هل جربت تشتغل في سيارتك بنفسك ؟

بالنسبه لي أشتغل بنفسي في كثير أشياء في الموتر .... وأشجع كل سائق سيارة يعمل كذا وصدقوني بتخف ظاهرة النصب

حق الورش ....... لايك .

اخاف اجيب العيد , فعشان كذا افضل اني اوديها ورشه :)

والله هذا الرجال الي انت تكلمت عنه اني احترمه
يعني فيه بعض الاشياء تروح عند الهندي يقلك تغييره ب 50 او 100 ريال واي واحد يقدر يغيره
قبل فتره رحت عند هندي سالته عن الضوء الخلفي قلي 20 ريال قلتله ركب
لمه ركبة اعطيته 50 ريال رجعلي 10 ريال ههههههه
يبي ينصب علي 
قلتله ويييين رايح انت ليه خصمت 20 ثانية 
يقلي هذا حق التركيب ،،  قلتله يعني بتاخذ نفس حق اللمبة انت ايش الي سويته
المهم والله يا شباب ان الهنود وانا ما اقصد الهنود كجنسية لكن كل الي بجنوب افريقيا 
انهم ينصبون علينا واحنا ساكتين لازم نغير من وضعنا

الحمد لله كم مره افك واركب بالموتر 
وتجيني فتره تقول هذا ملجلج تلقاني الساعة 12 بالليل جالس تحت الموتر ازين فيه شيء 
او امسح السياره 
ومره من الفضاوه فكيت المراتب الخلفيه اول مره 
ولقيت تحت من الوصخ من راعيها الاول ونظفتها 
ومره فكيت الديكور اللي عند القير ورجعته مكسور 
وفكيت ديكور المكيف جهت السواق وكسرت الايطار حقه 

ويا ابو يزيد والله هذي المشكلة 
ياخي طيب خربانة خربانة
يعني اذا بتبلش فيها بتخربها
طيب هي اصلا خربانة وبعدين حتى اذا فكيتها وما عرفت تكمل عادي
لمة تروح عند الميكانيكي وتشوف كيف يصلحها تاخذ خبرة
يعني اذا خرب عليك مرة ثانية تعرف تصلحة لوحدك

موضوع جميل .....
انا عن نفسي ما اروح الورش الا للحاجات الصعبه
لكن الحاجات الخفيفه انا اسويها بنفسي وماعندي اي
مشكله اذا خربت شي او كسرته 
احس حالي مبسوط وانا اشتغل في سيارتي او في البيت او اي شي 

ما اروح  على الورشة  الا على عشان  الرافعة   ولو عندي رافعة  ما يشوفو  وجهي  حقين الورش  

اذكر مرة انا والوالد الله يحفظه غيرنا المساعدات واليايات حق البيوك رود ماستر تحت البيت 

طبعا حاليا عندنا ماركيز غيرنا فيه اقمشة و بكرات وشداد وسير ونظفنا الثروتل و غيرنا الكويلات وغيرنا لمبات الطبلون وشحمنا الجلود تبع المقصات وامور بسيطة تحت البيت 

والحمد لله ما نحتاج للورشة الا في الامور الكبيرة اللي تحتاج حفرة او عدة صعبة 

كنت اشتغل بالسيارة بنفسي ايام الدراسة اما الحين الله يخلف يمكن لو بنشرت بحمل السيارة بسطحة ههههههههه. 

واللي يعرف يشتغل لكن مايعرف وين الخلل وش يسوي؟

>> مرفعه حرارة السياره !!

اكيد جربت اشتغل بسيارتي  

 وياليت بس عندك مكان وعده  والله اشتغل بسيارتي  بنفسي واوفر 

اللي ما يعرف يتعلم واللي يعرف ما جاته المعرفة من الهوى ولا خرج من بطن امه عالم 

لازم تتابع الورش وتجلس معهم وتتعلم وتجرب وتغلط مرة واثنين 

لكن مشكلة اكثر الشعب انه يرمي سيارته عند الورشة ويقول برجع لك في الوقت الفلاني او اذا جلس ما يتابعه يعني بس يوقف ويتمشى في الورشة بين القطع

سيارتي كامري 2005 ركبت لها صدام وشمعات واصطب خلفي وفلتر البنزين وكشافات ومسجل ولامبات الديكور حقت المكيف وبواجي ومساحات واشياء اخرى والحمدلله وفرت فلوس وافتكيت من شغل الورش

 لمعت الاسطبات والانوار الامامية وركبت براقات ..وكمان نظفت فلتر الهواء والمكينه ..حساس الشكمان كمان نظفته 
لمعت داخلية سيارتي .... اتمنى يكون عندي حفرة بس والله لا أبدع في السيارة بس للاسف مافيه

لا ما احاب افتي من راسي باشياء ما اعرفلها والاسعار عارفينها يعني اطلق شنب ميكانيكي او كهربائي ما يقدر يبلفني بس انا شخصيا ممكن اسوي اشياء بسيطة مثل وزن شمعات تثبيت صدامات كذا يعني 

انا مره وحده كنت ابي انظف منظم الهوا بنفسي وجبت العيييييييييد ما عرفة ارجعه لكن طلبة صديق من احد الورش المجاوره وعدة على خير ويقولك المثل اعطي الخباز خبزه حتا لو اكل نصه وسلالالالالامتكم

