أضف سؤال أو موضوع جديد          

X الرجال شكله صادق مايحتاج فحص _ كلمه خسرت ناس كثير X

up 17 down 3
ابو يزيد 000 8712
قبل 8 سنه و 2 شهر



السلام عليكم ورحمة الله وبركاته

كيفكم عساكم طيبين ان شاء الله

اليوم ابتكلم عن الناس اللي تشتري سياره بدون فحص كمبيوتر 

يعني الواحد يشوف السياره ويجربها و يفحصها بنظره , وصاحبها طبعا بيقول نظيفه مافيها شيء وانا اقصد ( الشريطيه ) 

ولا الناس اللي فيها خير كثير يارب لك الحمد

لكن لا نزلت المعارض او واعدت واحد بالنت وعلى كلامه السياره مافيها  رش ونظيفه

طبعا قليل جدا جدا اللي عنده نظره منثقبه >> متعوب على هالكلمه 

يعني يعرف الرجال من شكله اذا هو صادق وعاقل و يعرف ان السياره فعلا بوية بلدها وعنده خبره في السيارات واكيد كان يبيع ويشتري ويصلح سيارات وعنده خبره كبيره

لكن الناس اللي ماتفهم او فهمها ماهو ذاك الزود وانا اتكلم عنا إحنا , يقوله الرجال بويه بلدها , تجي انت تطالع مافيها شيء وعلى خبرتك المتواضعه بتجربها وتشوف ان مافيها شيء , وفي الاخير لا شريتها تبان العيوب , يطلع تقشير بويه في محل وتعرف ان هالجزء مرشوش وتحس ان اللون هنا يختلف عن اللون اللي هناك و تكتشف انه مضحوك عليه

طيب ليه ما تفحص , يعني مستخسر 200 - 300 ريال !! نحاك بتشتري سياره ب 20 - 40 - 80 - 120 ..الخ , يعني وقفت على 200 او 300 ريال !!

ابقولكم سالفتنا


نزلنا قبل كم سنه للحراج ندور لعمي سياره فورد , حصلنا الفوردات 2003 على 35 الف ريال , وشفنا وحده شكلها نظيف كذا , وسألنا عن سعرها وقال مسيومه ب 25 الف ريال !! , قلنا طيب ودرنا على السياره وشفناها نظيفه وخبرتنا كانت متواضعه وصاحب السياره وخويه كبار بالسن يعني 40 سنه تقريبا وواحد منه للأسف مربي لحيه ( ما يسمى بالمطوع لانه ما يسوا نعال المطوع الصادق )

المهم ويقول السياره نظيفه وعلى الشرط , بس جاها ضربه على الابواب اليمنى مع الرفرف الخلفي فقط , درنا وشفنا السياره مره ثانيه نبغا ندقق في البويه الا والبويه مافيها فرق , شفنا الابواب نفس بويه السياره بس في التنده ضربه ويقول هذي من اثر ضربه الابواب , الابواب اثرت من التنده لانها ضغطت على التنده من الحواف , المهم وكلمنا عمي قلنا الرجال كبير بالسن ومطوع والسياره على نظرنا الان نظيفه مافيها شيء ويقول مسيوم ب 25 قال افرقوا 500 وفرقنا وقال اقل من 28 الف ماني بايع , ومنا ومنا الرجال ملزم , وقال عمي خلاص انا بجيكم اشوف السياره ونجربها , وعمي مثلنا ويمكن اغشم منا في السيارات 

شاف السياره بويتها نظيفه وجنوط بلدها والداخليه نظيفه وملمعه السياره من جوا ومن برا , وانوارها الاماميه نظيفه ( راس مالها 200 ريال طقم انوار ) وجربها وناسبته , وحاولنا في الرجال وباع ب 27500

شراها عمي , بعد استخدامه لها بشهرين , سار الكفر الايمن مايل شوف , يعني السياره طارتها مستقيمه , والكفر الايسر مستقيم و الكفر الايمن في ميلان خفيف كاني لاف الدركسون شوي يمين !! 

