غشني شخص وما كمل شهرين الا وسار عليه حادث شنيع- دعوة المظلوم

42 9

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 10 سنه و 5 شهر

السلام عليكم ورحمة الله وبركاته

كيفكم يا الغوالي عساكم بخير ان شاء الله

قبل كل شيء حبيت اقولكم أشتقت لكم

والله من زمان عنكم لكن تعرفون المثل اللي يقول ( يوم لقوا من يسليهم نسونا ) تراه صحيح ميه بالميه

لاني بـصراحه لقيت شيء ثاني يسليني ونسيتكم ولكن احاول ارجع لان شرياني موجود بالهمنتدى :)

على العموم ندخل بالموضوع وبدون مقدمات وبشكل رسمي بعيد عن الضحك والمزح لانه موضوع جدي وللأسف منتشر بشكل كبير ويحسب الفاعل انه ذيبان لا ضحك على مسلم


خلني اقولكم القصه

شريت مرسيدس شبح ع اساس انها نظيفه من مكينه وقير وكهرباء وكلش , وللأسف انغشيت فيها وكان اللي باعني تاجر مرسيدسات , وكان عنده 6 شبحات و فياقرا وسيارات الماني ثانيه

على العموم عانيت مع سيارتي شهر ونص والله من ورشه الى ورشه , اقسم بجلال الله انها ما عمرها كملت معي يومين الا واوديها الورشه بسبب مشكله , وخسرت عليها 10 الاف ريال وشريتها ب 12 الف ريال وهي ما تسوا 6 الاف وتباع تشليح بعد , لانها جتني وهي مهلوكه ما ادري كيف مشت بالفحص الدوري , جتني السياره مكينتها مخبطه و مكيفها خربان يبدل على كيفه وكفرات ممسحه وجنوط مكسره ومساعدات مفقعه و ديكورات مكسره وترج رجه مجنونه وعضلاتها مفقعه , تخاف تركبها من الرجه , وكل شيء اقوله مدعوم بدليل بأخر الموضوع , مصور الاعلان حق الرجال قبل لا اشتري السياره , عشان ارسله لاخوي يقرا والحمد لله اني صورته عشان يكون دليل قوي

, كاتب بالاعلان ان المكينه والعضلات والمكيف وكلش على الفحص الكامل والمكينه مغيره بمكينه نظيفه يابانيه ومدري ويش , وطلعت تشليح , ومصور ورقه الفحص يوم وصلت الرياض وكانت ترج رحت بها ورشه وقالوا الكراسي حقت المكينه مكسره كلها وكرسي القير والفحمات منتهيه و المكينه يحتاج لها تصفيه وصلحتها كلها

وطلعت بها يوم الا وتتفتف علي وفحصتها كمبويتر على طول وطلعت تحتاج توضيب مكينه وفيها الجنوط والكفرات معدومه وعمود الكردان منتهي و ثلاجه المكيف تهرب و اشياء كثيره مثل تهريبات بالهبل من تحت توقفها اليوم تصحى بكره تشوف زيوت تحتها !! و صورت ورقه الفحص وخليتها دليل

والديكور مثل ما قلت لكم شرطه علي ان مافيه شيء وقلت صوره لي وقال مايحتاج ميه بالميه سليم وطلع معدوم وانا مصور المحادثه ولكن للاسف ما عندي صور للسياره لاني تفلت عليها ومسحت كل صورها

وايضا صورت الفواتير المتبقيه لدي وفيه فواتير ضايعه ولكن صورت اللي حصلته , على العموم بعتها بعد معاناة استمرت شهر ونص وما عمري اتهنيت فيها يومين بدون مشاكل , وقعدت لين ما انباعت من اسبوعين لثلاث اسابيع وانباعت ب 11 ونص صافي وخسارتي 10 الاف ريال

والله كنت ادعي عليه ليل ونهار وفي كل وقت , دعوه من قلب وانا كلي قهر وغبنه من اللي سواه فيني , خسرني وتعبني وخلاني اكرف في الورش وخلا نفسيتي لمدة شهرين زق في زق و اتعب فكري ,ن الله ينتقم لي منه , ويخسره مثل ما خسرني ويتعبه مثل ما اتعبني ويخليه يعاني مثل ما عنيت والله لمدة شهرين كانت فيني غبنه ما يعلمها الا الله سبحانه وكلها بسبب هالشخص اللي غشني

على العموم بعد ما بعت سيارتي بأقل من اسبوع سار للي باع لي سياره , حادث شنيع في افخم مرسيدساته , كانت مقاس 600 موديل 95 سعرها 45 الف , وتعرضت لحادث شنيع وتسقطت وسارت تشليح ماتسوا 10 الاف من غير الاضرار البدنيه اللي لحقته

شفتوا ان دعوة المظلوم ما بينها وبين الله حجاب , وان الله ماهو غافل عن اللي يغش المسلمين وياكل فلوسهم , شوفوا وش سوا فيه الله سبحانه بسبب الغش والظلم , خلاه يخسر اكثر مني من غير الاضرار البدنيه , ومن بعد ما شفت اللي سار له , سامحته لوجه الله ليوم الدين , وما اتوقعت انه يسير له كذا , وايقنت ان دعوة المظلوم مستجابه , فسرت صادق في البيع والشراء واحاول ما اظلم احد لاني ايقنت ان دعوة المظلوم مابينها وبين الله ستار وهاهي قدامي , دعوتي استجابت ضد اللي غشني والله خسره اكثر ما خسرني ,

السالفه يمكن لها ثلاث شهور من الان ونسيتها , وبالصدفه دخلت على احد اعلانته وعرفت انه هو مع انه غير اسم العضويه لكن عارف سيارته الشبح الفضي وهو المبتقي من الست شبحات , والان معروض للبيع تشليح بسبب حادث وهو مقاس 600 موديل 97 كان ب 48 وهذي اكيد دعوه اخرى من شخص انضحك عليه باحد الشبحات , الله لا يبلانا , وخوينا توه يعرف ان الله ماهو غافل عن اللي يظلم الناس ويغشهم وعرف ان الحادثين هذي انذار له والانذار اللي بعده ما يعلمه الا الله , فعرض كل سيارته تشليح وهي سليمه عباره عن 2 فياقرا ولكن عرف ان الله حق و ما يبغا يزيد الله يبتليه بمصيبه ثانيه لان توه يدرك الامر ويعرف ان الله ما يضيع حق احد

فانبتهوا الله يسعدكم من الظلم , لان دعوة المظلوم ما بينها وبين الله حجاب , وياللي تغش ولا سار لك شيء للآن , لا تحسب ان الله مسامحك على هذا , فتوب الحين , ولا تستنى الله يبتليك مثل ما ابتلا هالشخص في نفسه وماله وخلاه يخسر اكثر من 90 الف !! بسبب غش بسيط كان يقدر يبيع سيارته اللي باعه علي تشليح ب 6 الاف تشليح ,, بخساره 5 الاف , بدل 90 الف

وبس هذا الاختصار واعرف انه طويل ههههههههه لكن وش نسوي

تحياتي للجميع اخوكم ابويزيد _ اسامه الغامدي

إبلاغ

الردود