استفسار عن شراء سياره

كم ميزانيتك ؟
كم ممكن تدفع دفعة اولى؟
هل راتبك ينزل البنك؟ هل تبحث عن وكاله ولا مستعمل؟

ابغى سياره في حدود ال70 الف
وممكن ادفع دفعه اولى ل 5 الاف
وراتبي ينزل على البنك
وابغى وكاله طبعا 

دامك موظف اخوي انصحك تصبر حق سنة واجمع حق السيارة واشتري كاش 
بالتوفيق

يالغالي كم راتبك عشان اسأل اخوي يشتغل بالبنك اقدر افيدك ..

البنك أرحم من الأجار المنتهي بالتمليك

وكلهم بيلهفونك 15 ولا 20 الف فوائد

نصيحه جمع وأشتر لك سياره تمشي الحال وبعدها بيمديك تجمع حق سياره جديده

الأقساط مصيبه وأرباحهم عاليه 

جمع 15 الف وخذلك إكسنت نظيفه مكيفه وبتمشيك كم سنه بدون خرابات واذا طلعت خرابات قطعها رخيصه

بالتوفيق

اذا البنك يعطيك قرض خذ قرض افضل واذا مايعطيك خذ من البنك اجار منتهي بالتمليك
اهم شي لاتروح للشركات لان فوائدهم كثيره

وعليكم السلام ورحمه الله وبركاته
مساء النور ، ي هلا
فكرة متميز جداً ، حلوه وانا انصحك فيها

موضوع البنوك والتمويل يرهق الراتب ، لكنه شر لابد منه في بعض الحالات

دامك صامل وتبي البنك انصحك تخلي هالخمسة الاف في جيبك وتأخذ تمويل من البنك بقيمة
٥٠ الف ، يصير معك ٥٥ الف ،، واحرص كل الحرص على البنوك اللي فوائدها اقل النسب 
القليله مثل ( الهولندي - الوطني - الرياض - الاستثمار - ساب .... الخ )

بعطيك الطريقه وانت احسب قرظك وانت في بيتك بدون تروح تدور وتتعب ع البنوك ، الطريقه كالتالي /


المبلغ اللي تبيه * نسبة البنك ٪ ١٠٠ = الفائده السنويه
الفائدة السنويه * عدد السنوات = الفائده الاجماليه للتمويل
الفائده الاجماليه + المبلغ اللي تبيه = مبلغ التمويل كامل 
مبلغ التمويل كامل ٪ عدد السنوات { بالاشهر } = قسطك الشهري

وبعطيك مثال عشان تتضح الفكره ، فلنفرض انك بتأخذ ٥٠،٠٠٠ الف ريال نحسبها كذا /

٥٠،٠٠٠ * ١،٤٥ ٪ ١٠٠ = ٧٢٥ الفائده السنويه
٧٢٥ * ٥ سنوات = ٣٦٢٥ الفائده الاجماليه
٣٦٢٥ + ٥٠،٠٠٠ = ٥٣٦٢٥ الاجمالي
٥٣٦٢٥ ٪ ٦٠ = ٨٩٤ القسط الشهري

# تنويه / علامة * تعني ضرب

ب التوفيق لك واتمنى انك تحسبها صح وتجمع لك مبلغ طيب وتكمله بتمويل خفيف وتشتري سياره
الله يوفقك يارب ،

ماقصروا الاخوان في الشرح ولكن فيه معلومة مهمة عن التمويل والتقسيط والتأجير المنتهي بالتمليك وغيره لازم تنتبه منها 
وهي انك لو اخذت تمويل مثلا مدته خمس سنوات وعندك اقساط تدفعها كل شهر والوضع تمام التمام 

لكن لو بغيت تاخذ تمويل ثاني لزواج مثلا او غيره خلال هالخمس سنوات فلازم يكون مجموع اقساطك اللي تدفعها في الشهر اقل من ثلث الراتب

مثال:
لو راتبك ٦ الاف واخذت تمويل وصار القسط ١٢٠٠ 
لو حبيت تاخذ تمويل ثاني فلازم قسطه مايتجاوز ٨٠٠ 
لان مجموع القسطين يساوي ثلث الراتب اللي هو ٢٠٠٠
ولو راتبك مثلا ٩ الاف فمجموع الاقساط المسموح بها مايتجاوز ٣ الاف وهكذا
ولايسمحون لك بالزيادة في التمويل الثاني مهما كان راتبك

فانتبه عشان ماتتوهق وتضطر تبيع السيارة او تتنازل عنها 

اتمنى اكون وفقت في الشرح، وبالتوفيق