أضف سؤال أو موضوع جديد          

كيف أعرف إن السيارة ملعوب فيها ومفحط بها ؟

up 21 down 8
youlike 559
قبل 4 سنه و 10 شهر



السلام عليكم

أخواني انا من فترة ودي أشتري سيارة 

والآن تيسر الحال وبروح المعارض أدور لي سيارة نظيفة 

طبعاً معروف ان الأكورد والكابرس مشهورة بالتفحيط

كيف أعرف ان السيارة مفحط بها ؟ هل فية أثار تظهر على السيارات اللي تعرضت للتفحيط ؟







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


اللي اعطاني دس لايك بدون سبب ونقص نقاطي 

أعتذر منك بس ما بسامحك ولا أحللك وحسبي الله ونعم الوكيل فيك !

دام ما بيدي شئ بدعي عليك ..


up 23 down 4
youlike 559
قبل 4 سنه و 10 شهر



افحصها بالفحص وجربها بنفسك يعني اذا تسمع صوت اذا لفيت ولف الدركسون خفيف ولفه قوه مر على كم مطبه عشان تسمع اصوات وحطها على حفره وشف الاذرعه  ويردون عليك الشباب اللي عندهم معلومه اكيده ويفدونك ان شاءالله  وموفق 


up 3 down 0
السيدالمحترم 552
قبل 4 سنه و 10 شهر



المشكلة مالي خبرة بالسيارات ..

فأنا معتمد على الله ثم على فحص الكمبيوتر ..


up 2 down 2
youlike 559
قبل 4 سنه و 10 شهر



ودها الفحص يشيكون عليها من تحت عضلاتها وكل شي ..ان زانت معك توكل على الله


up 2 down 0
أبو غاليه ... 771
قبل 4 سنه و 10 شهر



السياره اصل اذا فحطت عليها كثير خلاص تنتهي 
يطلع اصوات  وطقطقه والدركسون يثقل ويميل شوي يعني ماهو عدال الاذرعه منتهيه 
باختصار الموتر يصر يقرش ووليشه من اول ما تسوقه تعرف 

بعض الناس يحسب ان التفحيط يضر الكفرات بس التفحيط يضر الموتر كله 


up 4 down 0
ابو عبيد 14 60
قبل 4 سنه و 10 شهر



صراحة بالنظر صعب تعرف اذا اندمرت من التفحيط والا نظيفه
اهم شيء في السيارة المكينة والجربكس والكهرباء تكون تمام عشان ماتعبك
وكمان البودي ما يكون مقلوب لا سمح الله ولا مقصوص لان فيه شريطيه مايخافون
الله يحلف لك ب أغلظ الايمان انها نظيفة وكانت مع شايب مثلا تراهم نصابين  

افضل شيء زي ما ذكر الاخوان فحص كمبيوتر وقبل لاتروح تفحص وتخسر
نفسك خذ معك واحد  خبره ويعرف في السيارات من إخوانك ولا خويك واهم شيء لاتنسى اذا عزمت تشتري
جيب ميكانيكي خبرة يجربها ويكشف عليها وب يعطيك العلم الأكيد 


up 1 down 0
ابو خالد الناصري 476
قبل 4 سنه و 10 شهر



سمعت معلومه بخصوص ( كيف تعرف ان السياره جالها درفت وتفحيط )

يقولون دخل يدك في بطانه الرفارف 

طبعا كان الموضوع عن كابرس وكانت دفع خلفي

فقال لي 

دخل يدك فوق الكفر الخلفي , امسك البطانه اللي فوق الكفره من جوا , اذا حسيت ان فيها ندوب وتحس ان فيها تقطيع 

فهذي جالها درفت وتفحيط

اما ان كانت سليمه وناعمه ومافيها ندوب فما جالها درفت 

اتمنى اكون افدتك


up 7 down 0
ابو يزيد 000 8696
قبل 4 سنه و 10 شهر



أولا :
 تشوف كم مالك للسيارة

إذا كان مالكها واحد من وكالتها ، يبين عليه إذا أنه كبير بالعمر أو مراهق

ثانيا : نظافة السيارة من الداخل هل فيها كسور
وأهم شيء الدرج الي بين الراكب والسائق ( دايم ينكسر مع المفحطين )
ومساكات اليد الي بالسقف ( هل هي مخلوعة ) ؟

 ثالثا : افحص الجلنط كامل

رابعا: افحص الأذرعة

خامسا : افحص المكينة والقير مكانيكيا + كمبيوتر

سادسا : استخر الله وتوكل عليه


up 4 down 1
ماجد الدهامشة 70
قبل 4 سنه و 10 شهر



وعليكم السلام
 معروفه 

شف بطن الموتر  اذا ( محكوك )   او المساعدات والاذرعه رايحه به 

والصدمات طالعه ومركبه تركيب لك عليه 

حححححححط رجلك ! 


