وفاة ابن عمي قبل يومين في حادث والله المستعان لمتى ذا الحال
66
12
إضغط هنا للإخفاء
قبل فتره كلمني ولد عمي اذا ابي شي او حاجه لانه نازل الطايف هو في دوره عسكريه في الشرقيه وكل مايطلعونه اسبوع ينزل الطائف
قلتله اجل مرني الرياض وتك وريح وبعدين كمل طريقك حتى لو تنام كم ساعه وتكمل
المهم قال لا بروح دعسه وحده
هو او غيره كنت اقول اي واحد اشوفه مسافر مر الرياض وريح عندي ونم واليوم الثاني كمل طريقك
الدنيا مابتطير مدري على ايش العجله والجنان
صحيح اني اسافر خطوط بس اذا حسيت بتعب اسفط على اقرب محطه وانام مستحيل امشي على الاقل ساعتين تكفي تريح فيها
المهم يوم الخميس الصباح جاني خبر وفاته والصلاه عليه يوم الجمعه الله يرحمه انا انصدمت من الخبر
محبيت اسئل اهله عن طريقة الحادث ماهو بوقته فسئلت واحد من الجماعه يقولون ان السياره دخلت فالتراب وحاست عليه وانقلب فجئه حسب وصف الشهود اللي شافوا الحادث
طبعا انا كنت حاس انه نعس فالطريق من جاني خبر وفاته فحادث والحادث صار على طريق ظلم
خصوصا انه طلع من المعسكر وعلى طول مشى مواصل
بعدها العصريه مداوم وكنت فاضي تابعت سبق وشفت خبر عن حادث على طريق القصيم انوفا مقلوبه
وبعدها فنفس اليوم حادث فالرياض سياره طايحه من كبري
واليوم وفاة شاعر قحطاني على طريق ظلم ومعاه 3 اشخاص
واليوم خبر في تبوك عن وفاة شخصين واصابة 8 معلمات الحادث فالليل
لو نرجع لسبب الحوادث ؟
سرعه + الانشغال عن القياده + التعب والارهاق وعدم التوقف للراحه
حاليا اخوي الصغير عنده دوره فالرياض
وكان يخرج يروح جده ويرجع خلال يومين
واقوله اهجد اركد خلك تتخرج وتخلص دورتك بعدين ارجع جده على ايش مستعجل
ماقدرت اضغط عليه مابيه يزعل
والان بعد ماجاه خبر ولد عمي الله يرحمه كئنه حس شوي وهجد وهالمره مانزل جده
ياناس والله الدنيا مابتطير
مدري على ايش السرعه
مدري على ايش العجله
دعسه وحده ماسك خط ولحالك اقل شي وقف وارتاح
بخصوص اللي يسدحون الطبلون ل200 ويحسبونها مرجله لا والله ماهي مرجله
بخصوص اللي يقول انا وصلت في فتره قصيره تراها ماهي بطوله ولا بتستفيد شي
والفرق بين وبين اللي يمشي 130 كلها ساعتين بالكثير ماراح تفرق
فماتستاهل عشان ساعتين تعرض نفسك لمصيبه كله عشان السرعه
كم اتمنى يوضع نظام على سيارت السيدان طبلونها مايتعدا 160 ويفكونا من هالحوادث
يجونك بعدين يتشكون
الحوادث كثرة والسبب الطرق والتحويلات ووزارة مدري ايش هي المسؤله
بعد اللي شفته اقدر اجزم بان 90 من الحوادث سببها السرعه
بعد اللي شفته
يعني الواحد مايعقل الا بعد مايتعرض لمصيبه
اعجبني ابراهيم التركي مره جاني الرياض وكان ماشي 120 تقريبا طول الطريق
صحيح انه رفع ضغطي وخلاني انتظر لكن النتيجه
ريح نفسه
ريح سيارته
ووصل بزيادة ساعه ونص عن اللي كان ماشي 200 لانه لازم يوقف ويعبي
اما تمشي على مهلك ماتحتاج توقف عشان بنزين توصل بالراحه
انا ماكتبت هالموضوع من حرقه وقهر فيني من اللي يصير من حوادث
فنتبهوا على انفسكم
وقت السفر اذا تعبت جرب توقف ونام ساع او ساعتين صدقني بتصحى نشيط بدل هالمشروبات المنشطه كلها مضره مامنها فايده
واللي ماخذ السرعه من باب الهياط يعقل احسن له
وسلامتكم
صورة اللكزس هذي حقت اخوي صدم فيها زمان للعبره والعضه
إبلاغ
الردود
من اجل ذلك اذا شعرت بالارهاق اقف و انعس و لو ربع ساعة
0
0
قبل 10 سنه و 6 شهر