أضف سؤال أو موضوع جديد          

قبل لا تطلع موتر تقصيد مهم ومنقوله من منتدى فقط للنصيحه

up 33 down 5






بسم الله الرحمن الرحيم

"الموضوع بكتبه باللهجه العاميه"

مثل ما انا وانت عارفين ان 70% ممن يمتلكون سياره جديده إما انهم اخذوها "اقساط" او "قرض" , في كلا الحالتين "راح يدفع آخر الشهر" .. هذي ما اعتقد انها مشكلة كبيره , ولكنها قد تكون كارثة إذا ما حسبتها صح وقست الامور "على نفسك" .. انا وانت وهو نتمنى سياره جديده تجمد على الشارب مثل مايقولون وعادتنا وتقاليدنا الباليه تخلي فكرنا ينصب على نقطة "كيف الموتر في عيون الناس" , طبعا ما اعمم ولكن اقول (كثير من الناس ).

الخلاصة

إذا كنت بتطلع موتر فأنت بين 3 خيارات غالبا
1- تطلع من بنك .
2- تطلع من شركات .
3- تاخذ قرض .

خلنا نعرج عليها نقطه نقطه ..
1- تطلع موتر من بنك ,
في هذه الحالة يجب ان تكون
1- موظف "على رأس العمل"
2- راتبك لايقل عن 4000 "غالبا"
والنسبة تتراوح مابين 5% إلى 1.28% تقريبا

البعض يقول "وشي النسبة" .. إذا قالك انه ياخذ نسبة 4% مثلا فلا تعتقد انت انه راح ياخذها من مجمل القيمة , الصحيح انه راح ياخذها سنويا يعني كل سنة تكون فوائده 4% من قيمة السياره يعني لو اخذتها انت على 5 سنوات راح يكون مجمل الفوائد 16% .. وهذا جيد ولابأس به ,

خلنا نجي على النقطه الثانيه وهي الاهم والاقهر والارفع للضغط
2- شركات التأجير
هنا القصد مثل شركة اليسر و شركة تأجير وغيرها
فوائدهم غالبا تتراوح بين 9% إلى 12%
يعني إذا اخذت الموتر على 5 سنوات بفوائد 10% بتكون مجمل الفوائد 50%
يعني إذا قيمة السياره 100,000 بتكون قيمتها بعد 5 سنوات 150,000
وشروطهم نفس شروط البنوك تقريبا إلا انهم "يسمحون للمتقاعد والي عليه ديون لاتصل إلى نصف مرتبه" انهم ياخذون سيارات يعني بالعربي (يستغلون المساكين)
وانا انصح انك ماتاخذ منهم لوتضطر تمشي على رجليك
3- القرض
وماراح اطول فيه لنه معلوم للجميع
غالبا تتراوح فوائده من 1% إلى 3.85% تقريبا وانا اشوف انه افضل حل للي بيشتري سياره .. من فوائده ان السياره تصير بأسمك وفي حالة ماسددت ماراح يسحبون الموتر ولكن راح يتلونك انت للسجن , وهذي افضل من انك تقصد سنتين او 3 وفي النهاية يسحبونه وايضا تسلم من المشاكل الثانيه والي بختصرها في سالفة احد الشباب :
( هذا واحد من الشباب طلع ماليبو 2010 من احد البنوك المعروفه جدا باقي على اقساطها 9 شهور يعني انه دفع 80% من قيمة السياره الاجماليه ومعد بقى شيء ويتملك الموتر , عموما الرجال صدم والبنك اخذ الموتر وكتب عليه "تالف" ولا عوضو الرجال بشيء وخوينا جته حمى الوادي المتصدع من الغبنه )

ملخص الكلام :
صديقي المواطن انت لست مضطر انك تاخذ موتر 2013 لعيون الناس تقدر تدور شيء مستعمل وجمع وتاخذ موتر كاش وترى الموضوع سهل جدا جدا , البعض بيقول "ياخي صعبه" وفعليا هو يوهم نفسه انها صعبه .. يعني واحد مطلع سوناتا اخر موديل ويقصد كل شهر 2000 ريال ودافع دفعه اول 10000 وواحد شاري ماركيز بـ 15000 وراتبه يصفاله كامل الاول شايل هم وضايق صدره والثاني كل صيفيه في تركيا ولا اندونيسيا "إذا ماقدح ودز فرنسا ولا سوسيرا" الفرق بين الثنين ان الاول يقول "وش يقولون الناس" والثاني يقول " خلهم يقولون الناس" وفعليا "الناس ما طقولك خير" وكل هذي إيحاءات نفسيه ودتنا في داهيه .. وحتى لو كنت من النوع الي مايهتم في الناس ويحب المواتر وراعي فلسفه فيها , انت لست مضطر تقضي عمرك تقصد عشان ترضي نفسك .

