اكتب السعر المطلوب ولاتضيع وقت الناس

الموقع اسمه حراج حرااااج حرااااااااج يعني تدخل في السومات
وانت داخل على موقع عالمي للبيع فقط
في مواقع عالميه مثل حراج السيارات فيها بالمزاد وما ينكتب السعر 


بالتوفيق

لان اللي ينزل اعلان مايدري كم سيارته تسوى

ويقارن موتره بالسيارات النظيفه واللي مامشت

ويطلب زي اسعارهم

وبعضهم تلقى ربعه لاتحد موترك نظيف ويكبرون راسه بموتره ويتاخر بالبيع بسبت هل كلامهم

وبعضهم يقول بشوف كم تجيب

وبعضهم يبي سعر معين علشان يسدد دين

والبعض يبي سعر معين يحطها دفعه لسياره جديده

لها اسباب كثير

الزبده البيع والشرا بالمستعمل وجع راس

والله انك صادق وجبتها صح يللا ياموقع حراج ننتظر تفاعلكم لايجي واحد رمضان الا وانتم واضعين تحديد الأسعار بالفعل طفشونا تقول بكم يقلك سوم والمشكله لمن تسوم يزززززعل 

والله موقع موتري كويس يحطون لك كل اسعار السيارات صحيح بعض اسعارهم خياليه بس ترتاح لانها بحد مو بالسوم 

نصهم مايبون يبيعون يشوفون كم تجيب ونصهم مايبون يحدون يقوولون يمكن تجيب اكثر من حدي 

واذا حطو حدهم ماشاء الله فرق عن الوكاله 5 الاف واذا كانت قديمه موديل 98 حده بقيمة 2001 

وش رايكم فالحمير اللي تخلي سياراتها على السوم
واخرتها يجي يقولك اصلا انا حاد موتري بكذا ؟

طيب ياحمار قولنا من الاول انك حاد موترك بسعر معين
ليه تخلي العالم تسوم واخر شي تصكها فوجيههم !!!

واما الاخوان الثانين
يعرضو سيارته على السوم
واذا شاف السوم ماعجبه
جاك نتف ام السعر بسومه خياليه عن طريق الجوال !!!

كل واحد يبي يرفع سعر سيارته ينطحها بسومة جوال 

اتمنى يكون السوم على العام فقط
هنا حفرنا وهنا دفنا مالنا علاقه فالجوال ولا سومه خارجيه

انا وش يضمن لي انه فعلا سيمت على الجوال ؟

الأسعار المحددة تكون فقط للأشياء الجديدة 
بينما السلعة المستخدمة فهي قابلة للأخذ والرد حسب نظافتها وإقبال الناس عليها ورغبتهم بشرائها ..
لذلك ( تحديد السعر ) في موقع حراج سيكون غير منطقي لسبب :
لو أفترضنا شخص يبي يبيع سيارته بـ ( 30 ) ألف ريال وسيارته ماتسوى ( 20 ) ألف ريال مثلا أكيد راح يضطر ينزل 
قيمة السيارة إلى الحد اللي تستحقه سلعته واللي يرضي الراغبين للشراء .. 
والشخص اللي حاط في راسه إن سيارته بـ ( 30 ) بينما هي تسوي أكثر وتنافسوا عليه أكثر من شخص ووصلت قيمة السيارة 
لـ ( 35 ) الف أكيد هالشيء بيسره ويرضيه مثل ما أرضى الشخص اللي يشوف إن السيارة فعلا تستاهل هالسعر ومو كثير عليها.

أفضل بيئة للبيع والشراء هي البيئة الحرة اللي تعتمد على العرض والطلب والتنافس الشريف اللي مافيه تحايل ( برفع السعر )
او غش ( بإخفاء العيوب ) والكذب على المشتري . 

يا رجال اصلن الموقع هذا " يرضخ "

يجونك ناس اختصاصهم ( البخس ) !

وناس اختصاصهم ( التعليق بالسومه ) >> يعلقون راعي السلعه بسومه خورافيه

ويجيك خوينا ما هو عارف فين يقبل  هو يطالع للي يبخسون 

واللا يطالع للي يعلقون بالسومه و هكذا تستمر الحياة 


وفي الاخير كلن على همّه سرا 

فيه سومات بخس كثيرة نعم

لكن اللي صاير حاليا سومات منطقية لكن يجيك الي البايع يطلب مبلغ اقل من الجديد بشي لايذكر ويقلك لا تبخس

انعرضت لكزس ES250 استاندر مصدوم طالب 130 الف يعني مصدوم وحالته حالة وما يفرق عن الجديد

ومرة شفت هايلكس يحتاج سمكرة كبوت و رففرف و شمعة ومهي مصلحة  و يقلك الي ما يدقق ما تنشاف تخيل المستوى اللي وصلته بعض الاناس في الاستخفاف بالعقول

النظيف سعره فيه نعم لكن بالمعقول يعني مهما كان نظيف لازم يقل عن سعر الجديد بملغ يستاهل

ولا اللي يجيك يبي يتنازل عن سيارة ماهو دافع ولا قسط ولا دفعة اولى ويبي تنازل طيب على ايش ! افكها وكالة اوفر لي 

المواقع العالميه ماتدخل المزاد الا بعد مايحجز من رصيدك 3000
لضمان الجديه 
اذا مارسى عليك المزاد بترجع للك واذا رسى عليك صار من ضمن مبلغ السياره

فيه حل جدا بسيط هذا حراج واي واحد يعرض سيارته تكون معه فحص معتمد من حراج
ويحدد مثﻻ اسبوع لبيع السياره والسعر اللي توقف عليه ملزم من الطرفين وانتهينا
لكن مشكلتنا الكذب والغش اﻻ من رحم الله

المشكلة في ناس تروح لة خاص تقول بكم يقول سوم
البعض ما يبي يبيع يبي يشوف سيارتة كم تسوي او يبي سعر خيالي يقول اعرضها يمكن يجي غبي يسوم بمبلغ خيالي