انابصراحه ماشتغل بنفسي لكن عندي خبره الحمدلله في تشخيص الاعطال انادايمن لم اروح لميكانيكي اقوله غير كذا وغير كذا بس وامشي من عنده وتطلع كل الخرابات من الاشياء الي غيرناها

@# ياجماعة  انصحكم نصيحة لوجه الله

لاتشتغل في سيارتك اذا كانت مو ب اسمك او شي زي كذا 

لاني دايم اشتغل في سيارتي وقبل اسبوع كان الوقت قبل العصر الساعة 3 يمكن 

كنت شغال في سيارتي عند البيت وفاك الديكورات والكبوت وكذا جا عسكري بيب بيب رحت له 

قال وش تسوي ؟ السيارة لك ؟

قلت ايوة حقي وقاعد اصلح فيها

قال جيب الاثباتات  اخذها ورفع القزاز

واتصل ع المركز يحسبني سارقها او مبلغ عليها وانا قاعد ازيل اثار الجريمة

المهم وانا واقف جنب سيارته هو طول وانا طفشت رحت اكمل شغل وخليته يشوف شغله

شوي دق لي بوري وناداني ب اسمي جيت اعطاني اوراقي وراح

..وانا الحمد لله وضعي تمام رخصة واستمارة السيارة وتامين كلله ب اسمي



وما حصل شي الحمد لله

اذا كانت مو باسمك يمكن يحسب سارقها وقاعد تغير معالمها او اي احتمال ثاني

يعني ينصح الشغل في مكان مغلق للشغل الكبير اما تغير لمبة وكذا عادي ماتاخذ وقت

بس شي يبغاله فكفكه ووقت !! هنا المشكلة

يلا الله يحفظكم

أنا ولله الحمد اشتغل بيدي من كل شي والشغلات الكبيره وانا انزل مكاين لوحدي واستمتع
بالشغل وانا ما عندي مانع لو اقعد ساعات بس بالشغل بس اهم شي عندي أكون مروق ولوحدي
ويا كرهي اذا تجمعت علي الجيران فوق راسي اللي يسأل واللي يفتي من راسه واللي يسرق من 
العده ولا يجيك واحد يقول ابي مفتاح كذا وارده لك.
وتصير معي مواقف بالشغل اذكر مره شريت شفر كابريس وشلحته عند الباب وانا قاعد اشتغل ولا 
ما حسيت الا البحث فوق راسي قال وش تسوي قلت شوفت عينك قال سيارتك قلت ايه وانا السياره 
شاريها من وأحد اعرفه بدون نقل او أوراق قال يعني السياره لك مو مسروقة قلت يا اخوي بالعقل 
اجيب سياره مسروقة وعند بيت الوالد افككها كلمني بالعقل اقتنع الرجال بكلامي مع انه ما شاف 
حتي اثباتي قالي يا اخوي انتبه ترا في واحد من جيرانك هو اللي بلغ عليك وانا جيرانا اعرفهم من 
سنين وعلاقتي معاهم زينه وراح الرجال وألحقه وأمسكه من يده واحلفه بالله من اللي بلغ قالي يا ابن
الحلال والله ما اقدر أعلمك ولا اعرفه انا جاني الضابط قال الموضوع كذا كذا ورح شف وش موضوع 
الرجال والسياره وهذا انا جيتك وبعدها مشي الرجال وما شفتها بعده .
واذكر مره صار موقف معاي طريف ويضحك عندي اثنين من جيراني مسميهم يأجوج ومأجوج والرجالين
هذولا ودهم يتعلمون الميكانيكا وهم بطات الواحد فيهم وزنه فوق ١٠٠ واذكر مره قاعد اركب ماكينة شفر 
مشبوكه مع القير وعندي رافعة البلانكو فيه كم سن مكسوره وهي ترفع بس لما توصل عند السن المكسور 
تفرط ولازم ارفعها بسرعه ورفعة الماكينه والقير لاني ابوزنها علي كرسي الماكينه مو راضيه تدخل ولما اشوف
وش عند الكرسي ولا لي الكمبريسر طايح علي الكرسي وارفع الماكينه فوق ورفعتها بارتفاع كبير ولا تفرط الرافعه
وتجي الماكينه مروحه علي والرافعه اذا فرطت صوتها عالي ومزعج وتنزل الماكينه بسرعه وأمسك الجنزير بيدي وثبتت
الماكينه والحين لازم اثبتها وارفع راسي وانادي ياجوج ومأجوج يا فهد يا عامر ولا ما حولي احد اتريهم لما طاحت الماكينه
يحسبونها طاحت علي وذبحتني وهربوا لبيوتهم من الخوف هههههه والله وانزل الماكينه واحط سكروب بالجنزير واثبته ونزلت 
الماكينه بعدها شوي شوي قلت يا رجال الحين انا تعبت وانا سهران والحين الفجر خلني اجمع العده واروح أنام والعصر أشد
الماكينه والمسامير ورحت نمت وأقوم العصر وأكمل شغل ولا ما حسيت يأجوج ومأجوج فوق راسي هههههههه يقولون انتي حي 
ما مت نحسبك مت وقلنا اكيد عند بيتكم عزا ههههههههه والله هالموقف ما انساه طول عمري وصارله اكثر من عشر سنين وياجوج 
ومأجوج تزوجوا وعندهم عيال الحين واذكرهم بالموقف هذا واضحك عليهم 
والله ياما تصير معي مواقف بسبب الميكانيكا .
أشكرك علي الموضوع 
وتحياتي لك ^_^