أضف سؤال أو موضوع جديد          

رأيي وتجربتي لمجموعة سيارات كنت املكها

up 32 down 18
siaf 347
قبل 6 سنه و 9 شهر



السلام عليكم 

عساكم بخييير

اولا انا رجال احب التعدد  ... طبعا في السيارات 
ولا اذكر ان فيه سياره جلست معي اكثر من 4 سنوات 

امتلكت العديد والعديد من السيارات من عام 1992 الى الأن بمختلف انواعها وموديلاتها اضف على ذلك السيارات 
المستأجره وكذلك السيارات اللي اترزق الله فيها


والموضوع بكل امانة وبدون تحيز 


بسم الله نبدأ :-

1 - سوبارو 1989 

شريناها وكاله 28000 ريال وكانت باستخدام الوالد الى ان اعطاني اياها في عام 1992 كانت تمشي الحال 
والشيئ الغبي فيها كانت استبنتها في الكبوت 
وتكييفها ضعيف ويطلب صيانه دايما . اما قطع غيارها كان شي لايعقل انذاك تخيلو الكنداسه مع دبات الرصاص مع 
المواصير ب 10000 ريال
بعناها ب 5000 ريال عام 1994 

_______________________________

2- مرسيدس 190E 1994  

استلمها الوالد جديده من عمله واستخدها سنه تقريبا واعطاني اياها لأنها قير عادي 
كانت سياره ناشفه وغير مريحه وتكييفها ومسجلها سيئ جدا 
لكن المميز فيها انها كانت عمليه واقتصاديه وسريعه خاصة في الخط . بس ضغط المكينه يكون على 50 اذا مشيت 200
وكما هو المعروف في السيارات الحكوميه انها ماتخرب فقد كانت السياره سبيل في الحاره وكل واحد يسوقها 
على تفحيط على تطعيس في الثمامه ايام المراهقه
في الأخير خبطت ورجعناها للجهه الحكوميه

_______________
____________________

مرحلة ما قبل الوظيفه ****

3- ونيت جمس سونوما حوض موديل 96 

شريته ب 26 الف مستعمل وبعته ماكمل سنه ب 24الف
كانت سياره حلوه في شكلها و سيئه في مضمونها على كبره كانت مكينته 4 سلندر 2200 cc 

4- شفروليه كفاليير 95 
 
شريتها ب 21000 وبعتها بعد سنه ب 14000
سياره راااائعه في كل شيئ .. عزم ( قير عادي ) + قومه + تمشي طبونها في ثواني قليله + تكييف + اقتصاديه جدا جدا في البنزين


_________________
__________________

مرحلة تحسين الأوضاع ( بعد التعيين )

5- مرسيدس موديل 91  300 SE   
 
شريتها ب 48000 ريال عام 1421هـ
الصراحه السياره ذي كانت غلطه ومن اغبى ماصنعت مرسيدس 
مافيه عزم وصرفيه زايده وتسخين مع السرعات العاليه
راحت في حادث بعد 4 شهور من شرائها وبعتها ب 18000

___________

6- تاون كار موديل 92
شريتها ب 22000 وبعتها ب 25000 بعد سنتين
سياره مريحه وقطع غيارها رخيصه وعمليه ولكن ثبات سيئ مع المنعطفات 

____________

7- مرسيدس موديل 90 جفالي  500 SEL  ( مخزنه )

شريتها ب 33000 وبعتها ب20000 بعد 4 شهور

سياره قويه وراسيه لكن من يوم شريتها ما تهنيت في راتبي 
صيانه + خرابات + صدمات خفيفه 
كرهتني حياتي 

____________ 
____________  
 
8- متسوبيشي ماجنا VRX 2004 وكاله 

شريتها ب 90 الف وبعتها ب 70 الف بعد شهرين 
كان فيها عيوب مصنعيه كثيره والوكاله سيئه جدا وغير متعاونه

___________
___________

9- بيوك رودماستر موديل 96 بطاقه جمركيه شبه جديده

شريتها ب 50 الف وبعتها بعد 4 سنوات ب 5000 ( مخبطه ومصدومه )

هي السياره الوحيده اللي استخدمتها 4 سنوات 

سياره ماني كفو امدحها 
افضل ما صنعت امريكا 

قوة مكينه غير طبيعيه راحه غير طبيعيه
 
استخدمتها في كل شيئ قومات و تطعيس و سفريات ووووو
ماقد خذلتني يوم ولا شكيت منها يوم مع ان استخدامي لها كان سيئ جدا جدا 

اغير زيتها كل 25 الف اي نعم  25000 كم

اسطوره لن تتكرر ابدا 

________________

10- كامري موديل 96 V6 GL

شريتها ب 27000 كانت ماشيه 90000 كم فقط وبعتها بعد 3 شهور ب 25000 

سياره اقل ما يطلق عليها انها مجنوووونه 
 
طبلوها 260 وكانت تجيب ال 230 بالراحه  ( قير عادي ) 

السياره ممتازه جدا ولكن يعيبها قطع غيارها غاليه وتبلش في صيانتها مع انها ماطلبت شيئ 
ولكن ما حصلت ورشه تفهم فيها ولا حصلت مركز كمبيوتر يفحصها بالطائف
  
____________

11- ازيرا 2008  3.8 L سياحي
شريتها وكاله ب 66000 وبعتها بعد 6 شهور على اخوي ب 55000 

