لنتعاون ياخوان في هالعيد ونضع حد للاستغلال

طيب اذا صار مغاسل الرهدن شركه كبيره ومدبله بالسعر وحاط ورقه كبير المحل ولا احد قدر يقوله شي وش ظنك

وغير هذا محلات كثيره لكن غلطان الي يسوي شي بالعيد ظبط امورك قبل فتره

طيب يوم بغلت وش صار .. هل ظل فاتح . ولا سكروه .

لو ربع الناس تشتكي . . كان . اصبحت  السعوديه . مثل  كانك داخل قريه الساعه 2:30 بالليل . كل شي مسكرا .

الان مغاسل سيارات + حلاقين + مغاسل ثياب + حلويات + كنادر الله يكرمكم . . وشمغ ... والخ ... حتى الطرطعان .

السلبيه كذا ماتنفع ياخوان هذا اللي خلا العماله تلعب بنا

لحالي اكيد ماقدر اردعهم ولا اثنين ولا عشره لكن لو اغلب الشعب بلغ وقاطع الكل بيرتدع الكبير قبل الصغير


والبلاغ امره سهل ومافيه قطع ارزاق الا اذا كرر العامل غلطته اكثر من مره 

والله ياخوي انا قبل تقريبا شهرين قدمت بلاغ عن طريق موقع وزارة التجاره وماتوقعت انهم يردون ويطنشون سالفتي بس والله العظيم خلال نص ساعه وهم متصلين علي
واذكر تمشكلت مع موزع قطع غيار مزود على الاسعار الاصليه لايقل عن خمسين ريال وقلت عطني فاتوره بقيمة القطع واروح لوزارة التجاره اشتكيك ارتبك وتلعثم وقام يطقطق بالحاسبه
ويعطيني مبررات مال امها داعي برفع السعر وخذيت القطع بالسعر الاصلي
ونصيحه مني لاحد يسكت 

كفو اخوي احمد هذا الشغل الصح

مشكلتنا نسكت ونقول كلن يرفع الاسعار وماحد مسوي ومانقدر نغير شي ومن هالكلام 

لكن لو نحاول مجرد محاولة نسوي شوي كان شفت الوضع ان شالله يتحسن

انا شخصيا بلغت على مغسلة سيارات العام الماضي
كان يغسل ب20 ومع العيد رفعه ب30

تدري وش الرد اللي جاني من وزارة التجارة..
يقولون هذا عرض وطلب اذا اعجبك اشتغل عنده واذا ما ناسبك السعر تقدر
تتجه لمغسلة أخرى..!!!

هو صحيح ماحد حولك حتى لو بلغت لان الكل رافع وهالشيء معروف بمواسم العيد .. لكن ليه الاستغلال من الاصل ؟؟ يعني ليه ترفع سعرك ؟؟؟؟؟؟؟ عطني مبرر واذا موسم عيد!!!!




صاحب الموضوع معك حق لكن مافي اليد حيلة ... لكن انا عن نفسي قمت اقاطع البعض منهم .. مثلا مغسلة السيارات معروف انها بليلة العيد ام الزحمة عندها والغسيل اصغر سيارة تلاقيها ب 30 ريال تقول له ليه يقول لك موسم عيد !!!!


واذا موسم عيد يعني بتغسل سيارتي بذهب ؟؟؟ فـ ان شاء الله من بكرنه باخذ لي عدة غسيل واغسلها بنفسي وكلها ماتجي 20 ريال , ماهي مسألة بخل والله لكن ليه الاستغلال !!!!!!!!!!!!!!!!!!!!!1

المفترض وزارة التجارة تفرض قسايم مثل المرور على المتلاعبين بالاسعار وكل ماتكرر التلاعب تزيد قيمة القسيمة او اغلاق المحل 

عندنا مغسله بالحي صومال فيها كان يغسلون السياره حقتي ب 10 بعدين 15 بعدين 20 والان والله العظيم 25


بظرف سنتين هذا المعدل التصاعدي


صرت اغسلها بديره اذا سافرت ههههههههههههه

ثقافة الخضوع والسكوت على رفع الاسعار وعدم المقاطعه تخلينا طعم سهل للاجانب 
والله العظيم لو هالزياده تروح لصاحب المحل اللي هو ابن بلدي كان قلنا فدا ويستاهل
لكن المحلات اصحابها العمال والسبب الاول والاخير من كفلائهم متستر ويقنع بالطفسه منهم
وتركوا الاجانب يلعبون بأقتصاد البلد
الله يحسن عزانا في انفسنا  

والله محد درا عنا ماغير يدبلون بالأسعار ومواسمهم في العيد بس
مثال وديت 5 ثياب لي المغسلة كوي فقط المجموع 10 ريال سجل بالفاتورة 15 ريال يعني اخذ 5 ريال زيادة ولا كلمته ولا اي شئ
وماخذ الا 10 ريال حقه وزيادة عليه بعد 

رحت الحلاق امس دائم بعشره وأجي احاسبه قلي عشرين قلت ليش قال عيد وأحط العشرة على الطاولة وامشي

انت شخص مكافح وعندك غيره وحب لغيرك
لذلك قمت بالاجتهاد ووضع الرقم من اجل زيادة الوعي وعدم السكوت اما جشع التجار

لو الناس تطبق هالشي والوزاره تعطي وجه بشكل رسمي كان احنا بخير

لا حد يتصل ويتعب نفسة
انا توي قدمت بلاغ عن مغسلة ملابس تدرون وش قال!!!
قال هذي ماهي من اختصاصنا 
قلت اجل وش اختصاصكم ؟
قال المؤسسات والشركات الكبيرة فقط
وقفلت في وجهه 

المهم المغسلة مسجلة علي 50 ريال
والسعر الحقيقي اقل من25 
لاكن ان قالها الله انه ما يذوق ريال زيادة