نظره بعض الناس لممشى السياره

@# انا الممشى مايفرق معي 

اللي يهمني البودي اهم شي واكيد المكينة والقير

بس اهم شي البودي يكون وكالة (لكن اذا صدامات مرشوشة مو مشكلة لان الصدامات معرضة لاي حكة وثاني شي انها فيبر

ماتعتبر من البودي) حتى لو كانت ماشيه قليل وفيها صدمة او رش ماتنفع كل شي يتعوض في السيارة الا البودي مستحيل يرجع زي ماكان

مثلا لو صار حادث في احد الرفارف الخلفية لازم تترش وتتسمكر وحتى اذا بتتغيرها من التشليح برفرف وكالة ما اترش

مايمديك الا ب القص (تقص الرفرف) وبرضو حتى لو ركبته لازم سمكرة ورش لاخفاء معالم القص والتلحيم 

بالمختصر انسى يرجع وكالة ..اما الباقي كله يتغيير من مكينة وقير وكل شي ...

هذي وجهة نظري وبالمختصر الممشى مو دليل...

والله يحفظكم..

في فرق كبير بين الممشى داخل المدينة وعلى الخطوط

أنت تمشي في السفر 100 كم ما يصادفك مطب ولا تدعس فرامل ولا تلف الدركسون بشكل كبير

وفي المدينة أنت تمشي ساعة في الزحمة 25 كم وتدعس فرامل 100 مرة وتنتقل بسرعة من مسار إلى آخر والمطبات ما تنعد

في رأيي الممشى أحد العوامل للحكم على السيارة ولكن ليس كل شيء

ممشى السياره الطبيعي من 25000 إلى 30000 في السنه اكثر من كذا تعتبر مستهلكه والسياره الي راعيها مهتم فيها واضحه جدا للعيان  

@# ما اختلف معاك يابو عبادة 

خصوصا القير الاوتوماتيك يتعب في الزحمة وداخل المدينة من التبديل كل شوي بين النمر

_________________________________________________________

ابو عباده كلامه صحيح ومن رأيي الشخصي ان البودي مايهم اهم شيء قير ومكينه والباقي مايهم ,, لأن وش الفايده اخذ سياره البودي حقها ورده 

والمكينه كل يومين ترتفع حرارتها ولا تطلع لي كل شوي مشكله ,, وهذا يدل على ان ممشى السياره له اهميه من بعد طريقة قيادة الشخص نفسه للسياره ومدى اهتمامه فيها .. 

بالنسبة لي القياس الاول ع شــــــدة البدي وشـــــــد الداخلية

اما بطـــــــــــــــن السيارة قابل للتغيير والاصلاحات المستمر بسبب الاستهلاك وهذا امر طبيعي ،،

اما ع هذا الوضع الي ذكرت كلـــــــها بنفس المستوى .

هذي مهترية ،، وهذي مهترية

تبون الصدق اهي على الممشى والاستخدام بعد بعضهم والله تلقاه يحافظ على الزيت ويغيره في وقته ويعطي الموتر حقه في التحمية لكنه مايعرف يدعس يظغط للموتر في البداية ويعود يرفع رجلة ويحير القير فهاذا بعد من الاسباب اللي تأثر على الموتر وانا مثل ما قال اخونا ما اهتم في الممشى اهم ماعلي النظافة واداء المكينة لكن ان حصل موتر ماشي قليل يفضل لانه الممشى اذا تبون الصدق يهد الموتر شوي خصوصا لما تتكلم عن 4 سلندر او مكينة صغيرة ال 8 مايهمه وبعد الموتر اذا كان ماشي لين قال بس تتاثر فيه بعض القطع وتصير تطلب بس مهب بشكل مستمر بين فترة وفترة لكن انا معك ياصاحب الموضوع قلبا وقالبا ... وتحياتي

