تقرير شامل عن كيا كادينزا 2014

10 0

لايمكنك التصويت حتى الحصول على 20 نقطة على الأقل
إضغط هنا للإخفاء

majed112345 855
قبل 10 سنه و 2 شهر

السلام عليكم ورحمه الله وبركاته 
بسم الله الرحمن الرحيم 

قبل لا ندخل في التفاصيل بتكلم عن قصتي من الكادينزا 
انا تقريبا جلست ٣ شهور ابحث عن سياره في اسواق الحراج والشركات وكلنا نعرف ان عمليه البحث عن سياره 
مناسبه دايم تكون مرهقه ومحيره بشكل معقد لكن بختصر الموضوع بشكل اسرع 
وانا بصراحه كان اهم شي عندي في السياره الي ابغى اشتريها ٣ نقاط
ـ عزم السياره
- العزل
- الضمان والجوده واسعار القطع


اما من ناحيه المواصفات الداخليه والشاشه والجلد وفتحه السقف هذه الاشياء ماكانت تهمني نهائيا 
وكانت في سيارات كثيره كنت ارغب فيها وبصراحه كنت معجب في الاكورد الجديده والازيرا 
واستأجرت السيارتين وبعد التجربه استبعدت الاكورد وخرجتها من راسي نهائيا بدون اي تفكير والسبب انه عزلها سئ جدا
وسعرها غالي ومواصفاتها قليله جدا مقارنه بالسعر
فقررت اشتري الازيرا وبدأت ابحث في السوق وادور على اسعار رخيصه 
لكن واحد من اصدقائي قال لي روح شركه كيا والقي نظره على الكادينزا منت خسران شي 
وفعلا رحت كيا وشفت الكادينزا وشفت مواصفاتها وعجبتني 
وسالتهم عن سعر الاستاندر قلي ب٨٣ الف وبعد التخفيض تطلع ب٧٩ الف وانا بصراحه شفت انها فرصه لاتكرر واتوكلت على الله وشريتها 

والان السياره معي ماشيه ٧٠٠٠ تقريبا  

مميزاتها في فئه الاستاندر
-عزم السياره ممتاز ومحركها بقوه 290 حصان وسعه المحرك 3500 cc وقير 6 سرعات توبترونك
- جنوط 17
-السياره واسعه من الداخل ويوجد فيها مثبت سرعه وشاشه معلومات وتبريد منفصل وتخشيب في الابواب ومنطقه القير والاكواب 
-يوجد تحكم بالمسجل والراديو في الدركسون وتحكم للتعشيق والقير في الدركسون تعشيق f1
- مداخل USP و AUX
- وجود لمبات LED في الامام والخلف ووجود كشافات الضباب
- وجود لمبه ضوء القمر في السقف عشان تنور لك مكان الاكواب والطفايه وتخلي الجو شاعري ورومنسي :P
- العزل الارضي ممتاز بصراحه مع العلم ان سيارتي السابقه لكزس GS 2008 واشوف ان العزل افضل في الكادينزا 
- ضمان ٥ سنين وكيلو مفتوح

نجي لعيوب السياره لفئه الاستاندر:
- كل الناس تشتكي من الوكيل لكن بصراحه انا سويت صيانه 5000 الاف وخدماتهم كانت عاديه وماعندي اي ملاحظات عليهم 
- السياره دفع امامي
- عزل الهواء الخارجي لا بأس فيه مقارنه باللكزس اشوف ان العزل اسوأ في الكادينزا
- لايوجد حساسات خلفيه وهذه ممكن تسبب مشكله في المواقف الضيقه مع العلم انا مااشوفها مشكله بالنسبه لي
ـ بعض سيارات كيا تتشارك نفس التصميم مع الكادينزا في اللمبات الخلفيه والشبك الامامي
- فئه الاستاندر لا يوجد فيها تبريد وتسخين المقاعد ولا يوجد نافقيشن
- الاختلافات بين الاستاندر والفل كامل هو فتحه بانوراما وجنط مقاس اكبر وتخشيب اكثر في الطبلون والحساسات والكاميرا ولمبات الاشاره في المرايات مع زر لغلق المرايات وفتحها

السياره ملفته للانظار وتصميمها متشابه مع السيارات الالمانيه بحد ما 
ورأي النهائي فيها انا اشوف انها افضل سياره متواجده حاليا في الاسواق بسعرها الرخيص وضمانها وجودتها العاليه
وبالنسبه لجدول الصيانه اغلب الصيانات اسعارها مابين ٢٠٠ الى ٤٠٠ ريال 
لكن في صيانات غاليه مثل ال٢٠ الف وال٤٠ وال٨٠ وال١٠٠ توصل الى ١٠٠٠ ريال

واعذروني اذا نسيت او سهيت عن ذكر بعض المعلومات
واعتذر ماقدرت أرفع صور سيارتي 
وجبت لكم صور من الانترنت لكادينزا فئه الاستاندر واعتذر لاصحاب الصور

إبلاغ

الردود