خلني الخص الكلام في سطر
لا تطلع اقصاد أبداً

والشخص الوحيد الي بيقول الله يذكر راعي الموضوع بخير هو الي بيطلع وبيجرب وبياكل خابور

بالتوفيق للجميع
اتمنى اشوف التفاعل في الموضوع

نقد,نقاش,تصحيح معلومه








إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


قايلكم في اطفال تعطي دايس لايك لو هو رجال قال اسمه هو مثل الحريمه .... مايقدر يقول شي قدام اسياده :)
راح اعط كل موضيعي ديس لايك متاقدر الا على 2 وادري انك فاتح 3 عضويات ..... يا حريمه



up 8 down 5
مستر12 897
قبل 8 سنه



الي يقهرك يعطيك دايس لايك واهوو مقراء شئ


up 8 down 2



كلامك سليم اخوي في ناس يدفع دفعة اولى 10 الف الي 20 الف ويقسط خمس سنوات !! طيب زود على 20 كم قرش وخذلك شيء نظيف لاتتفشخر بالاقساط لان احنا هناء ورانا مهور مابين 30 الي 50 وقصر مابين 13 الف الي 25 وذبايح حول 25 الف ريال يعني تقسط في حرمة و سسيارة !


up 9 down 1
khalid39 75
قبل 8 سنه



حنا ماذبحنا الا المظاهر وهذا الى ماخذ سيارة اقساط اذا جاء يوم زواجه راح أستأجر بانوراما ولا بي أم



up 3 down 0
for speed 752
قبل 8 سنه



كلامك صحيييح 

لكن ياخي 
اروح اطلع ماركيز ١٥ الف 
وكل راتب اصلح فيه الماركيز وكل يوم بورشه !!! 
ترى انا ماني فاضي عندي اعمال ومدارس ومشاوير يوميه 
وكل يوم يطلع لي مشكله 

والله ياخي ادق لي موتر صغير جديد قسطه ١٠٠٠ ريال وارتاح من الورش والهنود والنصب والاحتيال يستغلون الواحد عشان يشفطون جيبه 
انا بريح راسي واخذ موتر جديد وألتزم بالاقساط 



up 10 down 1
أنيق 17573
قبل 8 سنه



انا براسي من كم اسبوع سييرا 2013 ايجار بالتمليك
 وجيت اليسر وسهالات ودفعه عشره وبنك الاهلي مثلهم
وكان براسي ابيع موتري حول 30 وعطيهم دفعه متوسطه
بالصدفه ولله الحمد مريت بنك التسليف وقالوا تستحق قرض 30
ولما شفت الوضع قلت ليش مابيع موتري على حق التسليف وطق سيرا 2008  ويعلم الله اني كاره سالفة اجار بالتمليك 
وكلها نفس بعض . المهم نطلع من فكرة اليسر  . خل ياخذ التسليف شهري 700ولا ينتفونك خمس سنين ب 1800 ع الاقل .
حنا الظاهر  كلت مخبينا ومحد درى عنا . 
السياره اذا استمارتها مو باسمك لاتقربها حاصه الدخل المحدود .

الصندقه تسوا جديد العماره _ اليا صار الصندقه لي والعماره لغيري


up 5 down 2
ح ــدي نظر 53
قبل 8 سنه



مشكورررر

موظوع  ممتاز  جزاك  الله  خييررر
تستاهل كل خيرر


up 3 down 2



الربا حرام و خراب


up 5 down 1
imatinib 65
قبل 8 سنه



اسف ردي كان على موضوع اخر


up 1 down 1
imatinib 65
قبل 8 سنه



يعطيك العافيه على موضوعك القيم 

ولك احلى لايك 


up 2 down 1
انتراااوي 154
قبل 8 سنه



من وجهة نظري... 