اخوي aziz هاذا اذا كنت في ديرة غير هالديرة وفيه ورش صاحية وعمالة تعرف تشتغل قل بشتري موتر متهردق بطنه هنا عندنا انفكت المكينة ولا القير لاعاد ترتجي من الموتر شي بعه وانت مغمض بعد والله نسبة 10% وواجده عليهم اللي يفهمون ويعرفون الميكانيكا وبعدين موتر انفكت مكينته مستحيل يكون مثل شد بلاده لا تحاول تقنعني وبعدين بالنسبة للبدي والداخلية حنا ماقلنا خذ واحد متقلب ولا متكسر بس اذا كان الموتر صفطه ونظيف وممشاه كويس واداء مكينته ممتازه ولا يحتاج شي حتى لو كان فيه طرف رشة ف احد الرفارف طقه بسيطة وتعدلت وشغلهم مظبوط فيه ولا وضحت والله لشتريه ماعليش وبعدين رح دور هنا موتر بديه وكالة ومكينته وكل شي فيه نظيف شرط لو ان سعره 20 الف لقيته ب 50 ربعنا مجانين فيذا حقين ذا المعارض مهب صاحين ... تحياتي

ممشى الخطوط حتى لو كان كثير اريح للموتر من الممشى داخل المدينه


لان خارج المدينه الدعسه والسرعه ثابته والهواء يضرب فالاديتر وهذي توفر عمل المروحه


يعني بدل ماتشتغل المروحه وتسحب كهرب لا خلاص توقف المروحه

وتنتهي وظيفتها وترتاح

ويجيك الهواء يؤدي الغرض واقوى من المروحه


اما داخل المدينه مع الزحمه وكل شوي تمشي وتوقف تستهلك فحمات وهوبات اكثر

تتعب القير اكثر بحكم انك تمشي وتوقف

وشغلات كثيره


لذلك اشوف سيارات الخطوط حتى لو كانت ماشيه مع الماحفظه على تغيير الزيت تبقى حالتها افضل من اي سياره استخدمت فالمدينه

^^ اكيد مو كل واحد بيجلس في الخطوط السيارة بتجلس في المدينة قرابة 85 % والباقي خطوط

الممشى مهم جدا لكي تشتري سيارة , كأهمية سلامتها من الحوادث المؤثره على نظام التعليق والشاصيه

انتا اذا بتشتري سيارة تبيها تكون آمنه وسليمه في ثباتها وأقل مايمكن في الخرابات وطلب القطع وميزانية صيانتها معقولة ومنخفضه لاقل شيء سنتين قدام

لو الممشى ماهو مهم مارفعت شركات التأمين الامريكيه اسعار التأمين لمبالغ خرافيه من أجل السياره اللي تعدت 150 الف ميل , أو كانت مصلحه بعد حادث وهذا الشيء جاء من خبرة ودروس تعلموها على مدى عشرات السنين ,

واللي يقول البدي مهم والمكينه عادي تتغير , صراحة اتعجب منه , يعني صارت خسارة اقل شيء 5000 ريال تبديل مكينه سهله جدا

المفروض يقول السيارة ككل مهمه ,

انت تبي سياره آمنه بعد الله في حفظ نفسك وعيالك , يعني ماتاخذ سيارة صاير لها حادث في منطقة الكفرات الاماميه أو الخلفيه وتلقى السيارة تشتل في الطريق واحتمال تسبب حادث , او الايرباقات طالعه وماهي مصلحه فاذا صار حادث يمكن يتوفى شخص داخل السياره

انت تبي سيارة ماهو صاير لها حادث على البيبان وتشوف الهواء داخل عليك ومزعجك انت وعائلتك في كل مشوار تمسكونه , تبيها معزوله بشكل جيد بحيث تضمن الراحه وقت السفر والتمشيه

وتبي سياره ماتطلب قطع , يعني ماهي مصديه ومدموره قطعها السفليه والشخص اللي تشتري منه يواضب على تبديل القطع والصيانه , مكينتها وقيرها وحرارتها وكهربتها كويسه بحيث ماتخرب عليك السيارة وانت في مكان مجهول , او كل شوي وانت في الصناعيه ترمم فيها

