حرارة البهباني

4 3

لايمكنك التصويت حتى الحصول على 20 نقطة على الأقل
إضغط هنا للإخفاء

عبووود 99 99
قبل 10 سنه و 5 شهر

السلام عليكم ورحمه الله وبركاته 

كيف حال الشباب 
حبيت اطرح حلول لمشكلة يعاني منها الكثير من ملاك الجموس و احيانا 
يكون موترك رزة و شكل و بويته تلمع و فرشه نظيف بس تكره بسبب الحرارة 
هذي حلول لاغلب مشاكل الحرارة وان شاء الله ما تشوف حراره بعدها نبدا 
بسم بالله :
عندك حلول الحراره هي :-
1- يكون الرديتر اصلي زي الى جا من الوكاله
يعني وكاله وليس اصلي السوق لان النحاس يختلف فيه اصلي وفيه تقليد
وهومثل مصنع سورى ، مصنع السعوديه هذي لاتعمل على الوجه الصحيح
 مما دعانا الى الرديتر رقـــم 
(730) نوع الالمنيوم وهذا الرديتر لحد الان يعتبر الافضل في السوق 
وفي عندك خيار ممكن اننا ناخذ رديتر سماره الامارتي يجي اربع عيون 
وكفاءته عالية جدا و لاتنسى تعبي موية رديتر اي سي ديلكو الاصلية
وهي الافضل لانها ما تصدي زي المقلد ....


2- لا زم تركب البلف ويكون اصلي وكاله لان البلف ضروري في السياره
علشان يقوم بتوزيع المويه ياخذ البارد ويدخله في السرندل والحار يحجزه
في الرديتر الين يبرد يعني عمليه ترتيب دوران المويه داخل السرندل
ومقاس البلف يفضل تركيب مقاس ( 160 ) يفتح والحرارة على الربع
وفي عندك خيار ثاني انك تركب بلف رياضي وهذا جيد و ممتاز وسعره 
متوسط لا هو غالي ولا هو رخيص ...


3- تأكد من تماتيك المروحه هل هو يعمل بطريقه ممتازه اي يشبك ويفصل
مع دعسه البنزين وارتفاع الحراره ام لا ...


4- قم بفتح غطا الرديتر والسياره طافيه وتكون بارده وتأكد هل الغطا فيه تنسيم
ولا لا وبعدين شغل السياره وغطا الرديتر مفتوح وخل واحد يدعس بنزين
وشف المويه تقلب داخل الرديتر والا لا ،
اذا كانت ماتقلب معناة طرمبه المويه خربانه ولموتر ما ياخذ دوره المويه كامله
تقدر تاخذ طرمبة الوكالة وفي حال انك مالقيتها خذ طرمبة رياضية ...


5- وزنيه الديلكو تأكد منها هي صحيحه موقته مع التيمن ولا لا
وفي حال انك ما تعرف لها خل ميكانيكي يفحصها لك ويوزنهآآ ...


6- وزنيه البلوف لازم تكون على الوجه الصحيح والافضل انك تروح 
لميكانيكي يشيك عليها ويوزنها لكك ...


7- ضرورة وجود مبرد الزيت لانه بسبب درجة الحرارة المرتفعه عندنا
من الضروري انه يكون عندك عندك مبرد وتراه مايكلف شيء ويريح المكينة...


8- إستبدال خراطيش الرديتر فوق وتحت وخصوصاً السفلي وخذ لك اصليات 
لانها قوية و تتحمل ...


9- في حالة أرتفاع الحرارة فل ونقص في ماء الرديتر شديد بدون وجود
أي تهريبات في الرديتر فيجب فك روس المكينة وعمل مسح لها في مخرطة
فنية متخصصة ...


10 - درجة الحرارة الطبيعية بالصيف على النص و فوقه بشوي وبالشتاء
على الربع و فوقه بشوي ...


هذي كلها لها تأثير كبير على ارتفاع درجه الحراره في جميع السيارات 
و بالاخص الجموس القديمة 

ان شاء الله ما اكون طولت عليكم و اكون توفقت بالشرح واي استفسار انا 
جاهز و موجود لا تنسونا من دعاويكم الطيبة ...


هذا وتقبلوا خالص التحيه والتقدير ... 

إبلاغ

الردود