up 0 down 0
fawaz__11 534
قبل 4 سنه و 10 شهر



الكابرس ما ينفع تشتريه الا من واحد تعرفه لان بصراحه اللي يشتري كابرس ويحافظ عليه نااااااااااااادر ويمكن تحصل موتر محافظ عليه من الف موتر وهذي مشكلته 

بالنسبه للهوندا اذا بتشتري فل كامل وموديل جديد نادر تلقى راعيها يفحط فيها اغلب حقين الهوندات يمشون صفر ويرفعون ضغطي في الدائري هههه بس ترا احبهم والله ناس اغلبهم محترمين 

بالتوفيق 


up 3 down 0
camry grandi 99 7276
قبل 4 سنه و 10 شهر



اشتري سيارة تعرف صاحبها او خذ اصفار احسن لك


up 0 down 1
pirlo.z 425
قبل 4 سنه و 10 شهر



شف يبين معك من مقبض الجلنط اذا ملتف جهت السايق وباين انه قد انعكف معناة السيارة قد انهدرت في كم شوط ومن مستلج بعد 

لان مع التفحيط المفحط شادة في راسه يسحب الجلنط ويلعن خيرة لين ينعفط جهته وتأكد برضو من الفحص لان احتمال يعدلونه ولا يغيرونه


up 1 down 0
mousa-almalki 5
قبل 4 سنه و 10 شهر



مواتر التفحيط ماتبين بالمعارض

لان اللي بيبيع موتر جايه كم شوط

بيعدله قبل لايطلعه يربطه واي قطعه تالفه يلفها بتجاري

فما راح تبين اغلب مواتر التاجير في يوم او يومين بالكثير تبدا الخربات بعد اسبوع الى اسبوعين فدايم

اصحاب المواتر اللي مثل كذا يستعجل بالبيعه تحصل المكينه موضبه تجاري والقير ويبي الفكه بااقرب زبون بسعر مناسب

بالنسبه له

فلا تستغرب مواتر جديده او فخمه تنباع بسعر رخيص وتنغر به

فااحذر اخي المسلم (( فخ ـ خابور ))


up 1 down 0
amear 1335
قبل 4 سنه و 10 شهر



اخوي دامك عينك على الكابريس

الكابريس علاجة عندي :

1- روح للكفر الخلفي زين دخل يدك داخل وامسح الغلاف الداخلي الي فوق الكفر راح تشوف اثاااااار مطاط كثيررررر
لازق في الغلاف الداخلي اذا حسيت انه ملاين وخشن انحاااااااااش

اذا شفته نضيف و الغلاف نضيف وناااعم لا يفوووتك ابدااااااااااااا


up 2 down 2
خ ا ل د ا ل ز ه ر ا ن ي 222
قبل 4 سنه و 10 شهر



عشان الواحد كتب الطريقة الصحيحة في المعرفة السيارة اذا هي مفحط فيها او لا اعطتوووني دس لايك

انا بنزل موضوع متكاااااامل عن هالسالفة ... خل الي يفحط يتحمل خطااااه


up 1 down 0
خ ا ل د ا ل ز ه ر ا ن ي 222
قبل 4 سنه و 10 شهر



العضو youlike 
في البداية انا ﻻعطيتك ﻻيك وﻻ ديس ﻻيك 
بس حبيت اعلق على ردك انا ما اسامح وﻻ احلل مايستاهل على شيء تافه زي كذا 
استغفر ربك ترى حنا اكبر من كذا تخيل نفسك توقف امام رب العباد يوم القيامة ياربي هذا ظلمني وعطاني ديسلايك
الناس تنظلم وتخطأ عليها وتسامح عشان الاجر
فكيف بحاجه تافهة جدا ياخي ارفعها والله ماتستاهل والواحد يستحي انه يقول مثل كلامك امام الله سبحانه وتعالى 
 
 



up 2 down 0
al_orainy 49
قبل 4 سنه و 10 شهر



ولا تنسى أهم ششيء قبل لا تدفع ولا نص ريال

وبعد ما تسأل ذوي الخبرة
و تسوي الأشياء اللي قالوا لك عليها الشباب











استخر ربك
و ماخاب من استخار
ركعتين و دعااء

و توكل على الله و اشتري و صدقني ما رح تندم على
اللي شريته إذا استخرت

وصلى الله و سلم


up 0 down 0
gl-q5 128
قبل 4 سنه و 10 شهر



اصبر شوي و خذ جديد أو خذ من واحد ثقة و يكون مالك أول للسيارة 
و لا تنس الاستخارة 
بالتوفيق


up 0 down 0
ayham73 654
قبل 3 سنه و 11 شهر