عند شرائك للسياره هل تشتريها لك ولا للمستخدم الي بعدك

اسعد الله اوقاتكم جميعا
ومبارك عليكم قدوم شهر رمضان

الموضوع يا اخوان ممكن الاغلب يعرفه ومر فيه
هو لما تجي تشتري سياره جديده يكون خاطرك في سياره معينه وما تشتريها
بسبب انها مالها شعبيه كبيره عند البيع مع العلم انها قد تكون بمواصفات ممتازه
وسعرها منطقي وسعر صيانتها كذلك وقطعها متوفره
الا انك ما تاخذها وتاخذ موتر مانت مقتنع فيه الا انه مرغوب بالبيع

الشي الثاني اللون يكون خاطرك باسود او ازرق او بني او ذهبي وتخليها وتاخذ الابيض لانه مرغوب مثلا

طبعا انا اتكلم عن نسبه كبيره من الناس وليس الكل
السؤال الي يسدح نفسه انت تشتري سياره لك ولا للشخص الي يبي يشتريها منك بالمستقبل

انا من فتره خذيت موتر واغلب الشباب يقولون ليتك خذيتلك النوع الفلاني
مرغوب بالبيع
وفئه ثانيه ليتك خذيته لون كذا مرغوب بالبيع

يا اخوان انا اشتري على ذوقي واشتري الي يعجبني مو الي يعجب غيري

بنهايه خلك على ذوقك وتمتع بحياتك واشتري الي يعجبك
اهم شي سياره تعجبك و الصيانه وقطع الغيار وموتر يكرف
ماتهمني اي شركه مهما كانت تعصبي للشي الي يعجبني فقط

وما يهمني اقنع غيري بالموتر الي عاجبني ولا هو من باقي ربعي لاجل
اتعصب له واحجر للي ما يعجبه
اي واحد يسئلني عنه اعطيه الميزات والعيوب بامانه ومن ثم انصحه ياخذه او لا

اخر موتر شريته رحت اغلب شركات السيارات بالمملكه
والموتر الي عجبني خذيته

ولكم حبي واحترامي وتقديري

إبلاغ

الردود

موضوع جميل والاجمل الردووووود الممتازه ،، انا شخصيا اشتري ،، ابيع ،، يعني اشتري موتر يكون مرغوب لناس وممتاز استعمالا ومحافظه على قيمته يعني مايخسرني نصف قيمته بفتره وجيزه ،، لايطيح بحلقي مايطلع بجراحه ما احصل احد يشتريه ،، إلا اذا كنت مطنووووخ ماهمني ،، اما غيره فلا دائما نجد مواتر ممتازه بالحراجات ولانجد من يتقدم ويسومها او يشتريها لانها ليست مرغبووبه وتشكرااااااااااااااااات

امير الاصيل 1714
قبل 9 سنه و 10 شهر

اذا مقتدر ماديا ولا سائل عن الخسارة او ما في بالك انك بتبيع او تحتاج فلوسها فمعك .

لكن البعض يشتري السيارة مضطر ,
وممكن اي وقت يبيعها كالمقيم مثلا فهنا السيارة تعتبر له كنز او ادخار يلجأ له عند الحاجة
هنا الافضل شراء المرغوب عند البيع

candle1 72
قبل 6 سنه و 8 شهر