بعدها بفتره يمكن شهرين ثانيه , سارت قشرة الطاره تتقشر , كل ما دق بوري ولا ركب مطب تتقشر الطاره ( بالتحديد البوري ) !! ولا يدري وش السبب وفي الاخير قريبي قال الارباق يا صاحبي طالع !! والرجال صلح الارباق ورش الطاره والحين بدأت تتقشر من جديد واقوله بالله صادق انت

ووالله واقول لعمي بغيت سيارتك شوي , واخذتها انا وخويي ويقول والله ان الارباق طالع , ومعي فورد ونفس النظام , ورحنا للصناعيه وفحصناه عند سمكريين ب 100 ريال فحص نظر , وقالوا ان الشاص الامامي مضروب والوجهه باين مرشوش وفيه سمكره جهه الرفرف و الارباقات طالعه والبودي مرشوش كامل !!

ياولد اذكر الله وش ذا الكلام , قال هذا الواقع , شفتوا الخساره الكبيره , لو اننا فاحصينها ما كان افضل , لكن الرجال غرنا بشكله الله لا يسامحه دنيا ولا  اخره , ويحلف ويقول والله مافيها الا ذيك الصدمه وعلى الشرط , حسبي الله عليه , نزلها للمعارض وسيمت ب 16 الف !!

فنصيحه لا عاد تثق بأحد نهائيا , لو لحيته واصله لسره , او انه عاقل , ياخي ماهي خساره 200 او 300 ريال , واللي يقول راعيها يقول سليمه ولا جيت اقوله طيب بأفحص عشان اطمئن ,  يقول يعني تكذبني يعني انا كذاب يعني !!

قوله مدامك واثق من سيارتك ليه ما تبغاني افحص , عطه بنص الجبهه , حركات الشريطيه ماتمشي عندنا , احجر له , ورح افحصها ماعليك

لو انه كبير سن شايب مايدري وين الله حطاه , افحص , وانا ما اكذب الشايب , بس يمكن الشايب يكون صادق , ولكن اللي باع له السياره ضحك عليه , عرفت كيف 


وقريبي شرا ماركيز 2010 ماشيه 8 الاف يقول شراها ب 55 الف , يقول نظيفه جدا !! , قلت والله سعرك صيده , يقول تصدق انها مرميه بالمعرض ولا احد شراها لها 8 شهور واقفه , رزقها مكتوب لي هههه !! قلت ياولد الحين انت شككتني , وقال ليه , قلت سعرك رخيص جدا على ممشاها و تقول لها  8 شهور محد شراها , اكيد فيها عيب , قال شف تراني غشيم بالسيارات , لكن والله هذي نظيفه تعال شوفها , ورحت شفتها , وعلى طول من اول نظره مرشوشه كامله !! , قال ياولد العب على غيري واجيب واقول شف البويه يا الحبيب , شوف كيف مموجه , ويقول ايه والله صدقت , واقول هذي بدايتها اجل وش تاليها 

على العموم هو غشيم بشكل ماتتصوروه , والمشكله شرا السياره بدون فحص , يقول شفتها نظيفه وقلت قيمه الفحص انا اولى فيها , والحين طلعت سيارته مرشوش كامله واكيد فيها بلاوي ثانويه لكن هو ماهمه , هو بس يسوق ولا يهمه شيء , اهم شيء سياره محركاتها نظيفه

وعندي مواقف كثيره والله لو اقولها ما بخلص وكلها عشان الواحد ما يدفع 200 او 300 عشان يفحص كمبيوتر

