اللي جربه وماكنت مقتنع فيه اول ماشفته لكن انجبرت عليه

خذيتها ماشيه 33 الف فقط والحين ماشي 95 الف الفل الاخضر 18 ريال بس احسها تصرف شوي

ولا يمكن عشان اكد عليها في جده ما ادري موتر راسي بالخط ارسى بكثير من الالنترا والكورلا لدرجة ماتتوقعها

عزمها قوي وتتحمل المكدة ,,,

عيوبها : المساحه بين المقعده الخلفية والاماميه ضيقة جدا + القطع شوي غاليه لكن تركب وتنسى + تفصل على 211 في الخط

المرسيدس 560 راحه ورساوه وحق خطوط مشاء الله ,,,



لكزس LS400حق خطوط وحق مكده ويكرف زي الكراسيداء وتحط القطعه وتنساها ,,,,


لكزس GS300 من مديل 98الى 2004 الي أستخدمه الحين وصارله معي تقريبا 3سنوات ما أغير فيه إلى القطع الإستهلاكيه والحمد لله مثل العسل ..

أهلا و سهلا في الجميع .. 

جراند ماركيز موديل 2000 , سياره بمعنى الكلمه , تخدمك وماتقصر معك , وإذا حافظت عليه يعيش معك سنوات كثير .. 

ولكن أهم شي المحافظه والعنايه , الحمدلله ماعمري أشتكيت منه , كل 8 أو 9 شهور أشيك ع السياره من تحت وفوق وأغير اللي يحتاج تغيير .. 

والحمدلله سياره أكثر من رائعه ولا أفكر إني ابيعه أبد , البنزين ماأدري بكم يفلل , لان أول مايوصل النص أعبيه على طووول أحمر طبعا .. 

ـــــــــــــــــــــــــــــ

جراند ماركيز موديل 1991 , سياره خدوومه لدرجه كبيره , وتتحمل أكثر من الفوردات الجديده , عضلاتها قويه ومتينه , وتصلح لشوارعنا .. 

البنزين يصرف على خفيف بحكم إن السياره قديمه , المكيف ماشاء الله تبارك الله بارد , نفس كمبورسر الكرسيدا , وراسي في الخط لدرجه كبيره .. 

ولكن اذا حاص عليك أنسى إنك تدرك الطاره , وهي عشقي من زمان ومازالت عشقي ... 

لكزس ال اس 2002 استعملتها خمس سنوات موتر خط + كشخة + ثقة ولاغيرت الا الاشياء الاستهلاكية وماواجهت اي مشاكل والحمد لله

حالياً معاي لكزس جي اس 2008 460 وامورها تماام والحمد لله

-  نوع السياره والموديل
قراند ماركيز 2008

- مدة الاستخدام
تقريبا 3 سنوات 

- وسلبياتها وايجابياتها
الايجابيات سيارة عملية بمعنى الكلمة انا دوامي بعيد ويوميا خطوط واشيك عليه كل 9 شهور تقريبا من الى القطع رخيصة جدا 
بالمقارنة مع السيارات الحالية 

السلبيات شكلها كلاسيكي وبكل شارع تحصل زي سيارتك وعزل الهوا شوي لك عليه والمقاعد الجلد مزعجة بالنسبة لي غير كذا ماشاء الله 

- هل تنصح فيها او لا 
انصح فيها بشدة بس للأسف قطعوها معاد فيه جديد

بيجو 1986 المميزات اني الوحيد من عيال الحارة معاه سيارة والا هي مافيها لا مكيف ولا مسجل وكنت مبسوط ماتخرب معي طريقة الطرب اني احط الجوال فوق الشماسة واستمتع .. بعدين كرسيدا 1995 ثم كامري 2004 ثم فورد 2006 ثم كامري 1999 وحاليا بدون سيارة كل ماذكرته انصح فيه بشدة مهما تكرفه مايشتكي والمكيف ثلج فيها كلها ماعدا البيجو مالك الا الهباهيب والنسانيس 

1ــ شبح 600 s م98
مدة الستخدام 10 سنوات 

2ــ  اليجابيات ممتازة جدا في الخطوط لطويلة وحقت مجاكره و رساوة و راحة 

3ــ السلبيات تصرف بنزين فقط
ــــــــــــــــــــــــــــــــــــــــــــــــــــــــــــــــــــــــ
بنز 230 E م91  زي الحلوة واحلا مدة 10سنوات
ـــــــــــــــــــــــــــــــــــــــــــــــــــــــــــــــ
هلي 82 رووووووووعة تحس انك راكب اكترس مدة الاستخدام 23 سنة قولو ماشاء الله 
ــــــــــــــــــــــــــــــــــــــــــــــــــــــــــــــــــــــــــــــ
يوكن دنيالي 2010 
و مواصفاته معروفة ومستحيل له سلبيات مدة الاستخدام 4 سنوات  

تاهـو 2011 له معي سن أخذته وهو ماشي 6000 والان 49 الف

المميزات .. فخم .. عزم .. راحة .. عزل .. شكله جميل بمقارنه مع باقي السيارات اللي بحجمه .. دبل يحرث التراب حرث .. إقتصادي .. وسيع .. موتر شبابي وللعائلة .. سيارة عملية للخطوط والمدينة .. والحمد لله رب العالمين سنه كامله ما أحط الا زيت وبنزين ماشاء الله تبارك الله
والحمد لله مالاحظت عليه أي سلبيات سوى أن المروحة صوتها عالي

وموتر كفو أنصح فيه وبقوه

سنة **

ددسن 96 قعد معنا 5 سنوات تقريبا دواه الزراديه حقته :$ موتر ماعليه كلام 

قراند ماركيز 96 وارد البيان 10 سنوات تقريبا ثم قدر الله وانحرق 
وكانت مشكلته بالمقصات والاذرعه كنا نركب تجاري يوم ركبنا الاصلي وكاله اختفت المشكله 

قراند ماركيز 99 حاليا له تقريا 4 سنوات شريناه مستخدم وحالته متوسطه وظبنا قيره وغيرنا الكرمبروسر و الكويلات 

فالنصيحه للي بيشري الامريكي ياتاخذ جديد ولا مستخدم نظيف غيرها بتتعبك 

لنكن  2000  ماشي 200 ألف ميل وش وي أخذتها وكاله السياره ممتازة لأكن من

سنه تقريباً تعبتني واجد أظن أنها عين لان السياره مع موديله إلا انه نظيفه بس السراحه

تحملت واجد لانه أكثر سياره من سياراتي أمسك فيها خطوط
 

موستنق جي تي 2011 ماشي 70 ألف سياره لها معي سنه تقريباً  عزمها حلو 

وراسية مع أني دايم أزر عند الإشارات وما تت عبك واجد 





لكزس جي اس 2013 ماشي 15 الف  وكاله ما احكم عليها وهي جديده
 




هدد 2007 ماشي 120 ألف  ما شفت منه إلا الخير مع أني هلكته بالبر