التجاره في الوطن

يعطيك العافيه يابومحمد .. 

انا معاك ان فيه ناس متسدحة ولكن فيه ناس بعد تبي تشتغل

المشكلة والخلل تدري وين ؟؟!

الخلل انك ماتعرف حقوقك كمواطن .. الشي الثاني مافيه نظام محدد نمشي عليه كل موظف يعطيك قانون او شرط من راسة وعلى حسب النفسية ..

رخص البناء احيانا تكمل سنة عشان تطلع .. رخص المحلات لازم تدفع دم قلبك عشان تطلعها وهي رخصة محل عادية جداً

قبل شهرين تقريباً جاني باكستاني يبي يصحح أوضاعه وقالي عندي بنشر بنتشارك فيه بس اول بنطلع رخصة عشان يكون نظامي وبنقل كفالة وووو الخ

جهزت اوراقي .. عقد الايجار وصورة البطاقة والسجل التجاري وصورة الصحك ولما رحت لهم وابيهم يطلعون يشوفون الموقع على الطبيعه بالقوة طلعوا ومافيه جدولة للمواقع اللي بيطلعون لها وكل شوي بكرة بكرة الين نشبت لهم وطلعوا ,,

خلصنا من المراقبين ورحنا للإداريين والله كل شوي موظف يحط شرط من راسة واحد الشروط اللي قهرتني صورة جوية للموقع !! ياخي خويك طالع للمحل وشايفة وكاتب تقرير ليش تبي صورة جوية وكروكي مكتب هندسي وختوم من المكتب ومصدق من الغرفة التجارية .. بالنهاية اشتريت راحتي ورحت لمعقب له علاقة بالبلدية وعطيته 1500 ريال وثاني يوم جاب لي الرخصة مختومة جاهزه !!!

رحت لمكتب العمل بفتح ملف ولقيت شروط تقهر ومالها اي داعي وشروط هدفها تخسرك فلوس ومن مكتب العمل للتأمينات وهي احسن السيئين والسبب انك سنويا تدفع لهم فلوس ..

تمشي نظامي يندق خشمك تدفع من تحت الطاولة تمشي امورك ومو الكل ..

موظفينا نفسيات ارتاح لك عطاك اللي تبيه وحصل معاك مصلحة والله لتمشي امورك غصب عن مديرة ,, مرة ماحصل وراك مصلحة او شي والله لتبطي

انا بشتغل وكثير من الشباب بيشتغلون ماعندهم مشكلة ولكن عطني نظام صريح نمشي عليه ونصير سمن على عسل وانفذ كل شروطك ولكن كل واحد عنده شرط هذي المشكلة وهي اللي خلت الناس تعزف عن المحلات ..

بالإمارات تطلب رخصتك عن طريق النت خلال اقل من إسبوع توصلك على البريد الخاص بالمنشئة بدون ماتراجع او تسوي شي ماعدا بعض المحلات اللي تحتاج الى تواصل مباشر

اجل محل جديد عشان اطلع عليه رخصة يبيني اجيب له شهادة زكاة ودخل وهو لسه ماحلت علية الزكاة ومصلحة الزكاة والدخل ماراح تقبل الا لما يكمل الترخيص سنه اصلا ماراح تفتح لك ملف الا لما تجيب ترخيص البلدية كيف تبيني اجيب ترخيص والبلدية طالبة الشهادة منك اول ..

اشياء غريبة تحدث لدينا يارجل

يعطيك العافية............لقد اصبت كبد الحقيقه وكلامك فى محله البلد في خير كثييير و معروف خصوصا فى مجال التجارة افضل من عشرات الوضائف بس شباب الله يهديهم ويصلحهم يبغون وضيفة مرموقه ومريحه وعلى مكتب ومكيف ....... والشغل والكد من عرق الجبين افضل وفيه بركه وماهو عيب .... الكل يناظر حوله ويشوف الاجانب ماسكين كل شى فى بلدنا وخصوصا المجال التجاري وماكلين ذهب من وراها وشبابنا متذمر ومتسدح فى البيوت ... ياخى شمر عن سواعدك واسعى فى طلب رزقك وربي ماراح يخيب املك ان شاء الله ........ :)