نقول لو شريت سيارة ب 20 الف وطلعت مكينتها مضروبه , بعدين غيرت مكينه مع التركيب والزيت والفلاتر وموية الاديتر ب 5000 ريال اقل شيء. يعني اضف ال 5000 ريال للقيمه اللي اشتريتها فتصبح 25000 ريال , لو بديت تسوي صيانه من جديد وغيرت الاذرعه والجلد والاقمشه وغيرها تقريبا ب 3000 ريال , واضفها على التكلفه الاساسيه تصير 28000 ريال (غير جهدك ووقتك اللي قضيته في الصناعيه هذا لايقدر بثمن)

وكنت بتوفر جزء كبيرمن هذي التكلفه لو زدت مبلغ بسيط واخذت سيارة كويسه بدل هذي , انت ماتبي تاخذ سيارة علة وتلقاك بعد سنتين صرفت على السيارة دبل قيمتها فهذي مصيبه ( شوفوا الدول الكبرى تلقى سيارات في تشاليحهم باقي تشتغل وتمشي , لكن يعرفون السيارة متى ماصارت السيارة صيانتها اعلى من قيمة اقتنائها تركوها ودوروا بديل افضل , عندنا ماتتشلح السيارة الا اذا صار عليها حادث وماتوا اغلب اللي فيها)

مشكلتنا شعب مستهلك ودفيع ولاعندنا ثقافة حساب الميزانية وهل الشيء اللي أشتريه مناسب لي أو لا وسالفة الأمان والاهتمام فيه ضعيفه جدا

طبعا انا اتكلم بشكل عام , والا كل شخص وله نظرته وفلوسه هل تكفي او لا وطبيعة مشاويره والغرض اللي اشترى السيارة لاجله , لكن عموما الشيء اللي مايختلف عليه اثنين الممشى الكثير المفروض يخصم من قيمة السيارة السوقيه اقل شيء 25% , وحسبته تكون غير ومفصوله عن حسبة حالة السيارة ومقدار الاهتمام بها ولا يستدل به على نظافتها

اعتذر عن الاطاله

اهمممممممممم شي بالسياره ((( المكينه )))  (((الجربوكس))) 

و الممشى ابدا مو مهم 

لاكن الممشى كمان اذا طالعت و كان كثييير يسد نفسك ههههههههههههههههههه و يطيح من سعر السياره للاسف 

’ واحد اعرفه فلوسه واجد السيارة اذا مشت 100.000 كيلو ’ يبيعها ’ باخس الاثمان ’ لاكن حلل الفلوس فيها 
مافيه الى شغل نظيف # 

بنظري الممشى الكثير تأثيره مو بس على المكينه.. 
فيه محركات أخرى تعمل ويضرها كثرة الممشى والاستخدام والاهتزاز والمطبات تفكك السيارة 
حتى الأجهزة الألكترونية داخل السيارة تلقاها مستهلكه 
من بيمشي 300 الف ولا يستخدم مكيف ولا راديو او حزام أمان وحتى كثرة الغسيل والتمسيح تأثر بحكم كثيرة الأستخدام. 

الي ماشية 300 الف ومحافظ على المكينه والبدي مهرهر من المطبات والاهتزازات له اصوات وأصواف العكوس والقير والرمان بلي على وشك وهذه ليست استهلاكية بال 300 تكون وصلت حدها وغيرها كثير 
طرمبة ماء وبنزين وسيور وكمبرسور وغيرها كثير. حتى الماشية كثير تعرضها للحوادث والمخوش والاحتكاك والشمس أكثر من الي ممشاها أقل بنفس الموديل. 

خلها ماشية 100 ألف على اهمال.. استخدمها وذب المكينه وركب ثانية أو وضبها تعطيك عمر قريب من عمرها لما كانت جديده وباقي متحركات السيارة وأجهزتها سليمه. 

الممشى انا اشوف الى 500 الف كحد اقصى مع المواظبه ع الزيوت والماء

الممشى الكثير مو بس تأثيره على المكينه تأثيره على كل شي بالسياره عضلات قير دفرنس كل شي كل شي 
انا مجرب الممشى القليل بنزين زيت فقط لسنوات تشتري موتر ماشي كثير حتى لو انه محافظ عليها راعيها السابق الا انها تطلب قطع وصيانه