استفسار هل القراءة على السيارة الجديدة جائز ؟؟؟

الف مبروك السياره مقدما والله يعطيك خيرها ويكفيك شرها ,, نعم يجوز انك تقول هذا الدعاء ((اللهم إني أسألك من خيرها وخير ما جبلتها عليه، 
وأعوذ بك من شرها وشر ما جبلتها عليه)) ولا تنسى دعاء الركوب (( دعاء الركوب " الله أكبر ، الله أكبر ، الله أكبر ( سبحان الذي سخر لنا هذا وما كنا له مقرنين * وإنا إلى ربنا لمنقلبون ) "الحمد لله ، الحمد لله ، الحمد لله ، الله أكبر ، الله أكبر ، الله أكبر ، سبحانك اللهم إني ظلمت نفسي فاغفر لي ، فإنه لا يغفر الذنوب إلا أنت ".

موفق بإذن الله

انا كنت مثلك واخس اول ماشريت السياره شغلت فيها قران ونويت اني اسخرها لله 
وقلت واعوذ بكلمات الله التامات من شر ماخلقت 
وكل ماركبت السياره بسم الله توكلت على استودعت الله الذي لاتضيع ودائعه
اللهم مثل ماذهبت سالم غانم ارجعني سالم غانم 
ولله الهم راح الخوف والقلق وكل شي قدر
والله يباركلك فيها ويعطيك خيرها ويكفيك شرها

ممبروك اخوي    ولا يوجد حرج  ولا بدعه 

إي نعم جائز

وكل ما ركبت السياره أقرأ ايه الكرسي والفلق والناس و المسد و انفث على الطبلون والدركسون

هالحركه مجربه و الحمد لله أفادت كثير

_______________

شرالي الوالد فورد 2003 نظيف جدا و اول ما اخذته صدمة فيه من ورا صدمة خفيفه وانا راجع ريوس

وقال الوالد ما تصلح لك شكلها كبيره

وراح عرضها عطاه واحد بالمعارض عشان ينزلها الحراج

المهم حاول يدور في هاليومين سياره بديله يشتريها لي

لكن ما حصل شيء مناسب ويتحمل مثل الفورد

و واحد كلمه بخصوص الشاشه والكاميرا الخلفيه

وجت في راس الوالد إنه يركبلي شاشه و كاميرا خلفيه عشان لا تسير طويله علي

المهم وراح كلم الرجال اللي ينزلها بالحراج وقاله لا تبيع خلاص

ابي أستخدمها ,, وقال الرجال والله إن فيه شايب نشب فيها نشبه قويه ,, وقال ابوي , أعتذر منه وقوله الله يرزقك بوحده أفضل منها

ونشب الشايب الا ابيها , وقال الوالد يا رجال موب على كيفه , خله يدور اقرب جدار ويصك راسه فيه , الا غصب ابيع له , الله يهديه بس

ونشب الشايب على الاخر

وقال الوالد للرجال بأجيك المعارض ونتفاهم مع الشايب

وراح الوالد عنده وقاله إن ما حصل له سياره بديله وتتحمل مثل الفورد و أستخرت و قررت إني ما ابيعها والله يرزقك بوحده أفضل منها

ونشب فيها الشايب هذا 

والوالد شغل السياره و قال راسه متحجر و الضاهر ماعنده مشكله يقعد يوم كامل عند السياره ,, و ركب السياره وشغلها الا والشايب قاله , الله لا يبارك لك فيها ولا يرزقك فيها

وقال الوالد أذكر ربك يا ابن الحلال

وقال والله ماني ذاكره وعطاه ظهره وراح

ويقول الوالد من يوم رحت من عنده

وانا ماشي بالسياره و مفتح عيوني على الاخر

وماشي في خطي الوسط و فيه سيارتين من جنبي وبعيده

وسبحان الله يوم قربت منهم يجي واحد يلف علي و يصدمني من الرفرف الامامي الايسر

و الحمد لله جت بسيطه ما تأثر الا الرفرف وشمعة الركن

و رجعها للبيت وطفاها

الا والسياره تكبس من نفسها

السياره طافيه وتكبس من نفسها

ناداني وشفتها بعيوني هههههه والله رعب

وقالي افتح الكبوت و فتحته , وفصل اصبع البطاريه

ويوم جاء اليوم الثاني شبكنا البطاريه و كلمنا الرجال وقلنا له وش رايك نبيعها على الشايب

لان عينه فيها

وقال اتركك منه

و اقرأ على السياره من الخارج وانفث عليها و إن شاء الله ما عليها خلاف

وكل ما ركبت السياره اقرأ عليها وانفث على الطبلون و الدركسون و إن شاء الله ما تشوف منها شيء

وفعلا كل ما ركبت فيها قريت ايت الكرسي و سورة الناس والفلق والمسد , والمعوذات اعوذ بكلمات الله التامّات من شر ما خلق و اعوذ بكلمات الله التامّه من كل شيطانٍ وهامه ومن كل عين لامّه


و مشت معي بفضل ربي بدون أي مشاكل ولله الحمد

واعذروني على الاطاله

اخوكم : ابو يزيد

جائزه وانصحك تقرا عليها 
واحد من اقربائي معه كان مع جمس موديل 92 ونظيف وراح فيه لي المعا

وصدم فيه وشوفه الى يومك هاذى السياره خربانه ومرميه في الحوش 

انا اول ما اشتريت السيارة الجديدة خليت الوالد يقراء عليها في الحوش طبعا هوا إمام مسجد الحارة حاليا لأني قبلها اخذت سيارة جديدة ماكملت 4 اشهر وإلي انا خاش في دينا وراحت الحمد لله على كل حال
وانا ايضا اقراء الأذكار عند صعود السيارة

وعليكم السلام ورحمة الله وبركاته 

أخوي إذكر ربك على موترك كل ماركبته وكل ماشفت منه شي يعجبك والله يبارك لك فيه

اتوقع جائز 

بعضهم اشوفه لازم يخلي نسخه من القران بالسياره ماتدري عنهم 

كل عام وانتم بخير   

الناس في قضية العين بين طرفي نقيض :
الطرف الأول : 
من يبالغ في العين بشكل غير طبيعي بحيث لو عطس عطسة قال هذه عين أو كح كحة قال هذه عين و نحو ذلك .
الطرف الثاني :
من يهمش دور العين بشكل كبير جداً .

(((( المحافظه على الصلوات الخمس وكثرة الأستغفار وأذكار الصباح والمساء والنوم 
هي الحفظ والحصن الحصين ))) .

انا الحمدالله كل ما اركب اقرا المعوذات واحصن نفسي وسيارتي
وتوكل على الله 
واحاول قدر المستطاع اشغل قرءان لو دقيقتين
ونا فكرت اقراء سورة البقرة في ماء واغسل بيها سيارة
و افتح صورة البقرة كاملة فسيارة 

جزاكم الله خير جميعا 
كلكم تستاهلون لايكات
بس والله نقاطي اقل من 30 وما تسمح لي
سامحوني
وكل عام وانتم بخير

الأخوانى كفو ووفو ، الله يحفظك ويحفظ  لك السيارة ، ولكن لا قدر الله ان نسيت وما قرأت الأذكار وفي نفس الوقت حسيت ان السيارة
فيها ربما عين ، اقراء آيات العين في جالون ماء عادي ورش السيارة كلها مع المحرك والكفرات ، بإذن الله تنفك العين وهذا
مجرب وحصل معي وفكيت العين بإذن الله بهذه الطريقة.