احداث عام 2065
65
16
إضغط هنا للإخفاء
السلام عليكم ورحمة الله وبركاته ,,,,
موضوع تخيلي عن السيارات وحبيت اطرحه ونتشارك ونتوقع عن السيارات في المستقبل وين بتوصل
وكيف كنا نفكر في الماضي ...
بسم الله ,,
الزمان عام 2065
المكان احد الابراج القديمه التاريخيه
قصه من نسج الخيال من عندي نتكلم عن السيارات مستقبلا ,,,
شخص اسمه احمد والثاني اسمه فهد اعمارهم 72 سنه
احمد .. الوو وينك يافهد
فهد .. انا بالبيت وش عندك
احمد .. انا عازمك نتقهوى في برج المملكه بأحد الكوفيهات هناك
فهد ... الله اكبر برج المملكه ويييييييينك انت الحين مقفل وصاير متحف كيف تعزمني !
احمد ... صحيح مقفل وخلوه متحف لكن شفت امس بالجريده انهم فتحو القهاوي اللي هناك للتراث القديم
قهاوينا اول ايام ال2000 وايام ال2014 وهذيك الايام الجميله جدا جدا
فهد ... صدق فاتحينه ؟
احمد ... ايه تعال نروح نتذكر الماضي ولاتخاف انا اللي عازمك
فهد ... خلاص تعال خذني انا تعبان
احمد ... وين اجيك بعيد تعال بالمترو وانا الحقك بالمترو مع السلامه
....
المكان ,, برج المملكه التاريخي والاثري بعد الترميم والتعديل عام 2065
احمد ,,, شف يافهد القائمه نفس اول الله يالدنيا حاطين قهوه امريكي وكابتشينو واسبريسو وموكا وعصاير اول
مو الحين ياربي لك الحمد مادري وش هاللي يشربون ويتقهوون هذا اذا تجمعوا اصلا
فهد ... صدقت ياحمد رجعتنا للماضي سنييين شف طريق الملك فهد كيف شبه فاضي بسبب المواصلات
وكثرة طرق المواصلات تذكر اول كيف كان الطريق ماتقدر تمشي من الزحمه الحين كل شي يخلصونه
على هالاجهزه
احمد ... وش صار على سيارتك الجديده
فهد ... تقصد الجيب ؟
احمد ... ايه
فهد ... لاتذكرني بالموضوع صدق انه هالزمن تغير تخيل وين سيارات اول وين جيوب اول
....
فجأه دخل ولد في عمر ال18 سنه وقال فهد هذا ولد ولدي اسمه موري !!
احمد ... وش موري ؟؟!!
فهد ... مادري ياخوي هذي الاسماء اللي اشوفها هالفتره مادري من وين طلعت علينا الله يااسماء اول
احمد ... الله يعين
موري ... وش السياره اللي تتكلمون عنها قبل شوي
احمد ... نتكلم عن سيارة جدك فهد
موري ... ايه صراحه سياره روووعه والاهم من هذا السعر يابلاش بمليون و400 الف ريال بس
احمد ... هههههه كيف تقول بلاش
موري ... ايه رخيصه شوف السيارات الثانيه ولاتنسى انه تمشي بالاستشعار وفيها منافذ للطاقه الشمسيه
والطاقه النوويه
احمد ... بس سيارات هالزمن ماشوف انها كويسه ولاهي مناسبه ولاتصلحلي
موري ... ليش
احمد ... انا انسان كلاسيكي قديم احب الزمن القديم والزمن اللي راح وراحو اهله معه
موري ... وش زمنه اي زمن تتكلم عنه ؟
احمد ... زمن ياولدي انت ماحضرته كنا نشتري السياره بسعر معقول وكانت الفلوس فيها بركه وكان كل شي
رخيص
موري ... شلووون
احمد ... في زمنا كنا نشتري السيارات باسعار رخيصه تلقى سيارات ب50 الف وتلقى ب60 الف
واذا تبي جيوب تلقى ب80 وتلقى ب90 وااذا بالمره مرتفع تحصله ب250 وهذا مرتفع جدا وفيه
اللي اغلى بس هذي الاسعار تقريبا وغير كذا الجوده عاليه مو مثل سيارات الحين اللي كلها طاقات
واستشعار وزراعة طاقه فيها ! حنا كنا نحب تقنيه اول الشاشات والبلوتوث والحساسات والاشياء الطيبه
القديمه حتى اول كان الناس ينبسطون لما كانت سياراتهم فيها بلوتوث
موري ... انت تتكلم من جدك والا تمزح معي ؟ وبعدين وشوو البلوتوث هذا
فهد ... استح ياولد وش يمزح معك والبلوتوث ماتعرفه هذا شي قديم وانتهى تلقاه معروض بالمتحف
احمد ... صدق هذا الواقع قديما
موري ... بس انت تتكلم عن اي زمن
احمد ... ياولدي انا اتكلم عن الاعوام القديمه قبل سنييين طويل عام 2000 وعام 2010 وعام 2014
وهذيك السنين
موري ... معقووول كان فيه سيارات بسعر 200 الف بس ليش مااشتريت كميه منها طيب لانه الحين
المطاعم لما تعزم صديقك او زميلك بمطعم التكلفه لاتقل عن 4 الاف كيف سياره تكون ب50 الف ؟!
احمد ... ماكنا ندري انه الوضع بيتغير , انزل تحت للمتحف في هالبرج بتحصل جيوب وسيارات صغيره
معروضه في المتحف تفرج عليها ياولدي واسعارها اول كانت طيبه اكثر الناس تقدر تشتري سيارات
انتهت القصه ,,,,
اتمنى اعجبتكم القصه التخيليه عن المستقبل وماحبيت اطول اكثر قلت ماودي يملوون الاخوان
جزاكم الله خير للمتابعه ولوقتكم ,,,,
إبلاغ
سيارات للبيع
الردود
0
0
دخلت جو حسيت اني شايب
قبل 9 سنه و 8 شهر