فنصيحه من اخ لاخوه , افحص مهما كان الامر , واللي تحسه يقول ياخي تكذبني ولا مشوار , اعرف ان سيارته فيها بلا , واللي تشوف انه مايبغاك تفحصها مره ويتفلسف اتركه ولا تعطيه وجهه قول الله يرزقك وخله مع الخرده حقته , وفيه بعض الناس لا قلت بروح افحص  يقول ابد افحص من الصدام للصدام ويالله مشينا على الفحص واختار اي مركز وانا معاك >> انت الحين بتقول اكيد مدامه واثق من سيارته و من كلامه ومصر على الفحص فشكل سيارته نظيفه فعلا وبوية بلد , وتجي تقوله , لا خلاص مايحتاج افحص و انت فيك الخير والبركه وتشتريها وبعدين ياقع الفاس بالراس , وتطلع انغشيت , حتى لو كان واثق ويقول افحص , رح افحص , ياخي اعرف واحد كان يقول ابد انا افحصها على حسابي يارجال و المركز اللي تبيه وقال له زميلي خلاص بافحصها بالمركز الفلاني وقال مافيه مشكله ويالله مشينا وتحسه ماله نفس يوم قاله , وزميلي يقول اشوف صاحب السياره مرتبش وشكيت فيه , ويقول هاه تبي تفحص ولا خلاص , قال ايه وش فيك , قال لا لا , بس قلت يمكن ماتبي تطب بالزحمه ونتأخر , قال لا مافيه مشكله , المهم وشوي يدق جوال , ويقول والله عندي ضرف ولازم اروح واعذرني وقال زميلي طيب دخل السياره بالفحص وارجع تكسي , وقال لا ابي السياره ومشغول وبرجع لك بعد ساعه ونص , ويقول زميلي من ذاك اليوم ماشفته 

يقول يحسبني مخفه وبأقتنع من كلامه , لكن والله لو ايش , والله اني بأفحص بأفحص , لكن يقول فيه ناس دلوخ تشوف الرجال واثق من سيارته وتحسب ان السياره نظيفه فعلا , وهو بس يقول كذا عشان لا تفحص

على العموم هذي بعض الصور اخذتها لكم من سيارات مصدومه ومصلحه , وشوفها كيف تلمع والله اللي مثلنا ما بيحس انها مصدومه ومصلحه اذا كان شغلها نظيف وملمعه ومقرطسه

فنصيحه افحص ولا تشاور احد , اترككم مع الصور

ملاحظه بسيطه : لا تــنــســوا تــقــروا ســورة الــكــهــف ( نور مآ بين آلجمعتين ) أدخلوا على الرابط واقروها , والله ما تاخذ من وقتك كثير , كلها ربع ساعه بس 

http://forums.fatakat.com/thread3390307


تحياتي للجميع , اخوكم ابو يزيد 





























إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


أهنيك صراحة على النظره المنثقبه ههههه
والله أنك صادق أخوي أخسر 300 ريال فحص أحسن ماأخسر 30000 الف ريال أصلاحات


up 6 down 0
كرومان 517
قبل 8 سنه و 2 شهر



اعوذ بالله

يا رجال ما يخافون من الله ذولا
يااااااااااااساتر


up 3 down 0
جمرة دفئ 240
قبل 8 سنه و 2 شهر



كلام صحيح وأنا اوافقك الرأي


up 4 down 1
rt abdollah 11 155
قبل 8 سنه و 2 شهر



ياخي منجد الكورلا في الصورة الاولى نفسها المصلحة 
والله يا اخوي بتجنن باينة وكالة من بلدها

+1


up 5 down 0
business to consumer 1163
قبل 8 سنه و 2 شهر



صح كلامك لازم تفحص
حتى لو اقرب الناس ليك  يمكن شراها من واحد وما يعرف عيوبها 
فالفحص ضروري جداً جداً جداً 


ما ادري يا اخي لما أقراء قصصك احس بمتعه 
ما ادري ليه  

وشكرا على الموضوع


up 2 down 0
hamodyaz 179
قبل 8 سنه و 2 شهر



بقولكم شي البعض يقولك وديه فحص  كمبيوتر مدري ايش ترا الكمبيوتر مايفحصلك الي حساسات فقط 
الاشياء المكانكيه ماتبان الي بفحص الطبيعي حتى اجهزت فحص السمكره ماهي قيقه 


