ورشة الوفاء - الصناعيه القديمه

ورشة الوفاء .... الله يعينك على غلاء اسعارهم
مريت عندهم يوم قلت له بكم رش صدام فقط قالي ب 2000 ريال
المهم خذ الوصف
وانت على شارع الظهران ووجهك جنوب وانت واقف عند الاشاره يصير السالم للزجاج على يسارك
ديور من الاشاره يصير السالم على يمينك وايضا الزاهر للزجاج
المهم امش وبيجي على يمينك الرشيد وكيل تويوتا لف بعد يمين على طول
اول ما تلف بتجي ورشة الوفاء على يسارك بتشوفها واضحه
مكتوب الوفاء باللون الوردي اظن
واذا ما عرفت الوصف اكتب انت من وين بتجي وبوصفلك من بيتكم

الله يعطيك العافيه ي ملك الخطوط .. انا بجي من الدايري الشرقي بأتجاه الجنوب ( متجه الى مخرج 14 و 15 ... ) 
ياليت توصف لي منه ..

أنا عارفه ورشة الوفاء مره سمكرت عندو سيارتي فورد 97
واسم صاحبها السمكري التركي أبو سليم بس أسعاره غاليه

^^^ ممكن تفيدني بطريقه للتواصل معهم ؟ 

حلو
خذ الوصف اجل كمل طريقك على الدائري الشرقي الين يجيك مخرج 17 سلمان بن عبدالعزيز او كما يسمونه طريق المدينه المهم اطلع مع مخرج 17 وروح يمين بيصير وجهك غرب وامش سيداااااااااااااا الين ما يجيك مخرج يوديك لشارع علي بن ابي طالب خذ يسار معه بيصير وجهك جنوب
وامش على الخدمه لا تمسك السريع
بتلقى شارع عرضه ثلاثين على يمينك اسمه زيد بن الحارثه لف يمين معه حتى بالزاويه فيه مسجد
المهم اذا لفيت يمين صار وجهك غرب امش الين يقفل الشارع بوجهك
طبعا الي حولك كلها ورش
اذا لفيت يسار امش شوي بيجيك اجبار يمين لف يمين وبعد خذ يسار مره ثانيه لين تطلع الشارع العام
هذا الشارع العام اسمه شارع العنوووز
وهذا الي فيه محل قطع الغيار
المهم امش هذا الشارع الين يجيك تقاطعه مع شارع الخرج وبيجي االسالم للزجاج على يمينك بتشوفه واضح
وانتبه ترا في ساهر هناك اذا لفيت يمين امش شوي بتلقى الرشيد وكيل تيوتا
لف من بعد يمين بتلقى ورشه الوفاء على يسارك
عارف الشرح حوسه ودوخه
بس هذه الصناعيه لازم لفات شوي
شف انت اذا طبيت بالصناعيه اسئلهم عن السالم للزجاج الي بالزاويه
لانه معرووف مرره
والكل يعرفونه هناك
اذا وصلت السالم خله على يمينك ووجهك شمال بتحصل الرشيد وكيل تيوتا لف يمين من بعده بتحصل الوفاء
بالتوفيق توصل بالسلامه
لا تنسى تقولنا كم اسعاره حاليا

الله يعطيك الف الف الف عافيه  وما قصرت وان شاء الله بروح له واعلمكم بالاسعار ...

يا اخوان عندي قلاب دايهاتسو 84 ابغالي له قطع تعبت وانا ادور ومن كذب الاجانب خابرين محل قطع غيار احصل قطع 
علما بان الوكالة يقولون ماعندهم بحجت مافي كتلوج 

جربت هذه الورشة شخصيا وإليكم تجربتي

كانت بتوصية من ميكانكي ممتاز أتعامل معه في صناعية العروبة، حولني عليهم واتفقنا على تركيب مكينة أكاديا 2009 بتكلفة 8000 ريال، وبعد التركيب طلبوا مني مبلغ إضافي 800 ريال قطع كوالات وبواجي ... علما أنهم ضمنوا المكينة لشهر واحد فقط مع شرط استلام المكينة الرجيع

بعد شهر و6 أيام خبطت المكينة وانحرقت السبايك بسبب عطل في مضخة الزيت، رجعت عندهم قالوا خلص الضمان وبعد أخذ ورد قالوا اندخل لك ياها انصلحها بس عطينا سعر القطع 2000 ريال ... يعني صرت حاط لحد اللحظة هذه 10800 ريال ... قعدت السيارة عندهم حول العشر أيام ..

رجعت أستلمها مشيت 200 متر طفت السيارة ووقفت في أرضها كلمتهم قال مشكلة برمجة، أخذت لورشة عنده كمبيوتر قالي ما في أي مشكلة في البرمجة وإنما المشكلة هي حدوث ماس كهربائي في الكرنك وحساس الكرنك وبيكلف تصليحها 300 ريال ... طبعا الورشة قال صلح عند الرجال حنا مالنا دخل بهذا العطل ...

المهم لا أنصح بالتعامل مع هذه الورشة نهائيا، لأنهم باختصار شكلهم ياخذون الرجيع من المكاين ويوضبونه ثم يعيدون بيعه على العملاء وأنت وحظك ... للأسف هذا السوق غير منظم ومن أمن العقوبة أساء الأدب