صوت الكرونه بالباص هل لها حل

فيه مادة يبيعونها في محلات القطع اعتقد زيت يخفف صوت الكرونه التوضيب اعتقد بيكلف شفلك دفرنس من التشليح
وموفق خير

زيت دفرنس دينا يكون ثقيل بس ماراح تستفيد 

فتره و يرجع الصوت 

الافضل لك تغير الدفرنس كامل لان الكارونه صعب وزنها 

اذا ماضبطت الوزنيه بترجع لك المشكلهِِ


شوف لك دفرنس واشرط عليه لو يطلع صوت يستبدله و يتحمل الفك و التركيب

وزن الكرونه اصعب شي فالسياره لاكن كل السباكين ماعندهم ساعة وزن الكرونه

ولا يعرفون يوزنونها بس لاركب وخلاص

الافضل خذلك دفرنس كامل على الضمان بدون ضمان لاتاخذ ابدااا

ابو خلودي
الحل اللي ذكرته مايحل المشكله
لكن يكتم صوت الونه لحد ماتفرط عليك فجئه

ماعنده الا دفرنس كامل تشليح يفكه لك من سياره قدامك 
لان بعضهم يوضب دفرنسات ماتضمنها

غير كرونه من التشليح  و دور مهندس معروف بخبرته و اماناته في شغله و الله يسهل امورك 

والله كفوو شباب غطيتو علي موقع مستعمل بطرح المساعده والحلول .. الله يسعد كل واحد رد علي

انا كنت من الناس اللي يقولون لا توضب الدفرنس محد يوزنه وقدر الله وطق عندي الدفرنس حق الشفر سلفرادو 2006 وكل مارحت عند واحد قالي الدفرنس ب4000  وفوق والمشكلة ان موتري دبل وﻻزم تكون كرونة الدبل نفس كرونة الدفرنس الخلفي وبعضهم يقول لك هذا حق نفس موتري وبس واجي اساله كم الراشيو حقها يقول ما اعرف لين طحت عند سوري واثق في شغله واعطاني ضمان شهرين وبسعر 2000 ريال وغير لي الكرونة والبنيون وكل شيء جديد امريكي من شركة oem  ويا الله لك الحمد لها الحين يمكن حدود  شهر ونص والموتر سالك والمحل ذا في الصناعية القديمة في الرياض وما اعرف الرجال عشان اسوق له ومو شرط ان تجربتي نجحت تنجح مع غيري وبالتوفيق

ابو ابراهيم اقسم بالله اتحداك اذا لقيت واحد يوزن الكرونه بالساعه

يوزنها وزن صحيح وزن وكاله ولايطلع فيها حنه ولا ونه ولا ضعف عزم

وينه هذا اذا كان بمكه او جده او الطايف انا بروح له 

ياولد محد يعرف يوزن الكرونه ابدااا كلهم سباكين

صاحبي غير كرونه لكرسيدا87 قلي مزبوطه وتمام واعطاني ضمان اسبوع

قلت له اصبر شهر او شهرين او تزيد الين سنه

وشوفه شهر ونص والكرونه طلع لها ونه ويزيد صوتها 

اللي عندنا كلهم سباكين ونادر تحصل اللي يعرف شغله

كلهم متعلمين من بعض السباكين.. 

تجربتك للدفرنس خلها سنه ولاحظ اصوات الدفرنس وشيك عليه

وسياره لسياره تختلف ومكانيكي لغيره يختلف .تحياتي لك

في تشليح في صناعية العويظه اسمه الوفا انا شريت لونيت نيسان 2010 كرونه بدون ظمان 400ريال وركبتها 300

اخوي شوف المقطع هذا ممكن يفيدك خاصة من الدقيقة 22:00 ـــــ يوتيوب 
http://www.youtube.com/watch?v=37u8heP92Lc

فعلا كلام الاخ نوار صحيح 
اليوم رحت عند ورشه بالصباح وقال ازبطلك الكرونه وضمان شهر غير الشهر مني مسئول فعرفت ان ما عنده سالفه 
ونقزت تشليح بريمان لقيت الكرونه ب 3000 ودفرنس كامل ب 5000 يا ساتر 
رميت الباص بورشه وقلت فك الدفرنس لو تعبان الشكوى لله حغيره ولو بعض القطع خربانه حشتري جديد واريح نفسي 

والله مشكله يا اخوان باصات نيسان اورفان انصحكم لحد يشتريها والله تعب وبهدله والله يخلي التويوتا الهاس مكده وكرف 

ياخوي مهي مسألة تحدي انا عرضت تجربتي لكم ولله الحمد ماتوقعتها كذا وانا لو فيه سيولة ولقيت وقت كان غيرت دفرنس من الامارات وترا ما فيه احد يوزن في الصناعية القديمة بساعة ﻻني لفيته اغلب الورشة اللي عليها الكلام وكان اللي سويت عنده افضلهم سعر وضمان

الأخ فــ9ـد.ز
مو لأنك جربت النيسان يعني تويوتا أحسن
حط في بالك دايما كل سيارة مو كل شركة فيها ميزة وفيها عيب .
محدثك من سنين وما يشتري إلا سيارات خردة والحمد لله على كل حال.
أما عن الدفرنس فالأفضل شراء مستعمل من التشليح مع التركيب والضمان.
والأهم لمن تغير الدفرنس أو لكل من يزيد الزيت عند البنشري إنه ما يستخدم الزيت العادي عيار 90 أو عيار 140 ، كلها ما تنفع وتطلع ونّة.
الأفضل شراء زيت من الوكالة مع زيت إضافي للحفاظ على الزيت الاساسي.
والله أعلم.