أضف سؤال أو موضوع جديد          

سالفتي مع بيعت سيارتي امس مع العضو ابو مجدوع

up 42 down 26
شويخ من أرض مكناس 2823
قبل 7 سنه و 10 شهر



السلام عليكم
قبل فتره نزلت اعلان لفوردي ووصل السوم ل47500 من العضو ابو مجدوع من الطائف
المهم كانت هي اعلى سومه واتفقت معاه وقلتله خلاص انا نازل الطائف بعد يومين بدل ماتجي للرياض خلنا نتقابل فالطايف ونخلص
طبعا هو عضو معنا وعارفني وعارف الموتر

بعد يوم كلمني احد زملاي فالعمل فالرياض وقلي ابشتري وبعطيك سعر حلو عربون 5 الف وب40 كاش والباقي اقساط يصير الموتر ب55 الف
اتفقت معاه وكل شي بس قلتله ترا لازم انزل جده عندي شغل الاسبوع الجاي اذا رجعت نتمم البيعه
وافق وعطاني عربوني
وكلمت ابو مجدوع قلتله ترا فيه واحد سام وعطاني سعر ممتاز

نزلت الغربيه وانا راجع اتصل علي زميلي قلي والله جاتني بعثه وابي اسافر وابي ارجع العربون 
قلت العربون طلع له جوانح وطار قدني حطيته دفعه اولى من قيمة الالنترا وانتظرها تطلع يعني انسى
ياتكمل البيعه يا يروح عليك العربون

زعل الرجال وسحبت عليه لانه خرب علي
قلت لو برجع لبو مجدوع يمكن يشك ويقول زميله ماشرا الموتر لان فيه عيب ومن هاكلام وانا ماحب ارمي نفسي على الناس
ولا اقدر انزله فحراج
بيجون يقولون انت عرضته وقلت انه بيع والحين رجعت نزلته مره ثانيه ليه هل السياره فيها شي محد شراها

عشان ابعد عن هالامور قلت بخلي السياره لحد مااطلع الالنترا  لعلها خيره
الخميس اللي راح كنت نازل الغربيه وكلمني البنك وقلي الالنترا جاهزه قلتله خلها يوم الاحد الحين ماني بفاضي

وانا راجع من جده مريت حراج الطايف قلت الفوردات مرغوبه بيجيب سعر على طول
تفاجئت ان حراج الطائف ميييييييت والحراج يمكن طوله 60 متر ولا فيه زباين وكلهم شريطيه وفيه محلات مكرفونات وماحولك احد

اعلى شي جابه 38 الى 40 
واحد الشريطيه زعل يوم مابعتله ب40 وقلي ( اصلا سيارتك يسمونها ابو سروال قصير )
قلت وش قصد ؟
قال الهارتوب النص تنده يسمونها ابو سروال قصير  

قلت توكل على الله بس وخل عنك الاستهبال الزايد

طلعت من الحراج الزفت ورجعت اشوف الفوردات البطاقه الجمركيه واسعارها خياليه
2009 يوصل 66 الف ومواصفات ماهي بكامله
2008 على 61 او 60

مع اني ماخذ فوردي قبل سنه وشوي ب65 ومدينة جده الاسعار ارخص

المهم رجعت الرياض وامس نزلت النسيم ماكملت ربع ساعه والا السياره انباعت ب48500 مو مثل حراج الطائف يجيب النوم 
كان فيه شباب باين انهم مستخدمين كل ما انصح احد فالسياره يشك فيني ويعتقد اني بنصب عليه لاني مدحت الموتر

المهم جى واحد راعي معرض حسيت انه شريطي وحسيت انه راح يشتري فقلتله ابي فيه 50
حسبت حساب نقل المليكه والفحص والتامين كلها منتهيه فلازم هو ينقص فالسعر وانا في الحقيقه ابي فيه 49 او 48 مقتنع فهالسعر
اخذ فيه لفه ونزل عند حفرة بنشري شيك تحت وركب ودخله المعرض 


رجع الشريطي ركب حتى الموتر مافحصه دخله الحوش وقال ابيه لواحد 


^^^
ذكرني بابراهيم التركي يطلع يجرب الموتر ويشيك عليه من تحت واذا شافه سليم شرا بدون فحص  ههههههه

المهم طلعت من الحراج الا بالصدفه اتصل علي ابو مجدوع اللي سام الموتر ب47500

قلي شفت موتر نفس موترك واقف عند محل ورجعت قربت اكثر الا تاكدت انه موترك وسئلت راعي المحل وعطاني رقم راعي الفورد بس كان الرقم يختلف عن رقمك وكلمت الرقم وقلي انه توه مشتريه
بعدها قلت اكيد شاقح توه بايعه

قلي ابو مجدع تراني انا فالرياض كنت ادو فورد ليه ما كلمتني والله لعطيك فيه 49 
قلت والله انك خطرت على باي لكن خفت اكلمك تقول شاقح شكله لعاب وشكل الفورد فيه مشكله من يوم ماباعه على اللي سامه منه الاول
والحين جاي يبي يرمي الموتر علي  !!!!

قال لا والله مو انا افكر كذا وانا اعرفك واعرف موترك اقسك بالله لو كلمتني ماكنت بشك فيك او من هالكلام وش دعوه

قلت على العموم انا مدري وش اللي فقلوب الناس ولا اعرفك الا معرفه سطحيه ولو اعرفك عن قرب اكثر كان كلمتك من اول 

قلي خلاص مو مشكله ارجع كلم اللي بعتله الفورد وقوله انه فيه واحد يبغى يشتريه ويربحك فيه

رحت كلمت اللي شرا الموتر
وقلي ترا الموتر والله مو للبيع وانا قلتلك شاريه لواحد يبي فورد وانت شفتني فالمكتب قلت للموظف لاتحطه باسمي بعطيك بطاقة واحد من زملاي وحطه باسمه يعني مابكذب عليك وانا صورته ووريته الصور وكلمته مره ثانيه وقال انه رافض يبيع الرجال يبي يستخدم

المهم رجعت كلمت ابو مجدوع قلتله الرجال رافض يبيع وراح الموتر مالك نصيب لعلها خيره

ولله الحمد 48500 + 5000 العربون = 53500
مع العلم اني كنت مستعجل فالبيع واعتقد لو بفرفر فيه فالحراج اكثر وفحراج الشفاء اتوقع بيجيب ال 50 بالراحه

واخيرا كرشنا هالموتر وبكرا بنزل تقرير بسيط عن الالنترا وتقييمي لها 

العجيب فالموضوع
ابو مجدوع كان بيشتري الموتر وهو من الطائف من فتره كنسلت بيعته لبو مجدوع لسبب اخر
وبالصدفه ابو مجدوع  شافه فالنسيم بعد ما انباع
رغم ان ابو مجدوع كان يلف فالحراج وانا فالحراج وماندري عن بعض واعتقد لو شافني كان شرى الموتر
بس ماله نصيب







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


ابو عباده وباقين الشباب حياكم الله 
ومتقبل ارائكم وردودكم

لكن النصيب فوق كل شي
والشي الاخر زميلي ماجاه خبر السياره عن بيعها عن طريق موقع حراج
احد الشباب بلغه اني ناوي ابيع وجاني على طول بعد ماكلمت ابو مجدوع




up 2 down 3
شويخ من أرض مكناس 2823
قبل 7 سنه و 10 شهر



اخوي شاقح بكم طلعت عليك النترا مع الاقساط 


up 1 down 0
maan - 518 -20
قبل 7 سنه و 6 شهر