تم حل مشكلتي بالقير الاوتو افالون
48
5
إضغط هنا للإخفاء
بسم الله الرحمن الرحيم
السلام عليكم ورحمة الله
بحمد الله وبتوفيق منه جل جلاله تم حل مشكلتي ( العويصة ) اللي تعرفت بسببها على شوارع مختصرة تؤدي الى الصناعية بدل زحمة الخط الرئيسي ههههههههههههه
وعرفت ان كل معلمين القيور للتويوتا ماعندهم والله الا الدجة !!
سواء كانو فلبين او اتراك او سودان او ابو يمن .
شهر كامل وانا اعاني من هالمشكلة اللي كانت تتلخص كالتالي :
لخبطة قوية بتبديلات القير و نتعة شديدة بين الاول والثاني -- وعلق على الثالث مايلقم الرابع نهائياً ولا خامس
بعدها باسبوع القير يتأخر من الـP الى الـD ياخذ خمس ثواني ويلقم
بعدها فترة القير صاير يفضي ( يفصل ) بين كل نمرة يعني القير بالـD تدعس ابنص وانت ماشي 40 يفصل كأنك حاطه الـ N
وعصا القير ابد مايفرق بين 4و3و2والـL واحيان يقوم بالثالث وعلى هالحال
فحصت كمبيوتر ماطلع عندي أي شي
وأكثر تحليلاتهم لمشكلتي ;كانت اما بتوضيب كامل للقير بسبب الكلتشات او تغيير من التشليح او قير مجدد تجاري
اتفقت مع معلم سوداني على توضيب القير وقبل ما اودي سيارتي بيوم طقت براسي عدة شغلات بحكم ان اكثر شغلات الصيانة اصلحها بنفسي
(( فتحت البطارية وقاعدتها وقربة الهواء بالكامل ))
لاحظت وجود حساسين ممغنطه مشبوكه بأعلى القير (قريب من سلف المكينه ) شكلها مشابه لحساس الـABS بها مغناطيس كل واحد منهم مربوط بمسمار مقاس 12 فتحت افياشهم وطلعتهم برا
واقرب تكسي على الصناعية واخذ نفس الحساسات من التشليح ( 2 بـ150 ريال )ارجع للبيت واركب الحساسين واطبق القطع واسم بالله واشغل وامشي الا والموتر رجع وكاااااااااااااله زي اول واحسن
والله من كثر مافرحت صرت خلاص اضحك لحالي واسولف على الطبلون هههههههههههه راعي سكويا جمبي بالاشارة يطالع فيني ويبوس ظهر يدهـ ويقول فـ نفسه حمد وشكر على نعمة العقل هههههههههههههه
والله ياخوان الى الان ماني مصدق -- مشكلة بغت تكلفني سبعه آلاف ريال وحلها كان بميه وخمسين ريال فقط
للأسف ورش السيارات صارت سوق سوداء نصب ولهط من جيوب الضعوف والله ماتلقى المهندس الشاطر والامين الا قليل وينعدون
نصيحتي يا اخوان لا تتجرئ وتسمع كلام الي مايخاف الله - تحرك ودوّر ولف على كل الورش قبل ماتصلح أي قطعه معقدة زي القير الاوتو وغيرها
آسف على الاطاله وعسى الله يوفق الجميع
إبلاغ
الردود
او ارسلي على رقمي
٠٥٦٧٧٨٧٥٥٠
0
0
قبل 4 سنه و شهر