إقتراح بشأن البخاسين في الموقع

هذا وانا وخوك نوعين النوع الاول عندهم حسد يبون يخربون على الرجال الي عارض
وفي نوع ثاني الي هو الشريطي واعذرني مقدر اعطيك لايك

اخالفك الراي كل واحد يسوم حسب قدرته ان خارجت مع راعي السيارة باع وان ما خارجت فالله هو الرازق . 

انا اسوي كذا دايم ولكم احلي لايك 

طيب وش رايك في واحد يقول تاهو 2008 ال تي مسيوم ب 90 الف ؟

هنا انا اجي واقول اسوم ب 70 ألف

لان حده 75 الف وان كان نظيف نظيف وممشاه تحت 100 الف يسوا 80 الف

وهذا يقول مسيوم ب 90 الف وهو 2008 واستاندر

وش بقا لل2010
2010 ينباع ب 90 الف  

مثل مافي مبالغه في الاسعار في بخس وبعض الناس يبغى يشتري مستعمل بربع قيمته وحالت السياره جديده ومايرضى

هو حراج بالنهاية = مزايدة !!!! محد ضرب على يد أحد و قال بعني بالسعر الفلاني ؟؟؟ يا حبيبي في بعض الناس من زود الطمع

ما يعرف يكذب , واحد عارض جيب أودي الصغير Q5 موديله 2009 و ماشي حول 150 ألف !!!! و طبعاً ما هو فل كامل

المهم نزل إعلان عن سيارته و إنه مسيوم ب 100 و الحد 105 !!!1 طبعاً سعره مبالغ فيه و قلت له هالشي !!! المهم جلس

كم يوم الإعلان و لا جاه مشتري , ثم نزل إعلان و حاط الحد 100 ألف !!!! و هو يقول إنه مسيوم ب 100 قبل , ولا جاه

أحد بعد !!!! و اللحين نزل الحد ب 95 ألف !!!!! ولا أتوقع أحد يشتري !!!! لأن حده بالكثير 75 إلى 80 ألف لا طق خشمه

فالواحد لازم يكون صادق و صريح من البداية !!!!! هو لو قال أبي المبلغ الفلاني ما أحد شره عليه !!! بس يقول مسيوم كذا

و هو ما إنسام , يا أخي الناس فتحت عقولها و صارت تعرف الأسعار زين أكثر من أصحاب المواتر أنفسهم !!!

مرة نشتكي من اللي يرفع الســـعر ، ومرة نشتكي من اللي يبخس السـلعة

واحــترنا بين نارين ،،

هذا موقع حراج ،، يعني السوم دائمــآ يبدأ من ريال ، وبدون زعل ، لأنه حراج أعجبك بيع ما أعجبك لا تبيع ،،

ولا تنسى فيه ناس يحدون بأعلى من سعرها ، فإذا أعجبتني السيارة عطيتها اللي أشوفه مناسب بغض النظر عن الحد ، إذا هو موافق أوكــيه مو موافق مو لازم يبيع

أنا مرة عرضت سيارة وساموها بــ32 وهي تسوى 45 ، ما زعلت قلت له لا سومتك ما تخارج ،، وانتهى الموضوع ،، لا زعل ولا شيء ،، بائع ومشتري ،،

شخصياً إذا لقيت السعر مبالغ فيه وكنت ناوي أسوم أرسل رسالة على الخاص أسوم فيها وأوضح وجهة نظري لصاحب السلعة

لأن كثير من الناس ممكن يكون عنده وجهة نظر أو واحد سام السيارة وما هو جاد فيغتر صاحب السيارة

وصدقوني الي جاد بالبيع بيقتنع بأعلى سومة خلال اسبوعين بالكثير

والبعض ماهو جاد يقول إن جابت السعر الي أبغى ولا أنا استخدم

يالحبيب البخس امره سهل 
تقدر تحذف رده وتسوي له حظر وتبلغ عليه الداره وانتهى الموضوع ومايقدر يرد مره ثانيه على اي اعلان لك
موضوع بسيط وحله سهل متاح لكل شخص

المصيبه فالي يجي يقولك سيارتي 2009 ماشي 140 الف مسيوم ب69 الف ؟؟؟؟؟
ومديلات 2011 فحدود 69 و 70 
ولا تلقى اعلانه له شهور مخمج مالقي احد يشتريه
واذا جى احد اعطاه سومه فقيمة السياره اللي تستاهلها 55 يزعل ويقول ليه تبخس تراه مسيوم ب ب69
>>>>  اختصر علينا وقول انك تبي فيه 70 وخل هالحركات القديمه

البلا مو فالبخس البخس قلت قبل حله بسيط حذف الرد وحظر العظو وانتهينا 
لكن البلا يابو عقاب اذا جاك واحد حاط سومه لموتره تجيب قيمة موتر وكاله جديد هذا وش تقوله

وكلنا عارفين ان الموتر ماسيم ولا شي بس هو يبغى سعر في باله وخلاص
صارت حلى من كل جى عرض موتره وفباله سعر راح صفق ابوها بسومه خياليه 

الغلط على اللي ينزل الاعلان 
المفروض يكون على بينة في امره 
اما ان يعرض السلعة ويقول حدي كذا وينتظر الى ان يرزقه الله
او يقول على السوم ويذكر اخر سومة على شرط ان يكون صادق في سومته وتكون حقيقية
واذا جا واحد وسام اقل من سومة صاحب الاعلان الشهود عليه هم الاعضاء والفاهمين بالسوق
لكن صراحو اغلب المعلنيين مو جادين بالاعلانات حقتهم ويحطلك سعر خيالي او مبالغ هذا مو جاد
اللي جاد ويبي يترزق الله او نفسه طابت من سلعته يحط السعر الحقيقي والمرغوب بالسوق 

ابو عبدالله كلامك عين العقل

صاحب الاعلان اذا له سعر فباله يقوله افضل من الكذب ويحط سومه من راسه عشان يوصلها للسعر اللي فباله

انا مثلا ابي فسيارتي 100 وهي حدها 40
اقولها صريحه المطلوب فيها 100 الف 
افضل من اني اجي اكذب واقول 
سيمت على الخاص ب 50
وعلى الجوال ب60
ومن زميل عمل ب70
ومن شريطي ب80
ومن واحد وقف عليها ب90
والمطلوب 100 ((((( اختصر علينا وقل انك تبي 100 الف )))) ووفر الكذب 

لان الاسعار معروفه وواضحه 

صحيح كلامكم جميعاً ... ولكن انا ذكرت النقطة هذه في الموضوع ,,,, فمن حكم في ماله فما ظلم .... :) ,, لذلك انا اتحدث عن فئة معينة مثلاً وبخس واضح علناً بمعنى انه سيارة مثلاً بي ام دبليو موديل 2011 وصاحبها حاطها حد مثلاً في الاعلان ب 260 الف وقال مسيومة 240 مثلا .. وجا صاحبنا المدرعم كاتب له اسومها ب 150 ... طيب كلنا انها 150 ماياخذها تشليح .... هنا المقصد .... اما اصحاب السيارات ابو انسامت ع الخاص وانسامت في العمل وانسامت في البقالة .. ف مع نفسه .... سيارته جالسه عنده وماحد بيشتريها ولاحد بيطالع فيها ... وبيصير نفس خوينا اللي رد في الموضوع كل يوم وهو منزلها في اعلان جديد بسعر جديد
وبكذا راح تحمض عنده وماراح يبيع الا بالمعقول ...