- اذا انت انسان يحب يغير السيارة كل فترة.. انك تاخذ السيارة عن طريق الوكالة.. لانه اغلب الوكالات افضل من البنك..
 مو من ناحية السعر.. لكن افضل من ناحية الربطة... لان اغلب الوكالات ما تحط اسمك بنظام ساما ويصبرون عليك حتى لو
تاخرت بالاقساط الى 6 اشهر... غير ان السيارة مامنة.. ودامك ماخذها من عندهم تقدر تضغط عليهم من ناحية الصيانة و
الحوادث بعيد عنكم يعني ترميها عندهم... ولو ما عجبتك السيارة تقدر تتفاهم وياهم و ترجعها...

- اما البنك راح تتبهذل سواء ان اسمك راح يدخل نظام ساما على طول... اذا صار حادث لا سمح الله انت اللي راح تراجع مع 
التامين.. واذا بترجع السيارة معاملات البنك راح تطول..

- القرض ممتاز للي راح ياخذ سيارة 5 سنوات بدون ما يفكر يغيرها...

- بالنسبة للمستعمل.. مثل البطيخة يمكن تطلع سكر ويمكن راح تطلع روحك من كثر الورش والخرابات... واخرتها تبيعها بخسارة..
كل السيارات المستعملة ظاهرها ممتاز.. بس الله هو بس اللي يعلم بخفاياها...

ودمتم.. 
 


up 5 down 2
another sky 2
قبل 8 سنه



شكرا على النصيحه وماقصرت


up 1 down 1
mu3ath-ksa 85
قبل 8 سنه



يعطيك العافيه 

انا افضل القرض 

لانه الاقل في الفايده 

ونسمع عن التاجير بانه حرام 

والبنوك ما اعرف عنها شي لكن اهون من شركات التاجير 


نصيحتي للي بيطلع سياره 

ابحث عن معرض يعطيك تقسيط 
لان السياره بتكون باسمك واي وقت احتجت تبيع 

مايردك الا السوق 

وفيه مشكله للي بياخذ قرض 

ممكن يحتاج بعدها يطلع قرض لزواج او بناء او اي سبب 

اتمنى ان فكرتي وصلت 

والافضل في طريقة الشراء من وجهة نظري 

تقسيط
قرض 
بنك 
شركة تاجير مثل اليسر 



up 1 down 1




 موضوع جميل يا اخ خاااااص و راح يستفيدون منه العالم ... و هذا لايك من عندي بس لاني جديد في الموقع 



يإخوان المسألة اكبر من ما كتب
,, نحن بحاجة الى التنظيم في جميع امورنا وبخاصة الامور المالية . لو ان كل واحد وضع له ميزانية محددة وترك كلام الناس والعادات التي ما انزل بها من سلطان ... ووضع خطط طويلة الاجل والتزم بها لحصد من وراء ذلك خيرا كثيرا .. قبل اكثر من 12 سنة كنت اعمل موظفا حكوميا وكان رئيسي المباشر يتقاضى راتبا في ذلك الوقت قرابة ال20 الف .. استدعاني وطلب من 2000 ريال سلف ( أي والله ) ليس لديه أي تنظيم : سيارتين تقسيط !! وشقة ايجار غالي في موقع في قلب المدينة !! عذرا على الاطالة ولكن يجب ان نعيد حساباتنا واعادة جدولة امورنا المالية ... وانا ادعم وبقوة الراي بعدم تقسيط للمواد الاستهلاكية مثل السيارات او الاجهزة



up 2 down 0
saqr111 35
قبل 8 سنه



لو كل واحد اتبع نصيحتك كان ارخصت اسعار السيارات وصارت بمتناول الجميع


up 1 down 0
ابوعمر1405 -51
قبل 8 سنه



صادق اخوي بس 
الظاهر ما شفت ززززززحمة الرياض     وجده    والدمام  
ما تصلح لها سيارة قديمة 
والظاهر ما عمر طفت عليك السيارة عند الاشاره وقعدت تتلفت    


up 0 down 0



المظاهر ما راح تفيد يوم تروح السيارة في حادث وباقي عليها 9 شهور اقساط
انا بدايتي كانت ب أكسنت 2003 قبل 4 سنين شريتها ب 3000 الاف ومشتني سنتين وحولها
وماهمني وقتها كلام اي احد
واشتريت ابرة وخيط معها استلم الراتب واخيطه بجيبي طول الستنين
بعتها ب 5500 وشريت سوناتا 2009 (نقلة نوعية بقوة)
والحمد لله السنة الي راحت فكيت فورد تورس 2012 نص فل وكالة كاااااااااااااااااش
وريحت راسي وانشاء الله 10 سنين ماني برايح حول النسيم ولا الشفا


up 0 down 0
3a9omi 1
قبل 8 سنه