طبعا سبب بيعي لها ظروف ماديه

السياره ممتازه ولا يعيبها شيئ وعزمها ممتاااز جدا ورساوتها ممتازه وهادئه في الخط الى درجة انك تمشي 180 
ماتسمع اي شيئ لا هواء ولا ازعاج

تجربتة اخوي لها 
جلست معه سنتين دوام يوميا من الدمام الى بقيق واسبوعيا الى الرياض


مشت معاه 180000 كم بدون اعطال وبدون مشاكل بل انها كحالتها جديده 
وراحت حادث في الأخير

_____________

12- كابريس 1995 LS

شريتها بطاقه جمركيه ب 27000 وبعتها بعد 5 شهور ب 16000

ميزتها في راحة مركبها وسواقتها وصرفيتها 

ولكن جننتني في مشاكلها الكهربائيه وقطع غيارها الأصلي ما عاد تحصله 

___________

13- فورشنر 2006 4 سلندر قير عادي

شريته ب 57000 وبعته بعد سنتين ونصف ب 53000 ( وهو خربان بعد )

ياعيني على التويوتا 

طبعا بعد عقدة الكابريس حلفت اني اشتري سياره لا تتعطل ابدا مهما كان نوعها
وقع اختياري على الفورشنر وكنت موفق في اختياري الحمدلله

استخدمت السياره تقريبا سنتين وثمانية اشهر لم اصرف عليها ريال واحد 
غير زيت وبنزين
في اخر ايامه فكيت الطبلون عشان انظف ثلاجة المكيف والكهربائي الله يسامحه ما ركب ليات المويه مزبوط
وكان يهرب مويه وما انتبهت 
ويوم رحت جده بعدها بشهرين لاحظت ان حرارة السياره مرتفعه وانا في كوبري الميناء المهم مشيت عليه مسافة 5 كيلو 
والحراره H الى ان راح راس المكينه وبعته بعدها

كانت سياره ممتازه واقتصاديه وتنفع للي يبغى يجمع فلوسه 

_____________

14- سوناتا 2009 استخدام امريكي 4 سلندر

شريتها بطاقه جمركيه ب 48000 ريال ماشيه 80000 ميل فل كامل
وبعتها بعد شهرين ب 42000 ريال

الحقيقه ان السياره تعتبر فخر الصناعه الكوريه في عصر هونداي الذهبي والله انها عندي افضل من كامري 2011
اما الأن شركة هونداي تغيرت للأسواء

شريت هذه السياره بقناعه تامه مع اني وقتها استطيع ان اشتري سياره وكاله
اعجبتني في مواصفاتها وهدوئها والله انك توقف جنبها وهي شغاله ولا تسمع لها حس
الصراحه السياره غيرت نفسيتي وصرت معاها رااااايق ومزاجي عااالي بعد النطنطه والتعب ايام الفورشنر
وقطع غيارها رخيييصه مع العلم انها تختلف عن السوناتا السعودي في قطع الغيار ولكن ما يميزها انك اذا احتجت قطع غيار 
ماعليك الا ان تطلبها برقم القطعه اللي موجود عليها بدون ذكر نوع او موديل السياره

اما سبب بيعي لها فـ لأني تعودت على السيارات الدفع الرباعي المرتفعه  ولا السياره كفووو ولا يعيبها شيئ ابدا

____________

15- فورشنر 2008 4 سلندر قير اوتو

شريته ب 58000 ريال ولا زال معي 

بعد السوناتا قررت اني ارجع لرفيق دربي ولكن قلت اجرب القير الأوتو 
قد يقول بعض الشباب ليه ماشريت ال السته سلندر 
الجواب ان السته سلندر صرفيته عاليه وقطع غيار المكينه غاليه ولا يعيش مثل الأربعه سلندر ولو ان فيه فرق في عزم المكينه 
ولكن ما احتاجها مع اني شريت فورشنر 2007 سته سلندر ( اترزق الله ) وجربته وسافرت فيه
ولكن لازلت مقتنع ب الأربعه سلندر


***** اخيرا هذه انواع السيارات اللي اقتنيتها للأستخدام الشخصي 

اما السيارات اللي كنت ابيع واشتري فيها فهي كثيره ولا حبيت اطول الموضوع في كتابة كل سياره منها
ولكن سأذكرها لكم واي سؤال عنها انا تحت امركم

كابريس 2007  V8
جمس يوكن 2007 طويل 
يارس 2012
كورولا 2013
باثفندر 2010 سياحي ( استخدمته شهرين )
هايلوكس 2006 - 2007 
فورشنر 2007 V6
جمس يوكن طويل 2001

هذا اللي اذكره .....



####  سيارات استأجرتها ...

لانسر فل كامل 2002
سيفيك 2003
اكورد 2002
فولكسواجن جيتا 2010
لانسر 2011


وغيرها من سيارات تويوتا وهونداي ومازدا
______________________________________________________
_____________________________________________________



اتمنى ان يحوز موضوعي على رضا الله ثم رضاكم 

ودمتم سالمين 
اخوكم 
محمد سياف







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


تراني عزابي يالحبيب 
واذا خبرت لي بنت الحلال فا خبرني الله يجزاك خير


up 0 down 1
siaf 347
قبل 5 سنه و 4 شهر



خذ لك من شرق آسيا ورب الكعبه ماتندم


up 0 down 0
ابراهيم احمد الكناني
قبل سنه و 6 شهر