باعها بدبل ... وجابت دبل الدبل وزيادة .

40 5

لايمكنك التصويت حتى الحصول على 20 نقطة على الأقل
إضغط هنا للإخفاء

مستر بن . 10377
قبل 9 سنه و 12 شهر

بسم الله الرحمن الرحيم

السلام عليكم ورحمة الله وبركاتة ...

والصلاة والسلام على أشرف الأنبياء والمرسلين سيدنا ونبينا محمد وعلى آله وصحبة أجمعين .

كيفكم ياطيبين عساكم بخير وعافيه .

حبيت أروي لكم قصة ممتعة سمعتها من رجل كبير في السن ( والنعم فيه وفيكم ) صاحب تشليح .

كنت أغيرعندة جربكس سيارة وجالس انا وياة نتقهوى ومعا السواليف حكالي ها السالفة الي هي :-

انه في قديم الزمان كان فلان من الناس غني واشترا سيارات تقريبا 4 أو 5 سيارات من موديلات الستينات

سيدان ونقل عنده حوش كبير موقفه فيه .. بعد فترة بسيطه (( توفا صاحب السيارات )) وبعض السيارات

أصفار ما مشا فيها .. ولاعنده غير حرمته الوريته الوحيدة .

دارت الأيام والسنين والمواتر واقفة في الحوش ما يقارب 40 سنه دون حركة أوتشغيل لدرجة ان بعض البدي صدى .

المهم بعد هذي السنين أكتشف الحوش الي فيه السيارات القديمة واحد من ضباط الأمن والتحري وهذا الظابط ولد

عمة صاحب معرض سيارات وورشه سمكرة وبويه في نفس الوقت .

فا الضابط كلم صاحب المعرض وقاله :

يا فلان فيه حوش موجود فيه سيارات قديمة مخزنه حقت عجوز وش رايك نشتري من عندها .

قال صاحب المعرض : خلاص خلنا نروح لها ون شوف للبيع أو لا .

راحو لبيت العجوز ودقو عليها الباب .

قالو لها ودنا نشتري من ها السيارات الي عندك في الحوش .

قالت تفضلو حياكم الله .

يقول ودخلو الحوش الضابط وولد عمة صاحب المعرض ويشوفون ذاك الفورد موديل 1964 أصفار لاكن البويه

والكفرات والصدا لعب فيها .. طبعا مع الوقفة 40 سنه لاكنها أصفار .

عجبهم الموتر وكلمو العجوز انهم بيدفعون فيها 5 الاف ريال فقط بحكم انها مدهمله مع الوقفة .

رفضت العجوز المبلغ 5 الاف .. المهم ناحلوها واشتروها ب10 الاف صافي في يد العجوز.. باعتهم الموتر

وأعطتهم أوراق السيارة كامله مع وكاله بتجديد الموترواستخراج اللوحات والفحص وكل شي .

المهم الي اشتراها صاحب المعرض دخلها ورشته ونفضها من الصدام الى الصدام وكلفته مع الاستمارة والصيانة

وكل شي 5 الاف ريال وأصبح سعرها عليه 15 الف ريال والموتر صار أخو الجديد ( ماشاء الله تبارك الله ).

وعرضها للبيع في المعرض حقه ..

ويجيه ذاك الزبون ويحدها عليه ب35 الف ريال وبعد حب الخشوم باعها عليه ب30 الف ريال .. أصبح كسبان

دبل قيمتها !!

المهم الي شراها ب30 قال لصاحب المعرض خل الموتر واقف عندك فترة وبعدين أجيك أخذة .. قاله ok

طبعا صاحب المعرض مبسوط باع الموتر بمكسب 15 الف ريال .

ودارت الأيام الموتر واقف في المعرض ماتحرك وبالصدفة مر على المعرض واحد سوداني .

وشاف الموتر وعجبه وسأل صاحب المعرض ( السيارة للبيع ) قاله صاحب المعرض .. ايوه للبيع وعليها 100 الف ؟؟

( طبعا صاحب المعرض باع الموتر لاكنه يستهبل على الزول بدليل انه قاله 100 الف .. سعر خيالي .

يقول وبعد اسبوع الا والسوداني ومعه رجل أعمال سعودي متكشخ بالمشلح والطيب وأحلى خقه ههههه .

وقابله صاحب المعرض ورحب بهم وقلطهم على قهوته وبعد القهوة جات العلوم الزينه الي هي :-

ان رجل الأعمال الي مع الزول دفع في الموتر 85 الف ريال وصاحب المعرض برقت عيونه وصارت تكشح زنون ههه

من السعر الخيالي الي جابته السيارة الي باعها ب30 الف واللحين جابت 85 الف (( فرق كبير )) ..

بعدها اتصل صاحب المعرض على صاحب السيارة وقاله يافلان موترك عليه زبون ب85 الف ريال وش قلت .

قاله صاحب السيارة .. ماني بايع .

حاول فيه يمين يسار ورفض يبيع .. وانحرج صاحب المعرض من الزبون الي دافع مكسب خيالي فيها لاكنه ما يأس

وقال للزبون : الرجال رفض ويبغا في الموتر 100 الف ريال صافي مصفا .

شاور نفسه الزبون وقال شريتها ب100 الف ريال .. صاحب المعرض بغا يتجنن .

وأتصل صاحب المعرض على راعي السيارة وقاله يافلان الموتر جابلك مكسب 70 الف ريال 30 + 70 = 100

(( يعني مكسب دبل الدبل )) وقاله صاحب السيارة (( الموتر مو للبيع )) ان كان مضايقك بجيك أشيله .

صاحب المعرض بغا ينجلط يوم ان الرجال رفض ها المكسب الي هو 70 الف وانحرج من الزبون أخر شي قاله

الموتر راعيه ما يبغا يبيعة ؟؟؟ وراح السوداني وعمة بدون الموتر والشريطي حسران على البيعة ماتمت وتمنا

في ذاك الوقت انه ما باعها ب30 الف لوصبر كان أخذ 100 ..

سبحان الله اشتراها ب10 الاف وصلحها ب5 الاف وباعها ب30 وجابت 100 الف .. ولاباع صاحبها .. حكمة الله .

::: هذي قصتي لكم عساني ماطولت عليكم والله يرزقنا الجنة والمسلمين أجمعين .

صورة شبيهة لنفس الموتر المذكور وشكرا لكل زائر لموضوعي ...... تحياتي للجميع .. أبو عبدالله .

إبلاغ

الردود