وش الافضل 8 سرندل ولا 6 ولا 4 ؟ وما لافضل ؟

مع الانظمه الجديدة الذكية بالسيارات الحديثه 

غالبا نظام ECO
وهو نظام توفير الوقود ومتوفر بأغلب السيارات الجديدة

صرفيتها وحده وصعب تميز بين صرفية سيارة وسيارة والعموم صرفيتها تعتمد على خفة رجلك بالدعس

صرفية البنزين تعتمد على حاجتين

1- عدد مشاويرك
2- سرعة قيادتك

اقدر اقلك عندي موتر 8 سلندر اعبيه فل مرة كل اسبوع
واقدر اقلك عندي موتر 4 سلندر اعبيه فل كل يومين

وبشكل عام الكوري و الياباني صرفيته اقل .. تحياتي

وشبك معصب (:
ادري انه كل مازاد السرندل المكينة تكون اقوى


بس البعض يفضل سرندل اقل 

عشان كذا ابغى اعرف السبب

قبل لا تشتري اي سيارة شوف صرفيتها لكل 100 كيلومتر......

مثلا سيارتي كابرس اس اس 2007 صرفيتها 11.8 لتر لكل 100 كيلومتر
لكن الكابرس الجديد صرفيته قريب من الاكسنت ممع انه 8 سلندر

الكورلا صرفيتها بالخط 5.7 لتر لكل 100 كيلومتر
اما صرفيتها بالمدينة 7.8 لتر لكل 100 كيلومتر
متوسط الصرفيه 6.8 لتر لكل 100 كيلومتر

الاكسنت صرفيتها بالخط 5.5 لتر لكل 100 كيلومتر
اما صرفيتها بالمدينة 7.6 لتر لكل 100 كيلومتر
متوسط الصرفيه 6.6 لتر لكل 100 كيلومتر

السيارة إذا كانت صغيرة تقل صرفتيها إذا كانت أربعة سرندل ...

وأعتقد إذا كانت كبيرة الحجم وأربعة سرندل راح تكون الصرفية اكثر ..

المهم سيارات السيدان اليابانية الاربعة السرندل أقل استهلاك من غيرها ...

والثمانية السرندل بكل تأكيد راح يشفط بنزين ..وجهة نظري..

صرفية البنزين يسألوا عنها في الدول الأوروبية لأن البنزين غالي جداً عندهم فعلى سبيل المثال في تركيا سعر اللتر من 9 إلى 10 ريال حسب السعر العالمي يعني سعر البنزين متغير مثل سعر الذهب عندنا

البنزين عندنا رخيص والحمد لله ولذلك حتى لو فللت السيارة مرتين زيادة في الشهر ما راح يأثر

الفرق اطال الله عمرك  القوه والصرفيه

كل ما كان الرقم اعلى  تجيك قوه 

كل ما كان الرقم اقل   تجيك اقتصاديه 

فاذا انت تبي قوه خذ 6
ابي اقوا خذ 8 
اذا تبي اقتصاديه  خذ 4
طبعاً اقصد قوة المكينه 

موفق خيرٍ
طبعاَ هذا الي انا اعرفه من تجربتي بالسياراتَ~

افضل شي 3 سلندر و 5 سلندر و 7 سلندر 

عفوا ترا في 5 سلندر بس حبيت الرقم 

كل سيارة تختلف ما له علاقة بالسلندرات
معضم الناس عندهم ان كل ما زاد عدد السلندرات زادت الصرفية و لكن هذا كلام مو دقيق
في بعض السيارات ٨ سلندر تشتغل ٤ سلندر و اذا دعست يشتغلوا ال٨ كلهم و هذا علشان يوفر بنزين
و في انضمة مثل الايكو يقللو من صرفية البنزين
مثلا السمارت ٣سلندر و مع ذالك تصرف اكثر من الفورد فيوشن ٤ سلندر مع ان الفيوشن اكبر كحجم و مكينة
 

اختلاف الناس في حجم المكينة ترجع للشخص نفسه بعضهم ياخذ 4 سلندر عشان مكينته صغيرة ويعتقد انها اسهل له كصيانة مايشيل هم لاحرارة ولا شي يدق سلفه ويمشي وبرضوه لو توقف في عز الظهر ساعتين ماترتفع حرارته بعكس 8 سلندر وال 6 سلندر متوسط الحجم يعني مهب ميت عزمه مررة مثل الاربعة سلندر اذا ركب معك 4 اشخاص ماعاد مشى ولاهوب مثل 8 سلندر جاي متوسط وبعضهم يحب الثمانية عشانه دفع خلفي ولا يتاثر بالركوب ولا شي ف الناس تختلف ... بالنسبة للصرفية اشوف انها على الاستخدام يعني اللي مايعرف يدعس بيصرف معه الموتر حتى لو انه سلندرين والبنزين الحمدلله عندنا برخص التراب ومع انظمة السيارات الجديدة نظام حقن الوقود مافيه فرق كبير وبالعكس في الخط افضل المكينة الكبيرة لانها ماتتاثر مع الدعس والسرعة ... بالتوفيق

اختصر عليك خذ على قد فلوسك أنا أفضل الثمانيه لأنها أقوى وشكلها جذاب ملفت الانظار مع أني ما استفدت من قوة المحرك بس افتخر اني راكب ثمانيه