زيارتي اليوم لصيانة الـ 1000مع العملاقةTOYOTA و ماجد المطلق

20 12

لايمكنك التصويت حتى الحصول على 20 نقطة على الأقل
إضغط هنا للإخفاء

الكائن الصغير 199
قبل 11 سنه و 3 شهر

السلام عليكم ورحمة الله وبركاته

عساكم طيبين

اليـوم انطلقت بسيارتي الكورولا إلى وكالة عبد اللطيف جميل لصيانة الـ 1000 ، والحقيقه أن نظرتي للصيانة تغيرت 180 درجة ، بحكم ما رأيته مختلف عن كلام (بعض)الناس ، توكلت على الله لفرع خريص واستقبلني موظف أخ مصري الابتسامه ما تفارق وجه ماشاء الله تبارك الله ، محترم محترم ويفرض عليك ان تحترمه ، والله ذكرني اسمه بس نسيته ، طلب مني بكل احترام الاستماره ، وبدا يسألني عنها هل هي باسمي ولا باسم شخص ثاني فاخبرته انها باسمي ، وبدا يسجل وبدا يشيك على السيارة من ناحية البدي فيه حكوك ولا ما فيه ويقول لي وياكد لك اذا كان فيه حكه عشان تكون واضح فقال لي ترى عندك حكه بالصدام الامامي وسجلها ، ثم قال لي هذه الصيانة مجانية والزيت ما راح يتغير لأن المتعارف عليه أنه يتغير 5000 وراح نشيك على الزيوت وهواء الكفرات ونشحم مقابض الابواب والبطارية وننظف المكينة وننظف السيارة ونلمع الكفرات $_$ ، واعطيه ملاحظه شفتها بالسياره قلت له فيه صوت احتكاك بالفرامل ، فقال لي مثل كذا (احححح ) قلت ايه ، فقال لي هذا طبيعي في كل سيارات الكورولا ، انا دخلتها عندهم الساعة 20 : 8 قال لي الساعة 10 راح تكون جاهزة قلت له جميل جدا ، وقال لي ادخل الصالة واطلب مشروبك المفضل ( شاي،حليب، نسكافيه، كباتشينو ....) واجلس وارتاح وتقدر تشوف سيارتك وهم يشتغلون فيها ، فقلت له اقدر اشوف السياره ؟ ، فقال لي : نعم

ورحت ودخلت الصالة وطلبت نسكافيه ودورت لي اقرب طاولة اجلس عليها وكان فيها كمبيوتر مكتبي + نت والمفاجأة أن سيارتي كانت قدام طاولتي إلي جلست عليها وصرت أشوف الرجال وهو يشتغل عليها ، فلقيته شيك على الزيوت و نظف المكينة ببخاخ WD40 وشحم الابواب والبطارية بنفس البخاخ و شيك على هواء الكفرات واخذها للمغسلة وقعدوا يغسلون فيها وطلعت تلق لق ماشاء الله تبارك الله وهذا كله قدامي وما في شي يخفونه ، ثم طلعوها ولمعوا الكفرات ونظفوا الداخلية واخذت مفتاح السيارة وتوكلت على الله
المفاجأة ان الاخ المصري الي استقبلي قال راح تنتهي تقريبا الساعة 10 والسيارة انتهت 15 : 9 يعني كلها ساعة وحده

والمفاجاة لقيت واحد معاه كورولا وسوى لها الصيانة عشان يغيروا لها الزيت فسالته وقلت له كم ماشيه ؟،فقال 15 الف ، وقلت له كم مبلغ الصيانة فقال لي 200 وشوي ، فقلت له والله سعر طيب
وسالته عن صوت احتكاك الفرامل فقال لي حتى انا عندي وهذه طبيعية


خلاصة زيارتي للوكالة :

1 - الوكالة شغلهم مرتب جدا ومنظم بعكس حال الصناعية

2 ـ عبداللطيف جميل وفق في اختيار الاشخاص الي يستقبلون الزبائن ، لان الصراحه هم الي حمسوني اني اجيهم مرة ثانيه في صيانة 5000

3 - سرعة انجاز عملهم

4 - ما يخفون شي في الصيانة ابدا (هذا ماظهر لي ) بعكس ما يقوله (بعض) الناس ، فكان جمب سيارتي كامري وكورولا قدامي غيروا لها الزيت مع السيفون وبدلوا كفراتهم ونظفوا فلتر الهواء ونظفوا الهوبات والفرامل وزادوا موية المساحات والرديتر وكان شغلهم مرتب جدا

5 - والي عجبني الحقيقه فيهم ان العامل اذا بدا في سيارتك ما يروح للسيارة ثانية حتى ينتهي من سيارتك وهذه نقطه يشكرون عليها بعكس حال الصناعية يغير لك الفحمات ويروح لسيارة ثانية ويسمكرها وبعدين يرجع لسيارتك حتى يخرط الهوب

6 - تعاملهم مع الزبائن كان اكثر من رائع فالجو بارد والنسكافيه عندك والكمبيوتر موجود والنت مفتوح وسيارتك قدامك والجو ابداع ( فندق 4 نجوم)

7 - تنظيفهم للسيارة كان رائع جدا حسيت ان السيارة رجعت وكالة

8 - اسعارهم مقبوله ( نوعا ما) واعتقد بعد 40 الف راح ترتفع الاسعار لان التغييرات الالزامية كثيره


عندي ملاحظ بسيطه لهم لو يزيدون اماكن استقبال السيارات كان افضل لان المواقف كلها 6 صفوف بشكل طولي وكل صف فيه 3 سيارات يعني لو يخلونها 10 كان افضل
والشي الثاني لو يكبرون مساحة رؤية عمل الصيانة كان افضل يعني يطولونها شويتين حتى اكبر عدد ممكن من الزبائن يقدرون يشوف سيارتهم وهم يشتغلون عليها


هذا ما كان عندي

وبخصوص ماجد المطلق
فيه عضو هنا عنده مواضيع خطيره اسمه : ماجد المطلق
وقريت له موضوع عن وضع عزل لمكيف السيارة الماصورة مثل مكيفات الاسبلت ، المهم اني انا حطيت العازل الي قال عليه ودبلت الطبقه ، اليوم الموظف المصري الي استقبلني قال لي انت سويته ؟ قلت له ايه نعم ، وبعدين سالته قلت له ليه يلتغي الضمان ؟ قال لي لا بس يمكن يسبب حريق ويشتعل نار ، فافضل لك تنزلها ؟؟؟!!!

فما ادري وش تتوقعون انزل العازل ولا اخليه

وهذا موضوع ماجد المطلق :

montada.haraj.com.sa/19551/لتبريد-افضل-المكيف-سيارتك-.........-الموضوع-للفائده-للجميع-/

إبلاغ

الردود