up 1 down 0
تتركي 150
قبل 8 سنه و 2 شهر



يارجال اشوا بلا مافحصتو ولقيتو الانفسكم عذر
اما انا من 9 سنوات خذيت موتر من معرض بالنسيم كان له سنه ونصف طالع من الوكاله وماشي حدود 30 الف
المهم قلت بفحصه قال راعي المعرض حقك وطلع معي واحد وطلعنا عند حقين الفحص وقالي اختار انت
وفعلا وقفت عند واحد فيه مصري لحيته مترين الله لا يوفقه وفحص الموتر وقال وكاله
المهم طلع الموتر مصدوم من الامام والخلف وجيته ضربه عالجنب ومرشوش كامل وبعد سنه عافته النفس
وقلت ابي ابيعه والي عطاني سعر زين واحد شريطي وقال ابي افحصه وقلتله اوكي وطبعا انا معلمه
بكل شي وسبحان الله ياخذه ويروح عند المصري عن طريق الصدفه ويفحصه ابن الكلب ويجي يتفلسف
الموتر مرشوش كامل ومصدم وكذا وكذا المهم شريطي قال بنقص 5 الاف قلتله لا ما ودي ابيع خلاص
هونت ولما شافني معزم قال خلاص على اتفاقنا الاول انا شريت وطلع المصري النذل متفق مع لشريطي
انه يحطم ام الموتر بكلامه لجل الشريطي ينزل القيمه بعت الموتر ورجعت للمصري لعنت ولدينه
وجلست حول سعتين كل زبون يدخل اعلمه السالفه 


up 3 down 0
sc_est 717
قبل 8 سنه و 2 شهر



قول الحمدلله انت وياه ان ربي عطاكم العلم والخبرة في المجال هذا انا طالب جامعه اول سيارة لي اكلت فيها هوا بسبب استعجالي ولكن كل دقة بتعليمة والله الحين لو يقلي احد خذ سيارتي اطلع له بمشوار واحد كل الخرابات اخذت خبرة


up 3 down 0
m11013 923
قبل 8 سنه و 2 شهر



الله المستعان
غلطة علطتها و لا ابد اكررها
دعواتكم الله يعني على سيارتي
البدي طلع سليم لكن فيها مشاكل بالكهربا
اللهم لك الحمد على كل حال


up 3 down 0
moussa444 3
قبل 8 سنه و 2 شهر



بسبب القصه الي ذكرت تعلمت درس
والله اني من 10 ايام شاري جيب ماشي الف كيلو فقط ولازال بقراطيس الوكاله ومع ذلك خذيته
فحصته وراعي الموتر وحقين الفحص يضحكون علي يقلون مايحتاج ودراهمك زياده قلت اخسر 500
ولا يطلع شي بالموتر وانغبن


up 3 down 0
sc_est 717
قبل 8 سنه و 2 شهر



الانسان في طبيعته مادي لكن لازم يخاف من الله سبحانه وتعالى

يعني الله يقول للناس خافوني ولكم اجر تخيلوا لك اجر يعني يطعيك الله اجر بس تسمع كلامه

شوف طيبه الله سبحانه وتعالى والناس تعصي وشوف يوم الاخر ايش بيصير لهم



up 3 down 0
رايق السيارات 588
قبل 8 سنه و 2 شهر



شف يالطيب  قبل لاتشتري سيارة مستعملة اشرط عليه شرط قله ابفحص الموتر واذا طلع علي السيارة شي خذ قيمة الفحص وتوكل...


