ناقل السيارات الي يتركب خلف السياره لنقل سياره اخرى

سالت انا عنه قالي واحد تقريبا سعره 8000 الي 10000
وبشارع بالصناعيه القديمه يقاله شارع العنوز  طبعا بالرياض الكلام
اتمني لك التوفيق

انا كنت ناوي اخذ واحد بـ 4500 يشيل سيارة بحجم الاكسنت تقريبا 
وكان يبيله ترميم وتلحيم

الجديد سعره بين الـ 10 الى 13 حسب شغل الورشة الي مسويته 
وفيه انواع اكبر يشيل من الجموس لين المعدات وكل نوع له سعر 

لكن ما انصحك تسحب بسيارة صغيرة او اي موتر دفع امامي

اذا لك حاجه في السحب خذ موتر يتحمل السحب
وعندك الونيتات بكامل انواعها والافضل الامريكي في هالناحية

البيان الجديد اشوف عندهم فورد 250 مركبين عليه سطحة ويشيلون عليه مواترهم

تخيل تسحب سيارتك واول ماتوصل تناظر بالمرايه ولا تحصل شيء ههههههههههههه

ونسيت نقطه مهمة 

السطحة هذي يجي لها افياش واسلاك للانوار الخلفية 
ما تركب الا على الونيتات الي فمخصصه لهالشي

وارجع واقول يازين هالموستنج ما شاء الله 

عموما اذا حبيت تعرف شي عنها قول لي
 انا ان شاء الله رايح خلال اليومين هذي اسأل وادور لي شي مناسب
لأن في راسي واحد من زمان

يجي له حاجه

الله يعطيكم العافيه فرداً فرداً ماقصرتوا  اخوي naac 2  ياليت يالغالي تتأكد لي من اسعارها وكيف تركيبها سهل ولا لا ؟ وكيف تعامل المرور معاها ؟ انا بستخدمها بنقل سيارات لي من الاستراحه للبيت المشكله ماعرف ارسل رسائل خاصه ياليت تتواصل معاي وشكراً لكم

برسل لك رقمي عالخاص

بتحصل الرسالة في موقع حراج الرئيسي

تلقى اكييد بالرياض بس يبيلك هوك رمانه اذا ماعنندك ترهم مافي مشكله

اهم شي انتبه علئ قير موترك لا يطق 

بتال انتبه وانا اخوك تشتري جاهزه لانها صارت شغله 
تجاريه للورش يفصل قلص ويبيعه اي حديد وأي لحيم 
انت فصلك وحده علي مزاجك ومنها تثق بالشغل اللي 
انت مسويه ابعطيك مواصفات حلوه وثقه 
عكوس جيب باترول القديم مع فلنجاته او فلنجات ددسن 
اماميه لموديل ٨٢ وتحت مع سست جمس وتحط محورين 
وأربع كفرات لانها أمان لو انكسرت فلنجه الفلنجه الثانيه 
تسند القلص 
حديد شواصي ١٢ ملي الفرش يا تفرشه خشب او حديد
صاج مبرز ٨ ملي 
الجيك او العفريته المتحرك وركب  قفل الرمان لا تفصل هوك
لان قفل الرمان لا سمح الله قلب القلص راح ينطعج اللسان
القفل ويطلع من رمانة القلص اما الهوك المفصل اذا قلب يقلب
معاه السياره اللي تقلص
واللحيم انتبه يلحم لك تبنيط والتبنيط نظام نقط خله يلحم لك
نظام خياط يجئ خط واحد لان التبنيط راح ينكسر
ولا تنسي تركب مساعدات القلص علشان يثبت بالخط وما
يتحرك يمين يسار
ولا تنسي السياره اللي تسحبه اذا كانت السياره قير اتوماتيك
يكون زيت القير علي المستوي الطبيعي مو ناقص لو ناقص
راح يخبط الجير معك
وأنصحك لو تخصص سياره للسحب تكون ٣٠٠٠ ريال او ٤٠٠٠
مثل سوبربان قديم موديل  ٨١ او ٨٢ قوي ويسحب بكل راحه
وهذا ما يكلف ٦٠٠٠ علي حسب مقاولتك مع الورشه
وثق بالله انها مواصفات حلوه وثقه وحتي لو تبي تبيعه
ما يقل قيمته عن ١٥ الف ريال
ونصيحه لا تبخل تركب من الصيني لا ما راح يدوم معك
وتحياتي
 

ونسيت اقولك للامان 
اذا كنت تسحب القلص لا تتعدي ٨٠ ك/ م 
وهذا للإمان فقط لان القوانين الامريكيه والاوربيه 
ممنوع تعدي ٨٠ ك/م علي اي نوع من القلص 
ويسمونه تريلر ان كان للسحب السيارات او للسحب 
الدراجات الناريه او لتحميل الأغراض والعفش
وما وضعت الا للامان والحمايه 
لا تصير نفس بعض الشباب يتفاخر انه وصل وهو مركب
القلص علي سرعة ٢٠٠ ك/م بتفكيره انه وصل القمر او بلط 
البحر الأمان ومن ثم الأمان لان القلص له ردات فعل كثيره
واتمني أني افدتك باللي تبيه  

نصيحه ركب اربع كفرات عشان اذا جيت تسحب يكون خفيف ومايثقل على سيارة السحب