كيف تحافظ على سيارتك لعمر اطول

16 2

لايمكنك التصويت حتى الحصول على 20 نقطة على الأقل
إضغط هنا للإخفاء

nareh 62
قبل 10 سنه و 8 شهر

بسم الله الرحمن الرحيم
انه منقول للفائده

صراحة انا شفت استخدامنا احنا كاشعب وتقيمي له اشبه بالمنعدم بدون التعميم على الجميع 
كيف تحافظ على سيارتك وليش ؟ 
انا اقولك 
وش الفائدة من المحافظة على السيارة ؟
1 / تبقى السيارة شد بلد وعزمها وحالتها الداخلية والخارجية ممتازة لدرجة ان البعض بيحسبها جديدة
2 / ماتتفكك وتتهربد بسرعة 
3 / عند البيع تكون مرغوبة جداً جداً ! وسعرها ماينزل ولا ريال واذا كنت محافظ على سيارتك وشاف المشتري هذا الشي بيسوم السيارة بسعر عالي لأن حالتها نظيفة عكس بعض السيارات ! 
4 / تمشي بسيارتك وانت مقتنع لأن مظهرها حلو وحالتها ممتازة 
وغيرها الكثير الكثير 
طيب نبدأ بالمكينة وهي اهم شي 
الوقت المتوسط عند تشغيلك السيارة هو 30 ثانية عشان الزيت يتحرك جوا المكينة وتتزيت مزبوط ويفضل 45 ثانية 
ثانيا انه تمشي بالسيارة بالتدريج في الحارة يعني شوي شوي والمكينة تسوي الباقي موب على طول تشغل وتدوس كذا راح يقصر معاك عمر المكينة وراح تدخل في دوامة تصلح شي يخرب شي 
وبالنسبة لعناية المكينة لابد لابد ! تسوي صيانة بنفسك كل اسبوع تشيك على الزيوت زيت جيربوكس مكينة بريك..الخ , وضغط الكفرات والفلاتر بهالطريقة السيارة راح تمشي معاك زي العسل
وعلى قولهم السيارة تعكس تعاملك  

البودي / حافظ على نظافة السيارة الخارجية واحرص انك ماتوقفها في الشمس لمدة طويلة وغسلها وحافظ على عناية البودي عشان يكون مظهرها 100% 
داخلية السيارة / فيه ناس تجي تشتكي تقول الطبلون عندي مشقق والي يقول مكسور والي والي .. ي اخي الكريم وقت ماتوقف السيارة حط عازل للشمس عشان تتفادى هاذي المشكلة 
عشان مايتقطع الجلد , ماتهتري السيارة من جوى , تبقى شد بلد من داخل ! 

الحين بالنسبة للأستخدام بعطيكم كم نقطة لأستخدام السيارة بشكل صحيح 
1 : لا تدعس بالسيارة لأن التسارع الشديد يخلي الزيت يرجع ورى فا المكينة من قدام تعطش للزيت واذا دعست فرامل بقوة الزيت بيرجع قدام وتعطش للزيت من ورى ! ومع سالفة الدعس المتكررة المكينة راح تودع وتقول لها باي باي  
2 / حاول تتفادى المطبات والحفر بأكبر قد ممكن عشان ماتعدم لك الكفرات وتفكفك السيارة !

س / هل اشغل المكيف اول ما اشغل السيارة ؟ 
ج / نعم تشغل المكيف وماعندك اي مشكلة لأن البكرات الي قدام تعرف شغلها 
نصيحة / لا تخلي قوة الكومبروسر على اقل شي مثال : عندي في الجمس كنت اشغل المكيف واخلي البرودة على 16 ! .. لكن غيرته خليته 18 او 19 عشان ما اخلي الكومبروسر يشتغل بأقصى طاقة طول الوقت , عشان كذا هالحركة بتطول بعمر الكومبروسر وراح يشتغل على اكمل وجه بأذن الله

لا تطفي السيارة والمكيف شغال لأن هذا بيضر على البكرات والسير ,, بعدين تتفاجئ ان السير انقطع معاك  
للي بيركب شاشة , او بيلبس الأرضية وغيرها ..
ي اخي الكريم لا تخلي ابو هنود يلعبون لك بكهربة السيارة ويجرحون الأسلاك الأصلية , بعدين تجيك مشاكل بالكهرباء لا سمح الله والوكالة بتجحدك وبتقولك محد قالك تركب في مكان غير مضمون
ملاحظة : نظف سيارتك داخلياً وخارجياً اسبوعيا عشان تحافظ على نظافة المقاعد والديكور الداخلي 

غير هذا كله السيارة زي ماقلت تعكس استخدامك 
تسرع وتجلد الموتر زيادة على اللزوم بعدين لاتشتكي اذا السيارة تطلب كثير 
على قول الرسول صلى الله عليه وسلم الرفق ماجاء في شي الا و زانه 
انت ارفق على موترك وخل رجلك (الله يكرمكم) على الموتر حنينة على قول المصارية  

وصدقوني اذا كل واحد حافظ على سيارته بكل الطرق والله مابيفكر يغيرها لو موديلها 1387 

إبلاغ

الردود