up 2 down 0
fx2013 76
قبل 8 سنه و 2 شهر



اخوي الكبير الله يهديه ما يعرف للسيارات المهم شرى له افالون 2012 اعجبته لمعتها من برى لانها مغسله وملمعه ( شغل الشريطيه ) المهم جابها البيت وانا الحمد لله عندي خبرة في السيارات وقلت له موترك مو عاجبني احس فيه شي المهم انا توقعت ان مصدومه من قدام والارباقات كلها طالعه والشاص معدل وسبحان الله جات نتيجة الفحص نفس توقعي وربي ستر ان السياره ما قد نقلها اخوي بسمه بس قد دفع نص مبلغها وكنا متواعدين مع صاحب السيارة علشاان نقل الملكيه اليوم الثاني المهم طلعت نتيجة الفحص ورحنا له وقلنا له الموتر طالعه ارباقاته ومعدل الشاص تبعه قام يحلف بالله ان مافيه دقت شاكوش طلعت له ورقة الفحص وقام الرجال يلف في كلامه قال خلاص بنقص لكم 2000 ريال رميت المفتاح في وجهه وقلت له جب الدراهم الي دفعها لك اخوي وما عطنا اياها الا بعد ملعنة والدين المشكلة انه مطووع ولحيته واصله لين سره وقيمة السياره غاليه جدا لان قيمتها قيمة وحده سليمه ومخزنه كان سعرها بـ 107 الاف

الزبده لا تحكم على الناس من مظاهرها واذا بغيت تشتري لاتشتري الا ومعك واحد خبير في السيارات او افحصها قبل ما تشتري ........ انا الحمد لله ابيع واشتري في السيارات بس بما يرضي الله لانه وسخ دنيا وبنروح ونخليه هي وفلوسها

اتمنى اني افدت الجمـــيع


up 2 down 0
mosfer alyami 774
قبل 8 سنه و 2 شهر



اولا الله يجزاك خير عز الله ان نصيحتك صادقه وامينه وتظهر خبره كبيره ونظره ثاقبه وياكثرهم اللي على نياتهم ومن جنب القده وانا منهم

وبقولكم قصتي مع سياراتي اللي شريتها من صاله على الدائري الشرقي
اكسبلورر 2003 نصف فل دبل 3 مرات
المهم طريقة المعرض انه يقولك السياره عليها ضمان ويطلعلك دفتر ويقول هذه الشركه واسمها الشرق الاوسط ونيصحه اي معرض يتعامل معها انحاشوا عنه والصاله وطبعا الشرق الاوسط اللي اكتشفته ان اي صاله تفدعله 600 ريال او ماني مذكر بالضبط ويعطيها هالدفتر ويمكن مايفحصها والاقرب انه مايفحصها طبعا انا انخميت وقلت وش هالمزايا لاني متعود اشتري السيارات وفحص والسلام ولا فحص وقلت اوف ذولي نظامهم محترم وثقه

وطبع مافحصت وهذه هي الغلطه ....اقسم بالله ياشباب من اول ماطلعت السياره وصوت بالدفرنس واروح للشركة حقت الضمان والقاها مجرد ورشه وقالي شغل اليد عليك مادري والله ناسي المهم اني دفعت مبلغ زائد حول ال 600 ريال
وطبعا اعتقد ان فترة الضمان 6 اشهر فقط وبعد اشهر ضرب القير واكعلي 12 ريال وبعدها فتره وتخبط المكينه والكعلي حول ال 16 الف ريال غير اجار سياره 12 يوم وكل ويوم وانا واقف بالورشه اتابع سيارتي لين طلعت ريحيتي وتعبت
..فنيصحه ياشباب لاتنغرون باي صاله تدخلها ويقولك مضمونه عند شركه فلانيه ومن هالخرابيط لانهم معتمدين انه فيه ناس غشيمه تنحم بهالحركات ..وتكون السياره صالحه انها تمشي مدة بسيطه قبل تطلع عيوبها واللي غالبا تكون بعد نهاية دفترهم حق الضمان الله لا يوفقهم وتلقاها 6 اشهر وتحت طبعا قبل يومين رحت لصاله ولقيت عندهم ضمان ثاني اسمه حمايه ويقول الى 100 الف ومن هالخرابيط وقلت بفحص لاني انضحك علي بسيارتي القديمه من الصاله اللي جنبكم واسمها () قال اي الصاله سكرت شلكهم انكشفوا او جاهم واحدن ولعن خيرهم واشتكاهم للتجاره ...وشكرا لك ياصاحب الموضوع على موضوع القيم والشيق ونصيحتك المبروكه


up 2 down 0
ابو تركي وفارس 48
قبل 8 سنه و 2 شهر