المحتسب..والحراج.. والشريطية..الله يكفينا الشر...تعريف الشريطي

23 8

لايمكنك التصويت حتى الحصول على 20 نقطة على الأقل
إضغط هنا للإخفاء

وجه البومه 202
قبل 10 سنه و 3 شهر

السلام عليكم ورحمة الله وبركاته








قدر الله على اخوكم وقرر قبل كم يوم أن يتجه الى حراج السيارات علشان ابيع سيارة عندي...وكنت مقرر أن تكون غزوتي لحراج السيارات بعد صلاة العصر من يوم جمعة ..وعندما اقتربت من موقع المعركة عفواً اقصد من الحراج..إلا وتناقز قدامي الشريطية(سيأتي تعريف الشريطي لاحقاً)...
اقول....
تناقزوا قدامي ....وقف ياولد..وقف ياولد..الموتر للبيع؟؟؟
انا: نعم 
هم: سيمت؟؟
انا: لا
هم: كم حدك؟؟؟
انا: سوم
هم: قول أنت
انا: ماعندي حد .....سوموا
هم: نقلب الموتر بـ 20(علماً السيارة تسوى 40)ماهي مثل سيارة حمود القرمبع 
انا: اللي يبي يقلب السيارة بـ 40 حياه الله
هم :توكلنا على الله وخر عن الطارة
نزلت من السيارة ...وركبها شريطي ومعه 3 من الشريطية كأنهم عصابة..واول ماعشق السيارة ...حول عن الخط ونزل الدرب الترابي 
انا: ولد...ولد صبر ..صبر وين رايح ؟؟؟
هو: نجرب الموتر
انا ياخوي انا بأبيعك سيارة ماني بايع (حراثة) الله يهدينا وأياك..ليش ماتجربها على الخط الرئيسي؟؟؟
هو: طول بالك علينا
انا : خير إن شاء الله لكن على هونك لاتكسر الموتر
هو: خير إن شاء الله
المهم جربها الحبيب..وبعدين اخذني على معرض بعيد عن المعارض..(شكيت أنهم بيخطفوني)
انا: وين رايح يابو الشباب
هو :المعرض
انا وانا اتراعد: وين هو معرضكم؟؟
هو: هناك في الأخير
نزلنا من السيارة وجا 3شريطية غيرهم وفتحوا الكبوت حق السيارة..وقلبوها يمين ..يسار..
واحد منهم: ولد السيارة هذي مصدومة
انا: افا وانا ابو تركي ...مصدومة؟؟؟!!!!
هو: نعم تعال شوف الرفرف من هنا
انا : ياشيخ اذكر الله مافيها ولاصدمة ..الموتر موتري من يوم شريته وهو معي
هو: حتى الشنطة مصدومة
انا: لا إله إلا الله..شايفني امشي واصدم خلق الله
هو :شوف يالحبيب السعر اللي أنت قلته كثير..
انا: ياخوي الحين فرفرت فيني طول العصرية والحين تقول الموتر مصدوم..وهو لا مصدوم ولاشي
هو: نبيك تراعينا في السعر
انا : خير ....بكم تبونه؟؟
هو :بـ 27 الف
انا : أذكر الله 27 الف؟؟!!!لالالالالا ماهو معقول
هو: شوف الحين قرب المغرب وحنا نبي الموتر والسوق خلص الحين .مامعاك إلا احنا...قول تم وخذ قروشك الحين وتوكل على الله
أنا: تعرف تفارقني مادام النفس طيبة عليك
هو: طيب ...مدها...
انا بأستهبال: وش هي اللي امدها
هو: يمناك لاعدمناك
انا: وش تبي في يمناي
هو :اقول بعت بـ30
انا: لا وبطلت ابيع خلاص خليها توقف في البيت احسن بطلت ابيع..تعاك يالحبيب..تعال...تعال..
انا: اقول توكل على الله بطلت
واخيراً جاني شخص ثالث يقول: اسمع يالطيب تبي الصراحة ذولا مايبون يشترون..
بعت بـ 35 وفلوسي جاهزة..
انا: ياخي بطلت ابيع مع السلامة
وفعلاً خرجت السيارة من المعارض ووقفتها في صالة لين يجيها عريسها




أسرار بيع السيارات المستعملة (طرق الوقاية من الشريطية ) 




تعريف الشريطي :- 




الشريطي هو رجل نصاب محتال لا يخاف الله وأحيان تجدهم مجموعات تتكون من ثلاثة إلى أربعة أشخاص لا تجد خامس بينهم , يتجمهر في مدخل المعارض أو على سيارة بائع للعب على المهابيل من بعض خلق الله الذي جاء لبيع سيارته أما لحاجة أو لتغيير سيارته . 




