ماذا افعل خطاء ام صح

الحمد لله على السلامه والله يعوضك خير ولا تندم أنك سامحت الرجال أحتسبها عند الله وربي يعطيك الاجر أن شاء الله

سلامات يا أخوي والله يعوضك خير ويوسع رزقك التسامح طيب والحمدلله انها جات على كذا .

طبعا عندك بابين سمكرة ورش ... اذا مابتغير البابين بتكلفك من 500 الى 800 أقصى حد ( لاينصبون عليك الورش )

اذا بتغير البيبان احسب سعر البابين + قيمة الرش والتركيب تقريب 400 ريال أو 500 .

الله يسهلك أمورك ياطيب ولاتشيل لها هم دامك بعافيه الحديد يتعوض ... تحياتي .

انت سويت الصح , سامح واصفح وانا اخوك , الدنيا ما ينطلع منها بشيء الا اعمالنا الصالحه 

سبحان الله انا صدمت بجيب الوالد مثل صدمتك, والرجال نزل وهو خايف وقال مامعه تأمين والغلط عليه , وقلت له وش اسوي لك والله لو ماهي سيارتي لاسامحك لكن وش اسوي السياره للوالد

وقطع كلامنا واحد يقول وخر سيارتك عشان بأطلع سيارتي , والرجال ركب السياره وقدمها قدام , وانا رحت اجهز اوراقي , وشوي اشوفه يقدم مره ثانيه وقلت بصدق نيه يمكن يوخر عن السيارات , وشوي الا وصوت الكفرات وانا انشغلت واطالع الا وهو مختلف

والحمد لله اخذت رقم اللوحه , وجاء نجم وقلت له كل شيء وقال الغلط عليه 100% لانه شرد , وعطيتهم رقم اللوحه وجاء المرور وسوينا التقرير وكل شيء , وراجتعتهم اليوم الثاني وطلعت فعلا السياره هي نفسها كامري ابيض فل كامل , وبعدها قالي خلاص رح قدرها عند شيخ المعارض قبل وبعد الصدمه وبعدها رح قدرها عن 3 ورش وجب لنا التسعيره الوسطى

ونخليه يدفعها لك , وبعدها جيت افكر , وقلت يارجال الناس عندها ضروف , وانا صحيح اني مفلس ولازم اصلح سيارة الوالد , لكن مو بس انا اللي عندي ضروف , يمكن اللي صدمني يكون عنده ضروف اقسى مني

فقلت تدري , خلاص ابتنازل , لعل الله يدفع عني مصيبه او يفرج عني كربه مثل ما فرجت عن هذا كربته

ورحت تسلفت 3 الاف ريال وقلت للوالد هذي فلوس الصدمه وسامحنا , وقال افا عليك بس , يارجال مدامك سالم , فالحديد يتعوض ماعليك وخل الفلوس معك وعيا ياخذها الله يطول بعمره

 , وابشرك اخذت ملمع و لمعتها وفركتها وطلع جزء كبير من الخدوش وشفطتها بحقت البلاعه ذيك هههههه و زبطت بنسبة 50% وان شاء الله بأدور حقت البلاعه بس حجم صغير , لان الحجم الكبير ما يمسك , واذا حصلت حجم صغير راح يظبط الباب 90% ان شاء الله

فأنصحك رح خذلك ملمع ابو علبه خضرا او اي ملمع وافرك المخوش , والعفطات طلعها بحقت البلاعه , او فك الباب عند اي ورشه , واضربه لين يطلع , ما يكلف 100 ريال على الباب الواحد :)

موفق +1

جرب التعديل والتلميع وان شاء الله تظبط معك

ما أعرف لكن جزاك الله خير 
كم مديل السياره 

تعديل وتلميع وان شاء الله تضبط 

وزين ماسويت انك سامحته وبتلقاها قدام ان شاء الله 

احتسب الاجر من عند الله واللع يعوضك 

أحسنت أحسن الله إليك

دامك سامحة الشايب معليك الله يرزقك من حيث لاتحتسب 
هذا من غير الﻷجر اللي راح بإذن الله يجيك

لاشي من ما سبق هههههههههههههههه الله يرزقك ي خوي وقسسم ببلله انا مثلك صارت لي صدام كامل امامي وجتني هوشه من طيبتي اجر ان شاء الله 

هذا طيبه أم غباء  

انا بنظري اخوي انه لو السيارة مو لك مايحق لك تسامحه 
الا بموافقة صاحب السيارة اللي هو اخوك 

 اذا اخوك اعطاك القيادة وقلك سوي اللي تبيه
كانها سيارتك في هذي الحالة يحق لك ان تسامحه

بتوفيق

يارجال بسطيه ماتضرر الا بابين لمعها وان كان في الباب طعجات حآول انك تفك ديكور الباب والضرب الباب بقوه
من داخل راح يتعدل او سمكر تراه باب .. والله يسهل امرك

^^ فيه فرق بين الغباء والطيبه

الغباء/ حينما تفوهت انت بهذا الكلام >> محشووم انت بس المقصد الكلام فقط

والطيبه/ ان يرد عليك صاحب الموضوع بلطف بعدما اتهمته بالغباء .


الوضع جدا عادي اخ بلولي ياخذ قيمة التصليح ويعطي اخوه المبلغ فاذا اخذ اخوه المبلغ فمعناه ان اللي صدم وهو صاحب الموضوع فله الاجر ان شاء الله واذا رفض فلهما الاثنين الاجر ان شاء الله

والله حنا الان بحاجة الحسنات فنحن جدا مُقصٍرون بحق الله سبحانه >> اذ الله سبحانه يعفو عن اكبر الكبائر وهو الشرك
حنا مانعفو عن بني جنسنا !!

الله يجزاك خير المفروض انك تسأل صاحب السيارة اذا عنده تأمين وساري المفعول ما تسامح لانك بالطريقة ذي تدعم شركات التأمين