استشارة في شراء تكسي ونصايحكم

شف أنا امتلك سيارة أجرة وبالنسبة كمشروع وانت فاضي فيها إن شاء الله رزق بس على حسب ما تكد 




وعلى حسب صبرك، إذا بتشتغل بالرياض على زحمتها وحرها 




وموسم البرد قادم والتآكسي في هالأيام فيه شغل أريح غير العطلة إنتهت وبدأت الناس تطلع وبتحصلك مشاوير




ومع إني سألت كم شخص أعرفه يمتلك سيارة أجرة من شركات الي يطالبون باليومية 150 في ناس ماتمدحها




لأنه يادوب يخلص اليوم يجيب حق الشركة ومايبقى له شي، وغير كذا مايحصل وقت بعد الكد يرجع ينام ويصحى يداوم 




وفي ناس قالوا شغلة مقرفة وفي ناس قالوا تمشي الحال، بالنهاية يرجع للشخص نفسه وقدرته التحملية  




بالنسبة لي ما أطلع فيها الا أوقات متأخر من الليل مثلاً 9 عشان الزحمه تكون خفيفة وإن حصلت حمدلله وإن ماحصلت حمدلله 




وأوقات أطلع بعد صلاة الفجر إلى الساعة 6 أوقف لأني مرتبط بعمل 




لكن كـ ممتلك للسيارة الأجرة وقت فضاوتك حاول تشد حيلك وتجيب وإن شاء الله تتوفق 
--------




بالنسبة لنوع السيارة - إلنترا صغيرة ومريحه وغير متعبة (صرفية بنزين قليل)




الكامري كبيرة ومريحة طبعا للأجرة، ولك مستقبلاً .. (صرفية بنزين متوسط مرتفع)




--------




بالنسبة للتاكسي هي موفقة وغير موفقة، يرجع لكدك وصبرك، وعشان كذا لو تقدر تأجر سيارة أجرة قبل ما (تستعجل) أفضل تجربها وتشوف نفسك هل تتحمل وتصبر 
وتشوف المشاوير وتشوف مكسبك اليومي وأجرع وأقول بالأخير الأهم الإمكانية لو قدرت عليها الله يوفقك وييسر أمرك إستمر 




وإذا حسيت نفسك ما إستفدت شي عاد حاول (لأن كل شي من أوله صعب) 
-----
ولو أنا مكانك بمسك الفلوس، لكن بجرب تجربة واستأجر وأشوف نفسي أولأً 
---




شكراً على المقاطع وجزاك الله خيرآ الجزاء ... والله الموفق 

فكرة موفقة خاصة برياض ولايوجد فيها إي نسبة خسارة
السيارة الافضل كامري اجرة 
الله يوفقك

ي رجل والله ي التكسي فلووس بس يبي لها صبرر 
وبعدين مو شرط بس بالديرة تقدر توصل مثلا من الرياض لجده وغيره 
وانت راجع للرياض ولقيت ركاب نعمه  تطلع مصروف الرجعه 
انا اشتغلت كداد قبل فتره وتركتها مثلا من عرعر لسكاكا 500 
ومن عرعر للحفر 700 ريال ومن غير اللي توصلهم بالديره 
كنت اكد عالكابرس ونص فلوسي تروح ع البانزين عشان كذا طابت نفسي وتركتها الشغلة يبي
لها سيارة اقتصادية بالبنزين ويبي لها صبر  مثل ماقال محمد عبدالله جرب استأجر تكسي يووم وشف الشغلة كم تطلع وانت تتحمل الشغلة ولا لا عشان ماتشتري تكسي وماتكون قد الشغلة وتتورط بها (:

الله يعطكم العافيه على الافاده طيب وشر رائيكم في المازده 6 تنفع تكسي صرفيتها ممتازه بس مدري عن القطع الاستلاهكي  ووش المطلوب غير الرخصه العمومي  وهل لو اشتري تكسي جاهز افضل اصلن ما اعرف الاجرائات

الإجراءات يومي إني ناوي على سيارة أجرة 
- في مشروع "الملك عبدالله" شروطها (تحول مهنتك بالأحوال إلى سائق أجرة يعني لو إنت موظف تغيرها لو إنت طالب تغيرها)  وهذا السبب ما أخترت هالطريق
ومشكلتها تنتظر بالشهور عشان تطلع السيارة والفائدة منها ماتدفع فوائد لأقساط السيارة.