أساليب الاحتيال :- 
- دائماً تجد الشريطي يخفي عن العالم أنه شريطي فمرة تجده ( حاسر ) ومرة لابس ( طاقية ) ومرة ( نظارة سوداء ) ومرة ( جنتل ) وهكذا , وإذا جاء يسوم منك السيارة يقول لك أنا مو شريطي أنا جاي من الحفر ( حفر الباطن ) أو من القصيم وتحصله دائماً يسب ربعه الشريطية ويقول يلعبون على العالم وما يخافون الله ( يبعد الشبهه عن نفسه ) . 




- في بعض الأحيان تجد الشريطي معه ولد صغير ( أبنه ) حتى يبعد الشبهة عن نفسه , كأنه جاي يدور سيارة لولده وهو شريطي محتال . 




- ودائماً يبخس ثمن السيارة حتى لو كانت جديدة وينزل سعر السيارة إلى أبخس الأثمان _ يعني _ سيارتك تسوي في السوق 70 ألف أول ما يسوم يقول لك _ 48 ألف _ ومن بعدها يسوم بسعر أعلى , وأحيانا لم يقرب من سعر السيارة يعني 62 أو 63 والسيارة سعرها _ 70 ألف _ تشوف الشريطي يرمي عليك العربون ويطلبك بنخوة عربية , أو تشوف ثلاثة أذناب _ شريطية _ معاه يقولون لك ( تراها قيمة طيبة والله ) ومن هذا الكلام . 




- تجد الشريطي يحاول يركب السيارة أو يقول لك أنزل بسوقها وهذا ( غلط ) لأن ما يركب السيارة أو يحاول يسوقها الإ اللي أعطى سعر يعجب صاحب الحلال أو فرق سعر السيارة عن سومة وقبل صاحب الحلال بالسعر اللي عطاه الشريطي ولا تنسى أن الشريطي المفروض ما يركب السيارة الإ تكون أخذت عربون _ أقل شي 500 ريال _ وبعضهم محتال ونصاب يقول لك ما عندي عربون ..!! هذا لا تخليه يحرك السيارة ( أطرده ) . 




- بعضهم يتفقون شريطية أثنين عليك حتى يعرفون حدك في السيارة يعني أنت دخل السوق ووصلت السومة 64 ألف ولم تعجبك السومة يقولك الشريطية كم حدك , لا تقول له كم حدك قول لك أنت سوم عشان _ تكفشه _ يعني لو فرق وقال 65ألف تقدر تقولهم عطني عربونك وكذا يكون أرتبط معاك وتحصل دائماً مكالمات جوال بينهم ( مثل الحرامية ) . 




- دائماً حاول أنك ما توضح السعر اللي أنت تبيه وترضى بالسومة الأولى _ في أول مرة تجي المعارض لبيع نفس السيارة _ لان الشريطية يعرفون شكل السيارة لو جيت مرة ثانية ويعرفون أنك مضطر للبيع وينزلون سعرها لأن يخبرون بعضهم بعض فتحصل الشريطي أول ما يسألك عن السومة يوقف بعيد ويدق جوال يستفسر . 




- لا تخلي شريطي يجرب السيارة أو يركب مكان السائق الإ والعربون في جيبك لا يلعب عليك ويقولك دقيقة ولا شوي ولا روح للمعرض الفلاني ثواني والإ يركب معاك يقول أمش شوي في السيارة الإ والعربون معك عشان ما يدخل إلى معرض تابع لهم ويجتمعون عليك أربعة والإ خمسة شريطية يضيعون وقتك في السوم الفاسد , يعني السيارة قبل 10 دقايق أنسامت بـ 65 يقولون لك هاه راحت بالــ 60 ألف ...!!! أنتبه . 




- لا تعطي حدك في السيارة دائماً وأصر على كلمة ( سوم ) للشريطي حتى لو كانت السيارة مسيومة قول له أفرق السوم لأنه بعضهم يقولك والله فيه رجال موصيني على نفس الموتر ويبي يعرف سعره عشان أخلص معاك , وبكذا يعرف حدك ويصير تعميم عن حدك وبعدها الكل ينزلك ألف وألفين من حدك في السوم . 




- لا تعطيهم رقم جوالك الإ اللي ( صامل منهم ) لأنهم أنذال يأخذ رقم جوالك يدق عليك دقة وحدة عشان إذا ما بعت السيارة تتصل عليه وتقول له أنت اللي سمت سيارتي بهذا المبلغ خلاص ببيع يروح ينزلك 4 ألاف ولا خمسة ألاف . 




- لا تقول لشريطي عن سيارتك أن فيها كذا وكذا وأتركه يكشف السيارة وإذا سألك عن شي قول له الموتر قدامك , لأن هذه طريقة تعاملهم ما يعلمك إذا في السيارة صدمات , أو تخبيط أو غيرها الإ إذا كنت واثق من سيارتك
اعتذر عن الإطالة لكنهم والله ضيعوا معي يوم كامل وانا اختصرت قدر الإمكان
اترك لكم المايك للتعليق وتعطونا لو حصلت لكم مواقف مشابهه
محبكم  : وجه البومه

منقول للفآئده والاستمتاع وهبولنا شويه من الايك ^_^

إبلاغ

الردود