ايش رايكم بلومينا 2006 ؟؟

حلوة بس مشكلتها الحرارة كانت معي وحدة حكومية لعبت فينا لعب بالحرارة الين ضبطناها بزيادة المراوح وتكبير رصات الرديتر وشلنا البلف

ابعد عنها
كان لك خلق للورش لانها .. بنت ورش
اسوء سياره صنعتها شفروليه لايغرك الشكل

نصيحه اذا  تفكر باللومينا خذ 2009 او 2010 ltz تحصلها ب الثلاثينات والاربعينات على حسب النظافه الصراحه
 افضل واجود موديلات على اللومينا  وابعد عن الموديلات القديمة ماوراها الا المشاكل وجع الراس 

 

اشتري لومينا 2007 وفوق ثمانيه سلندر .. انا مجرب ثلاث سيارات .. اذا سواقك واستخدامك لها كويس مابتشوف منها شي

اذا نظيف توكل على الله
سيارة مريحه وسلسه جربت موديل ٢٠٠٣ والحين معي كابرس ٢٠٠٦ 
كلها التي زد قطع الغيار غالي شويتين بس ماهو ب اغلى من قطع تايوتا 
واذا مدمورة وملفقه ابعد عنده لنه بياكل اكثر من قيمته

انا اشتريت كابرس اس اس 2007 قبل سنتين و6 اشهر بالضبط
واستخدمته من 16 الف كيلو الى 83 الف كيلو وماغيرت اشيآآآء كثير .. هذي الاشيآآآء اللي غيرتها ..

طقم اربع كفرات ب2600 ريال
على 60 الف غيرت زيت القير مع الفلتر مع التركيب ب260 ريال
كل 5 الاف اغير زيت المكينة موتوركرافت 10w30 مع الفلتر مع التركيب ب160 ريال
فلتر الهواء مركب فلتر رياضي ب290 ريال وانظفه كل 20 الف كيلو بعدة خاصه ب60 ريال وتكفي تنظيف ثلاث مرات
بواجي ب110 ريال بمحلات قطع الغيار .. بالوكالة ب250 ريال ..
العضلات ما قد غيرت فيهم شي ...
الفحمات الخلفية والامامية ماقد غيرتهم من يوم اشتريتها .. وقبل اسبوع شيكت عليهم باقي فيهم نص عمر.. مدري كيف للحين فيهم عمر..

قبل شهرين سويت حادث بسيط والرديتر انكسر الخزان السفلي وهربت المويه برى وكلفني هالحادث ..
رديتر جديد ب450 ريال صيني ( الاصلي سعره بالوكالة ب2050 ريال ومحلات قطع الغيار ب1900 ريال)
موية رديتر ب60 ريال
ترموستات مع الكوع ب120 ريال (لحد الآن ما ركبته)
كلبس اهواز ب5 ريال
غطاء رديتر ب70 ريال (لحد الآن ما ركبته)
الرديتر القديم صلحت الخزان ب100 ريال مع شغل يد ب50 ريال وبعته ..
المكيف ثلج بالخط وداخل المدينة وهي واقفه ومايحتاج تشتىري فلتر جديد .. .. تفك الفلتر وتنظفه ويرجع جديد 100% مثل فلتر المكيف سبليت ..


طبعا الحرارة كانت مرتفعه حتى بعد تغيير الرديتر بواحد جديد بعدين سويت تنسيم للهواء وضبطت الحرارة..
بعض الاشيآء شريتها مثل غطاء الرديتر والترموستات لان ما معي وقت كل يوم ادق مشوار عشان اشتري قطعه ..
اشتريهم كامل واللي ما احتاجه اخليه بالبيت ممكن احتاجه بالايام الجآيه ..

السيارة ماعمري آكلت بها لا مطب ولا حفر .. بعض الناس عندها الكابرس خرآبات مدري شلون يعني السياره ماشيه 60 الف يقولك الدينمو خربآن! ولا الكمبريسر للمكيف خربآن.. ومقصات خلفية ورمان خلفي واسلاك بواجي وطرمبة زيت وطرمبة مويه وبلاوي ..

قطع الغيار بالوكالة غالي شوي .. محلات قطع الغيار ارخص بكثير..

واظن موديلات 2009 وفوق الصرفية للبنزين اقل فيهم والله اعلم ..

موديلات 2006 وتحت مانصحك فيهم .. يقولوا حرارة مدري كلامهم صحيح او لا.. لكن ابعد عنهم .. موديلات 2007 وفوق ممتازه ومافيهم حرارة ..