- في "مشروع عبداللطيف جميل" مايحتاج تروح الأحوال تغير المهنة وهذا السبب خلاني آخذها منهم بس غاليييين جداً أقساطهم عالية ..
ومن شروطهم رخصة عمومي + كفيل غارم سعودي راتب فوق 9 تقريباً + برنت من الأحوال إنك متسبب (ليس على وظيفة حاليأً) ودفعة أولى 4آلاف ريال وكسورــ شهرياً 2108ر.س ، طبعاً السيارة كامري توماتيك لمدة أربع سنوات وتجيك جاهزة السيارة عليها إستكرات التاكسي والمصباح فوق التندة والعداد لحساب المبلغ، لكن ما أدري إذا تحتاج قير عادي بس أعتقد إختياري عندهم... 
بالنسبة للـ مازدا تحولها إلى تآكسي،على ما أذكر الشروط لونها أبيض أو لؤلؤي، وتركب عليها الإستكرات والمصباح وعداد السيارة، لكن في شروط للسيارة على حسب قوتها كم مطلوب بالضبط ما أعرف دقتها للأسف، ممكن لو تروح وزارة النقل يفيدونك في نوع المكينة لأن عندهم معظم الإجراءات .. 
عشان ترتاح خذ لك تآكسي جاهز إذا ناوي تروح وترجع اكيد بتوفر، وإذا عندك رخصة عمومي تفك لنفسك مجال كبير لأنها عنوان الشروط.


---
أخوي  w.asa  "إقتباس"
"   استأجر تكسي يووم وشف الشغلة كم تطلع وانت تتحمل الشغلة ولا لا عشان ماتشتري تكسي وماتكون قد الشغلة وتتورط بها (:       "
بالفعل أحط على كلامك خطين، لأني أحس إني تورطت في أقساطها بس أخلص الأقساط وأشوف أكمل ولا أرجعها عادية .. الله يكون بالعون ويقوينا .. 
---- 


والله يوفقنا وياك يا نايف مجول القحطاني ...

التاكسي فيه خير بس الواحد يخاف ربه ولا ينجرف ورى المغريات يضيع هو ورأس ماله كبداية لاتحط المبلغ كامل خذ سياره مستخدمه وجرب شفت شغلك ماشي اشتر جديد ماخارجتك الشغلة تخرج بأقل الخسائر اهم شئ دور سياره تماتيك والله يرزقك 

بس مافهمت كيف استائجر تكسي عشان اجرب

شف ياطويل العمر بهذا المجال ما أعرف فيه كثير لكن اللي قريته وسمعته 
بإمكانك تروح مؤسسات اللموزينات أو الشركات وسمعت مقرها بالنسيم الرياض، لكن وين بالضبط لا أعلم للأسف 

الظاهر المنتدى يحتاج موضوع عن هذا الشي، الأماكن والدلاله عنها وشروطها، عموما حاول تستفسر عن شيخنا google.com 

أو بإمكانك فتح موضوع جديد (من لديه طريقة إستأجار سيارة أجرة ـ تآكسي ـ) واكتب بصلب الموضع أماكن إستأجار سيارت الأجرة 
+ شروط التأجير، والمدة وكم المطلوب باليومية 
(وحدد المنطقة اللي متواجد فيها) 

وإن شاء الله المنتدى والموجودين ماراح يقصرون بمعلوماتهم وخبراتهم ..